2 TAWARIKH 3 - Allah Wene Fano Wene Hupla Inane

¹ O Tuhan Awi a'nogo ebe wusugun oba faget he, at Daud en, ”O Yerusalem Tom Moriaba hun Arauna awi Yebus agun a'nogo nen gandum enggen lolhi lagaikheba andem wusugun,” iluk tukhumet fesikhe. O Tuhan Awi andi ebe wusigin mene re,

² at Salomo raja menlagaikhe huli nen he tahun enggaminogonek engge, tugi pirenek mene werek kwelek, at raja Salomo nen erotikhe.

³ O andi ebe uankwe re 27 meter en, nen nunggulik mene re 9 meter en walethasikhe.

⁴ O senggelek elokhe fikhit mene a'nogo re elonggo wogolore o ebe nunggulik walhasikhe mene andi hakhogo 9 meter walethasikhe. Liabek mene re 54 meter en walhogo fesikhe. O andi elonggo lokwe re emas eil wurik weak meneba to'mothigik wutikhe.

⁵ O senggelek hokho mene a'nogoba re, e laik fano meneba inom, emas eil wurik meneba to'mothigik wutikhe. Emas to'mothigik wutikhe mene andi elokhokwe re e lua hak mene inom, posiemanggen elanghogo sep hun-hun hilingik hangge inom, hesesengge wokhigik wutikhe.

⁶ Hun raja a'nogo nen he o a'nogo faget helep permata onggo hokho meneba hunitarek engge inom, emas o Parwaim kweang oba andoma nen waluk waga lagaukwa mene inom, omanogoba to'mothigik wutikhe.

⁷ Aren he o Tuhan Awi a'nogo obakhe ebene inom, e balok liabek mene ebene inom, kwe sou oba e nunggulik mene ebene inom he, no emas a'nogoba to'mothigik wutikhe. Andi hilingfuluk he o obakhe ebene a'nogo re enu kerub andi ilirenggerogo hesesengge wokhigik wutikhe.

⁸ O ambe senggelek fem elonggoma mene a'nogoba re, Senggelek Mondok Horek mene ekhe were'ma, senggelek andi uankwe re 9 meter hilingfesikhe, nen horokwe re 9 meter hilingfesikheat. Nen, O Senggelek Mondok Horek mene a'nogo obakhe ebene re emas enggin 20 ton meneba labetikhe.

⁹ Nen, paku faget he, no emas meneba enggin 570 gram en wutikhe. Ambe ekhe senggelek henambo meneba obakhe ebene omanogo re emas oba to'mothigik wutikheat.

^10-13 At raja a'nogo nen it ap yabu hilingitu mene omanogo inoba re no logam meneba inagerabul werek mene hilingik mene enu kerub andi ilirengge pire mene wu'ni iluk yagaisasikhe. A'nogo yagaisasikhemo re iren ilirengge aremnogo emas oba to'morogo wutukwasik he O Senggelek Mondok Hore'ma a'nogo elonggoma erarogo elokhe kwe kagarek fikhit hilingisogo fesukwa. Kerub andem ebe lombok inagerabul wurep he 2,2 meter en hilingisogo fesukwa. It inagerabul pirenet arem nogo re lang se'ma re, ekhe wurep en he ekhe wurep inom wut warogo, nen inagerabul fena nen he o hobat oba hekhogo hilingisogo fesukwa. Andi nen it inogolabi andem he o ambe a'nogo elonggo 9 meter wogolek aple higithogo langhogo hilingik welagaikhe.

¹⁴ O Senggelek Mondok Hore'ma a'nogo faget he kain porogo pelafu mene kain linen meneba, eil mep mene inom, ungu meneba inom, enggen eil hak meneba inom, igisogo fesukwa. A'nogo itukwasik he kain a'nogo ebene alilingge re kerub ilirenggerogo hilingfilik lagaukwa.

O timuk pire hokho mene no perunggu meneba hilingisogo wutukwa wene

¹⁵ O Tuhan Awi a'nogo elokhoma liagaisogo fugu mene faget he, at raja a'nogo nen he lang oak hakhogo o timuk ebe pirenet engge, wurep uwan hogore 15,5 meter emberek higithogo nek hilingisogo liafukwa. Timuk andem ebe lombok unggul hilingi'mo re, ebe uanhogo liabek welagaikhe mene re 2,2 meter en hilingik welagaikhe.

¹⁶ Timuk aremnogo ambol ebene re pirunggu oba elokhe fanorogo pugunhogo re, e delima enggen 100 nen ugu mene hakhogo mindakhigik fesukwa.

¹⁷ A'nogo hilingitukwasik he timuk aremnogo o Tuhan Awi wuri'mo kwe kwi wagu fikhit aremnogo ekhe pikhit fikhit nen ekhere harekwe fikhit fesukwa, a'nogo menogo fesukwasik he selatan fikhit telek welagaikhe mene a'nogo enu re Yakhin, nen utara fikhit a'nogo re enu Boas iluk salfesukwa.