2 TAWARIKH 30 - Allah Wene Fano Wene Hupla Inane

Seni Paskah isasugun iluk fougetukwa wene

^1-5 It ap imam omanogo inebe enogo fakhasukwa mene re mondok endebat welagaukwa, nen it afuni ogo oan hokhorogo o Yerusalem kabogesi wagu mene lek en he, it afuni a'nogo nen seni Paskah isatu mene a'nogo re tugi attak-attak mene a'nogoba re isatukwa lek. Andiba re at raja Hizkia inom, at agoromi pegawai inom, it afuni o Yerusalem oba andoma welagaukwa mene inomen he, seni Paskah andi re tugi pirenek meneba isasugun iluk he wene inane misik seberogo matukwasik, andi nek he fano hilingisugun iluk inagaiyek anggasukwa. Andi anggasukwasik he at Raja nen it afuni mondogat omanogo o Yerusalem o Tuhan Awi wuri'mo omanogo kabogesi we'luk, at Musa nen wene melalek a'nogoba enegenggerogo werek mene a'nogo higithogo seni Paskah isatik, afuni Israel mene ineisena Tuhan Allah a'nogo along anggaluk apne wanhik, hilingisi wesuageluk he yonggo fesikhe. Nen aren yonggo fesikhe kwe andi re, it afuni Israel mene werekwe mondogat inom, it afuni Yehuda mene werekwe mondogat inom, andi nen it Menasye, Efraim inap inom, it afuni inunggulenu Israel mene were'ma wilayah abel ambolkwe utara fikhit mene re it inunggulenu Dan mene werek huli nen he abel a'makwe selatan fikhit he o Bet-Syeba abel malikwe huli andoma surat palogo yonggo wulafikhe. Seni isatukwa mene andi higit he ekhe istukwa lek mene.

⁶ A'nogo yonggo filik laga logolik he, at raja awene melalek oba re surat palek a'nogo waluk it afuni Israel mene werek kwe inom, it Yehuda mene werek kwe inom agoromi pegawai omanogo yonggo wulaginafikhe. Iren surat waluk lagaukwa mene andiba re ane yi'nogo palek welagaikhe: ”Hit afuni Israel mene nagainafuri! Hit he it afuni Asyur mene inenggi omameba nen obogerisaluk wulibi wagagip mene a'nogo, At Tuhan nen nekhengge hit lebethinafi logouwakhogo re, yogondak he it Abraham Ishak, Yakub inom, en apne wanhi lagaukwa mene hineisena Tuhan Allah a'nogo obaget enek hilingiti logobagaigen sugulogo we'ni o.

⁷ Hit he it hinamulik Israel mene fena nen it hineisena Tuhan Allah a'nogo ba tiphogo hilingiti'legengge hilingitu nen Tuhan nen wene enggin hokho mene inoba fesikhe mene a'nogo re hiren hineilenggen tomok hasigibat.

⁸ Enggere iren inunggul oak helep a'luk hilingiti lagaukwa andi hakhogo hilingitu aple herakfuluk he, Tuhan ane hologo nek hilingiti logogun nen he, At along werek mene andi endep liok uakhogo re, At oba wene kabogesuogen we'ni o. O Yerusalem Tuhan Awi wuri'mo, At Tuhan Allah onggwaregen wene mondok-mondok logogin mene faget enogo fakhasikheba omanogo we'no o.

⁹ Hiren At oba sugulogo wasugun halok he, hit hineisena Tuhan Allah andi re mondok fano agun logolik, endawi hundik hilinginaferek mene hilingi'mo re Aren hit hinebe wokhinabigin o. Nen hiren sugulogo At Tuhan obaget enek hilingisugun halok he, it afuni hit hinerugwi hinagaila'lak hele warogo woginarek lagaikhaba nen ogore, it afuni andoma nen inendawirinabimbik he, hinaiba hinambotkwe lani iluk yagaisamo nekhengge wesugun o,” iluk palek welagaikhe.

¹⁰ A'nogo palek engge a'nogo it lakfisasikhe mene omanogo nen waluk o kota wilayah inunggulenu Efraim mene werek kwe inom, Manasye mene werek kwe inom, lagaukwasik he abel ambolkwe utara fikhit po'lima wilayah it inunggulenu Zebulon mene werekwe andoma lagaukwama nen he, it afuni omanogo mondogaren he pilip inafi logolik he, endo yaginafukwa.

¹¹ Oba nen he it fenakwe inunggulenu Asyer mene inom, Manasye mene inom, Zebulon mene inom, o Yerusalem wesugun inamolo mene ogo welagaukwaat.

¹² At raja inom it agoromi pegawai inom he wene melalogo wulafikhe mene a'nogo, higithogo hilingisuageluk he At Allah nen he it afuni Yehuda meneba welagaukwa mene omanogo inendawinggen misik asuageluk hilingfisasikhe.

Seni Paskah ebe isatukwa wene

¹³ Tugi pirenek enggeba re, afuni inebe mondok hokhorogo Linggene roti fitunggeba Werago lek mene nunggu sambul iluk kabogeti lagaukwa mene a'nogo faget kabogesuogeluk logolik, o Yerusalem kabogesi wagaukwa.

¹⁴ It a'nogo kabogesi wagaukwasik iren he o Yerusalem andoma kembu dewa obaget wam warogo noletik, amep fanongge hilingiti lagaukwaba mezbah omanogo mondogat hambokhogo waluk he o Lembah Kidron omanogo hugesi lagik isukwa.

¹⁵ A'nogo hilingitukwama re it imam inom, Lewi inap inom, inebe alomat lagaukwa mene a'nogo re mondogat inenggali agaikhemo, iren he Tuhan Awi wuri'mo omanogo wam warogo nolhungge iluk he inebe enogo horogo fakhasukwa. A'nogo hilingfakhasukwama re it afuni a'nogo nen he tugi a'nogo mene werek kwelek tanggal 14 oba re seni Paskah faget iluk domba hokhorogo warogo fei wagaukwa.

¹⁶ Fei wagaukwasik he wene melalek buku hun Musa nen palogo fesikhe mene a'nogoba werek mene higithogo re o Tuhan Awi wuri'mo a'nogo inobalik higithogo inebe lombok mikhilik lagaukwa. Nen, wam watukwa mene omanogo amep he it Lewi inaben he it imam omanogo inoba wogisasukwama re, iren he mezbah wurik mene a'nogo ebene kweisal isilik lagaukwa.

¹⁷ It afuni hokhorogo andoma kabogesi lagaukwa mene andi re inebe oan enogo fakhigi'legengge lagaukwama re, domba Paskah faget a'nogo warogo fei la re elo'lek hilingigen he, it ap Lewi mene nen it omanogo fanot fisoageluk inobaget hilingiti logolik he Tuhan obaget warogo noletukwa.

¹⁸ Nen it andoma a'nogo hilingitukwaba nen he it inunggulenu Efraim inap, Manasye inap, Isakhar inap, Zebulon inap, inebe oan enogo fakhigi'legengge wagaukwasik he, iren Paskah a'nogo hilingitu mene faget awene melalek werek mene a'nogo higithogo hilingisu elo'lek agaikhemo re at Raja Hizkia nen it inobaget samban ikhi logolik he,

¹⁹ ”Neisena Tuhan Allah nit ninombawi nen foget hafi lagaukwa mene neisena, it ap yi re inebe oan enogo fakhigi'lek wagaikhasigen, Hat hoba inendawinggen tibet fagasik inebe mondogat seberogo kabogeta andi nen he, Hat hendawi fano nen hilingiti lagen mene a'nogo it inaweak honggorabethogo fisan o neisena,” iluk samban isikhe.

²⁰ A'nogo samban isikhemo re At Tuhan nen he Hizkia nen samban isikhe mene a'nogo esanggo holhikhesik he, afuni a'nogo unggum inoba figi'lek herak fesikhe.

²¹ Linggene Roti Fiterek Lek meneba werago nunggu sambul a'nogo ebeti logolik, o Yerusalem kabogetukwasik a'nogo re linggene 7 nen andiba it afuni a'nogo inagaiyekhogo hilingiti lagaukwa. A'nogo kabogeti logolik omanogo re linggene hundik-hundik it afuni Lewi mene inom, it imam inom, inendawinggen ibi-eberogo nen Tuhan oba fogeratukwa.

²² A'nogo hilingiti logolik he, it ap Lewi inap andi re, wene kabogetuba melalinafu mene faget mondok inelu pinelurek logolik hilingitu nen he at Hizkia nen it omanogo fogerinafi lagaikhe. Linggene 7 nen mene a'nogoba it inambu inombalak ineisena Tuhan Allah a'nogo hai wati logolik, iluk wam warogo wogetik, iren linggene a'nogo faget ebeti logolik isago ninggik, hilingiti lagaukwasigen he,

Seni Paskah andi hobuk pirenek mene hilingitukwa wene.

²³ it inebe abirengge a'nogo nen he linggene 7 nen ekhe inom altap pirenek mene ekhe kabogeti logogun iluk inane misik seberogo tegetukwa. A'nogo isukwasik he it a'nogo inendawimo hairogo nek kabogeti lagaukwa.

²⁴ A'nogo kabogetunem he, it afuni a'nogo wam watu mene inom, nen warogo it nunggu mene inom, at raja Hizkia nen he sapi ai mene 1.000 nen inom, domba re 7.000 nen inom, wogisasikhe. It pegawai Hizkia agoromi omanogo nen he sapi ai mene re 1.000 nen inom, domba 10.000 nen inom, wogisasukwa. Andem oba re it ap imam inebe logalogo enogo fakhasukwa.

²⁵ A'nogo hilingitunem he it afuni Yehuda mene inom, imam inom, it Lewi inap inom, it afuni utara fikhit en pi wagaukwa mene inom, it inebe pok meneba nen it afuni Israel mene werek kwe welagaukwa mene inom, Yehuda mene werek kwe mene inom, inanggele'ma femhogo welagaukwa mene omanogo mondogat inagaiyek hasukwa.

²⁶ At hun Daud amlogo Salomo a'nogo welagaikhe huli nen engge wene ariginik mene ekhe o Yerusalem oba andoma aga lagaikhe lek oba nen he andi sambul enek he a'nogo hilinglagaikhemo re anggiluk enek agaikhe andi.

²⁷ It ap imam omanogo inom, it Lewi inap inomen he, afuni omanogo faget Tuhan nen fanot fisoageluk kino yagatikhemo re At Allah ebe were'ma pogoroba omanogo nen esanggo holhikhesik he, iren kino yagatukwa mene a'nogo re wanhikhe andi.