2 TAWARIKH 31 - Allah Wene Fano Wene Hupla Inane

It afuni Israel mene nen wene wanhi lagaukwa mene a'nogo Hizkia nen halhikhe wene

¹ Seni Paskah isasuogeluk kabogetukwa mene a'nogo mondogat hilingfuluk he, it afuni a'nogo inebe abirengge o it afuni Yehuda mene werek kwe kota omanogo lagaukwasik he aben kembu agut ilirenggerogo menogo fesukwa mene omanogo halik halokhogo figik, kembu he mene Dewi Asyera ilirengge elalek welagaikhe a'nogo tukhumhogo lakfisigik, wam kembu faget warogo nolhuba mezbah omanogo wolelenggen isigik, kembu apne wanhukwe omanogo mondok molulukhogo lakfisigik, hilingitukwa. Andi higithogo at he o alek kwe it afuni Yehuda mene werekwe inom, nen wilayah it Benyamin mene werekwe omanogo inom, Efraim, Manasye werekwe inom, a'nogo nek hilingirik lagaukwasik he, it inebe inawi lombok lagaukwa.

² At Raja Hizkia nen he it ap imam inom, nen Lewi inap inom ineabu kurik werek higit-higit fisilik lagaikhe. It yabu sumburisilik lagaikhe mene andi re ebe yi: Iren wam Tuhan endawimo agaiyek hoageluk warogo nolhik, wam At Tuhan nen fanot ninobagauwageluk kino yagati logolik warogo nolhik, o Tuhan Awi wuri'mo omanogo wene kabogetuba yabu hilingitik, o Tuhan Awi elonggokwe omanogo nen Tuhan foget fikhi logolik hai watik, hilingiti logouwageluk sumburogo wogisasikhe.

³ Nen, it andi nen wam warogo hubet nolhu mene inom, hu'mokwe nolhu mene inom, linggene Sabat sambul warogo wogetu mene iluk inom, tugi ket mene weinam agunem Tuhan fogerati logolik warogo nolhu mene iluk inom, linggene hokho mene omanogoba kabogeti logolik nolhu mene iluk inom, Tuhan Awene melalek oba palek werek mene higithogo, at raja nen wam tati lagaikhe mene omanogo wogisilik lagaikhe.

⁴ Aren wogisasikhe mene omanogo werek kwelek he, yabu Tuhan Awi wuri'mo omanogo Tuhan awene melalek oba palogo fesukwama welagaikhe mene omanogo higithogo re, inendawinggenma nen tukhumet fuluk hilingiti logouwageluk he, yi mene ti mene it faget inenu warek mene omanogo waluk kabogesi wesuageluk at raja nen it afuni Yerusalem mene werek kwe omanogo yagaisoageluk wene wulafikhe.

⁵ Wene a'nogo wulafikhemo yagaisilik lagaukwama re, afuni Israel mene omanogo nen he it imam wogisugu mene iluk he inangge terigu inom, anggur inom, zaitun amusu inom, kin amusu inom kweang oba nen enggen ugu atta-attak palhukwa mene omanogo atta-attak inom, waluk wagik, iren nekhe mene it inangge meneba nen sogo nen pelabek a'nogo it faget fakhikhi logolik he, nomolongge mene a'nogo re waluk andoma fei wagik, hilingitukwa.

⁶ It afuni Yehuda mene werek kwe kota andoma welagaukwa mene omanogo mondogaren he it inanggo sapi inom, domba inom, andoma nomolo mene a'nogo inom yi mene ti mene fei lagu mene iluk fesukwa mene hokhorogo omanogo inomat, waluk ineisena Tuhan Allah faget iluk wogosi wagaukwa.

⁷ Iren fuluk fei lagu aple a'nogo tugi henaganek meneba erotukwasik he, fei wagu werek kwelek enek he tugi sabit enggeba hilinglasi lagaikhe.

⁸ A'nogo fei wagu mene omanogo mondok hokho-pokhorogo waluk wagu aple nen he at raja Hizkia inom, agoromi pegawai omanogo inomen he Tuhan enu legeisogo figik, At againafuri Israel mene a'nogo fogerinafik, isikhe.

⁹ It imam omanogo inom, it Lewi inap omanogo inom, inoba at raja a'nogo nen he afuni nen waluk waga lagaukwa mene omanogo faget wene ugunenem he,

¹⁰ at Imam Agung ekhe hun Zadok ambisangma mene enu Azarya a'nogo nen ikhi logolik he, ”At Tuhan nen he it afuni At againafuri a'nogo inoba fanot fisikhemo re, it afuni holhu mene nen Tuhan obaget fei logoin iluk fugu mene omanogo waluk o Tuhan Awi wuri'mo yoma fei wagaikha huli a'nogo nen he, nit nunggu mene nelerogo ekhe welagi'lek, ninoba homorogo logolik, yi mene ti mene mondok oba heilarogo welagoat andi o,” isikhe.

¹¹ A'nogo isikhemo re at raja nen wene melalek oba re, nomolo mene waluk wagaukwa mene inom, yi mene ti mene waluk wogisa wagaukwa mene omanogo inom,

¹² fuguba faget o Tuhan Awi wurik era'lukwe omanogo o gudang yi mene ti mene fugukwe wurik lagaukwa. A'nogo wurik lagaukwasik he ap Lewi mene misik ekhe enu re Kona andi nen halhi logouwageluk menfesikhesik he at agot Simei a'nogo re at lebethugu mene iluk fesikhe.

¹³ At raja Hizkia inom, imam Agung Azarya a'nogo inomen isukwa mene higithogo re, it pire aremnogo ina'ma re ap Lewi mene inebe 10 nen mene yabu hilingiti lagauwageluk fisasikhe mene inenu re: Yeiel, Azarya, Nahat, Asael, Yerimot, Yozabad, Eliel, Yismakhya, Mahat, Benanya inom andem, fisasikhe.

¹⁴ It afuni nen waluk Tuhan obaget fei waga lagaukwa mene omanogo waluk sumburinafi logouwageluk he, Kore, hun Yimna amlogo awi Lewi agun a'nogo o Tuhan Awi wuri'mo Kwe Ambe Hokho mene timur fikhit a'nogoba kagalek werek mene faget kepala welagaikhe agun a'nogo fesikhe.

¹⁵ It ap imam were'ma o kota amu kwe omanogo re at Kore lebethugu mene iluk he ap alek mene fisilik lagaukwa mene re yi: Eden, Minyamin, Yesua, Semaya, Amarya, Sekhanya inom, fisasikhe. A'nogo fisilik lagaikhemo iren, nunggungge omanogo it inebe yenggerugwi inom, inalue inom, it Lewi mene abirengge ineabu werek mene arem nogo higit-higit sumburogo hilingfuluk wogisikhi lagaukwa.

¹⁶ It ap enek inebe umur 30 tahun ambolkwe asi lagu mene linggene hundik-hundik o Tuhan Awi wuri'mo yabu hilingisi kwigik, wulifik hilingiti logouwageluk fisikhi lagaukwa mene omanogo ogore, it inebe ineabu lombok hilingik higithogo inebe kaboksek higit-higit nunggu mene sumburisikhi lagaukwa.

¹⁷ It ap Lewi inap inebe umur 20 tahun nen ambolkwe hilinglasi lagu mene omanogo re ineabu hilingik higithogo, inebe kaboksek higit-higit inenu palek welagaikhe, oba nen he, it imam enek he it ineisok erokwe hilingik higit-higit inenu palek welagaikhe.

¹⁸ It andi re Tuhan obaget yabu lenek mene hilingiti logouwageluk ekhe sambul ekhe sambul hundik-hundik omanogo fik-fouksek logolik welagaukwa andi nen he, it inebe inom, inagagwi inom, inagainafuri inom, ap alek mene it inom andoma werek mene inom, inenu palek welagaikhe.

¹⁹ It ap imam hun Harun ambisangma mene logogun kwe iluk o kota lenogo filik lagaikhe kwe andoma inom, o kota andoma alilu horok-horokwe lei kwe andoma inom, inanggelek kwe andoma inom, it ap imam ineisok erokwe omanogo mene ap mene nek inom, it inunggulenu Lewi mene nen inenu lisu palek mene nek inom, nunggu mene omanogo sumburogo wogisugunem helikhi logouwageluk he, ap sumburinafu mene fisilik lagaikhe.

²⁰ At raja Hizkia nen he o it afuni Yehuda mene werekwe omanogo mondogat he wene higit mene nek hilingitik, henarogo hilingiti'legengge pikhithogo nek hilingitik, at eisena Tuhan Allah a'nogo endawimo agaiyek hoageluk mene nek hilingitik, hilingiti lagaikhe.

²¹ Aren he O Tuhan Awi wurik a'nogo faget hilingiti logolik ogo, athe Tuhan Awene melalek werek mene a'nogo faget hilingiti loglik ogo, eisena Tuhan Allah a'nogoba mondok endawi hundik logolik, endawinggen oba himbirik logolik hilingiti lagaikhemo re ambisangma mondok fano mene nek asi laga lagaikhe.