2 TAWARIKH 29 - Allah Wene Fano Wene Hupla Inane

Afuni Yehuda mene faget Hizkia raja menlagaikhe wene

¹ At Hizkia a'nogo re ebe umur 25 tahun werek kwelek it afuni Yehuda mene inobaget raja menlagaikhesik he, o Yerusalem oba andoma 29 tahun logolik melalinafu welagaikhe. At Hizkia agaisa re Abia hun Zakharia a'logo a'nogo.

² At Hizkia nen he ambu Daud en hilingiti lagaikhe hakhogo re, aren ogo Tuhan endawimo agaiyek anggikherek mene nek hilingiti lagaikhe.

At Hizkia nen Tuhan Awi wurik a'nogo pugunhogo enogo fesikhe wene

³ At Hizkia raja menlagaikhesik melalinafi lagaikheba tahun fem attak-attak mene a'nogoba tugi misik werek kwelek he, at Hizkia nen Tuhan Awi wurik a'nogo kwe hutikhesik pugune'ni iluk afuni yagaisasikhe.

⁴ It imam inom, it Lewi inap inom, he o Tuhan Awi wuri'mo ambe elokhoma senggelek mo lagai wagarek fikhit mene a'nogoba kabogesi we'ni iluk yagaisasikhemo, it a'nogo kabogesi wagaukwa ma re,

⁵ andoma nen it inom wene ane mati lagaukwa. Aren yagaisikhi logolik he, ”Hit ap Lewi mene re, hit hinambu hinombalak ineisena Tuhan Allah a'nogo Awi wurik horogo enogo figik, yi mene ti mene mondogat alomat laga mene andoma waganogo wulak fisigik, hilingisubagaigen he, hit hinebe Tuhan obaget enogo fakhani.

⁶ Nit ninombawi nen Tuhan oba tiphogo hilingiti legengge hilingitik, At Tuhan endawimo anggikherek lek mene nek hilingitik, hilingiti lagaukwa. A'nogo hilingiti logolik he iren at oba fut figi'legengge re, At ebe were'ma a'nogo hesanggema teisal figik, hilingiti lagaukwa.

⁷ Iren he Tuhan Awi wuri'mo a'nogo amben fanongge nolhi legengge hilingitik, Allah it afuni Israel mene nen apne wanhi lagaukwa mene a'nogo obaget wam warogo noleti'legengge welagik, o elonggoma lampu a'nogo nagul isigik, o Tuhan Awi a'nogo kwe sou omanogo mondogat yagarik lagik, hilingitukwa.

⁸ Andiba re Tuhan a'mage nen it afuni Yehuda mene inom, Yerusalem mene inom, wene inoba fisikhe. Inoba fisikhemo afuni mondogat youk lagaukwasik he inalilip en hilingitukwa mene a'nogo re hit ogo hinelurek.

⁹ Nen nit nineisugwi re weim yafi logolik inebe mondogat inoatik, it inagagwi inom inagainafuri inom he hele warogo woginarek lagik isukwa.

¹⁰ A'nogo hilinglagaikhe andi nen he, yogondak he At Tuhan Allah nen nit ninoba ekhe inom a'mage fei nogo re, an nen hit afuni Israel mene ineisena Tuhan Allah a'nogo inom wene wati lagi yi.

¹¹ Nagainafuri e, hit he Tuhan obaget wene kabogetik, At obaget enek hilingitik, amben fanongge a'nogo noletik, it afuni holhu mene wene kabogetuba melalinafik, hilingiti logouwageluk At Tuhan nen wenakhinafemo re, hiren higilik-higilik la fuk,” iluk yagaisasikhe.

^12-14 Andi sambul it Lewi inap kabogesi wagaukwa mene inebe re yi: Inunggulenu Kehat meneba nen he: Hun Amasai amlogo Mahat a'nogo inom, hun Azarya amlogo Yoel a'nogo inom, Inunggulenu Marari meneba nen he: Hun Kish amlogo Abdi a'nogo inom, hun Yahaleleel amlogo Azarya a'nogo inom, Inunggulenu Gerson meneba nen he: Hun Zima amlogo Yoah a'nogo inom, Yoah amlogo Eden a'nogo inom, Inunggulenu Elisafan meneba nen he: Hun Yeiel inom Simbri inom, Inunggulenu Asaf meneba nen he: Zakharia inom Matanya inom andem, Inunggulenu Heman mene nen he: Yeiel inom, Simei inom andem, Inunggulenu Yedutun meneba nen he: Semaya inom, Uziel inom andem kabogesi wagaukwa.

^15-16 A'nogo kabogesi wagaukwasik he iren he inagaila'lak Lewi mene fenakwe ekhe inom andogerinafukwasik he inebe mondogat enogo fakhasukwa. A'nogo hilingitukwasik he, At Tuhan Awi wuri'mo puguneti lagaukwa. O andi elonggoma andoma nen mondogat alomat lagaikhe mene omanogo re Tuhan awililu omanogo waganogo wulakfei wagaukwasik he, andoma nen he it ap Lewi inap a'nogo nen waluk he o kota endakwe fikhit o Lembah Kidron andoma fei lagaukwa.

¹⁷ Tugi misik werek kwelek tanggal satu ba re yabu andi hilingitu mene erotukwasik he, o Tuhan Awi wurik a'nogo abirengge inom, elokhoma o wene kabogetuba elonggo wogologo wuri'mo a'nogo inom he tanggal 8 huli mondogat pugun etukwa. A'nogo hilingitukwasik en he inenggi sirek ekhe inom oba re o a'nogo abirengge pugunetukwasik he tanggal 16 huli re mondogat kofokhogo hilingitukwa.

O Tuhan Awi wurik a'nogo nekhengge wogetukwa wene

¹⁸ A'nogo hilingitukwasik he it ap Lewi inap a'nogo nen he raja Hizkiaba eluabet fikhi logolik he, ”Nit he o Tuhan Awi elonggoma nen wam warogo nolhungge mezbah a'nogo inom, roti enu warek weragaisogo fei waguba meja a'nogo inom, yi mene ti mene elonggoma andoma hilingiti logouwageluk werek engge omanogo inom, o Tuhan Awi ebe abirengge inom, mondogat puguneto o.

¹⁹ Hun raja Ahas nen melalinafi lagaikheba aremnogo Tuhan ane puliabet fuluk yi mene ti mene wokhigik wulafukwa mene omanogo ogore niren obali'mo mondogat fei wago. Nen yi mene ti mene hilingitungge andoma re niren o Tuhan obaget iluk enogo fogosik he, nolengge nolhuba mezbah wurik a'nogo were'ma nen elokhoma andem fogo,” iluk yagasi kwisukwa.

²⁰ A'nogo yagatukwama re at raja Hizkia a'nogo aninurogo hilingitu mene a'nogo herakfuluk he, it afuni inogogwi kaindek-kaindek a'nogo hondok isasikhesik he inom o Tuhan Awi wuri'mo a'nogo lagaukwa.

²¹ A'nogo laga logolik a'nogo re, iren he wam it raja eisok erokwe mene inom it afuni Yehuda mene mondogat inaweak legaphogo fouwageluk mene faget inom, Tuhan Awi a'nogo mondok enogo fugu mene faget iluk inom, he wam sapi ai mene ebe 7 nen inom domba ai mene 7 nenat inom, domba eagwi mene 7 nen inom kambing ai mene 7 nen inom, waluk lagaukwa. Waluk lagaukwasik he it imam omanogo inoba raja nen he wam omanogo warogo nolengge nolhuba mezbah wuri'mo omanogo noluageluk miming inafikhe.

²² A'nogo miming inafukwama re wam sapi omanogo watukwasik he it imam en he amep omanogo waganogo re wam warogo nolhukwe mezbah a'nogo bene kweisalhukwa. Iren he domba 7 nen omanogo inom, domba eagwi 7 nen omanogo inom ogore a'nogo nek hilingitukwa.

²³ A'nogo hilingitukwasik he wurep oba re iren wam kambing aremnogo waluk he, it afuni a'nogo inom, at raja inom, samban ugunem lagaukwasik he it inebe abirengge a'nogo nen he inenggi kambing omanogoba sebeli lagaukwa.

²⁴ A'nogo hilingfuluk he at raja nen melalinafi logolik he, it afuni Israel mene inebe mondok faget wam inaweak legaphogo fouwageluk mene inom, wam warogo nolengge nolhu mene inom wasugun iluk yagaisasikhemo re, a'nogo higithogo, kambing omanogo watukwasik he amep he it imam omanogo nen it afuni abirengge inaweak legaphogo iluk he mezbah wurik oba a'nogo kweisal fesukwa.

²⁵ A'nogo hilingitukwasik he At Tuhan nen nabi Gad fene nen inom, nabi Natan at raja faget yabu hilingiti lagaikhe mene a'nogo bene nen inom, yi'nogo hilingi'no ti'nogo hilingi'no iluk hun Daud yagatikhe mene a'nogo higithogo re, at raja nen he it Lewi mene a'nogo Tuhan Awi wuri'mo omanogo pinggong kecapi inom, gambus inom, at Daud en hilingiti lagaikhe hakhogo wati logouwageluk fisasikhe.

²⁶ It imam inap ogore trompet a'nogo futi logouwageluk andoma fisasikhe.

²⁷ A'nogo fisasikhesik he, iren wam warogo nolhu mene a'nogo erorasuageluk he, at Hizkia nen enegengge ekhe hilingitikhemo re, it afuni a'nogo re wuni Tuhan fogeratu awuni omanogo watunem he, it ap pinggong watu inap omanogo re trompet futik, pinggong yinik-hunik mene omanogoba watik, hilingiti lagaukwa.

^28-29 It wuni wulafu inap omanogo re wuni wulafi logolik werek kwelek he, it pinggong watu inap omanogo re pinggong watu mondok were'ma re at raja Hizkia inom, it afuni mondogat andoma welagaukwa mene inom he, Tuhan a'ma sebe uluk fogeratu kwelek enek he wam warogo noletukwa mene omanogo mondogat endu nen felelenghogo nasikhe.

³⁰ It afuni holhu mene inogogwi omanogo inom, at raja inomen he wuni at raja Daud en felalhikhe mene inom, hun nabi Asaf en felalhikhe mene inom, wuni Tuhan obaget fogeratu awuni omanogo it ap Lewi inaben wulabuageluk yagaisasukwama iren wuni omanogo wulagaisogo watu kwelek he, it ap mondogat a'nogo re wuni inagaiyek oba wati logolik he, ineindep awi yagaisogo Allah apne wanhi lagaukwa.

³¹ A'nogo hilingitukwasik he at Hizkia nen ikhi logolik he, ”Yogondak he hit he Tuhan obaget enogo hinobagogoma re, hiren Tuhan hai warogo hakhogo re wam waluk Tuhan Awi wuri'mo fei wesugun,” iluk yagaisasikhe. A'nogo yagaisasikhemo re it afuni hokhorogo andoma kabogesi lagaukwa mene omanogo nen Tuhan obaget fugungge omanogo waluk fei laga logolik he, iren fena wam inendawi inagaiyek oba Tuhan obaget nolengge warogo nolhu mene iluk mene ogo fei lagaukwaat.

³² Iren waluk lagaukwangge andoma re, sapi ai mene ebe 70 nen inom, domba 100 nen inom, domba eagwi 200 nen inom, waluk Tuhan obaget warogo nolesi lagaukwa.

³³ Iren he afuni inebe mondogat andem kabogesi lagaukwa mene omanogo nen nunggu mene faget inom, ambine fugu mene faget iluk inom he wam sapi ai mene ebe 600 nen inom, domba 3.000 nen inom, waluk lagaukwa.

³⁴ A'nogo fei lagaukwama re it ap imam inonggwaregen enogo horogo fakhasukwa mene re wam omanogo agap nonggolhu mene faget inebe mondok endebengge nen he, it ap Lewi inap andi re yi mene ti mene hotu mene faget mondok tiphogo nek hilingiti lagaukwama re iren leberinafukwa. It Lewi inap a'nogo nen it imam omanogo leberinafu werek kwelek enek he it ap imam fenakwe inonggwaregen inebe horogo enogo fakhaluk wagunem enek he herak fisikhi lagaukwa.

³⁵ Iren wam warogo nolengge nolhukwa mene omanogo werek kwelek oba nen he, it afuni kabogesi lagaukwa mene a'nogo nunggu mene iluk isatukwa mene nen sei omanogo ogo it imam en Tuhan obaget fesukwa. Iren ogore wam warogo nolegengge a'nogo nolhi logolik ambine kweisalhu mene iluk he anggur inom fei lagaukwa. A'nogo hilingitukwasik he iren o Tuhan Awi wuri'mo a'nogo wene kabogetu mene hobuk erotukwa andi.

³⁶ Linggene eil misik oba nek mondogat andi hilingisuageluk Allah nen leberinafikhe mo re it afuni holhu mene omanogo inom, at raja Hizkia inom, inendawimo inagaiyek enek agaukwa andi.