2 TAWARIKH 28 - Allah Wene Fano Wene Hupla Inane

It afuni Yehuda mene faget Ahas raja menlagaikhe wene

¹ Hun Ahas a'nogo re at ebe umur 20 tahun were'ma raja menlagaikhesik he, o Yerusalem oba andoma 16 tahun mendek logolik melalinafu welagaikhe. At ebere ambu hun raja Daud en fano hilingirik laga lagaikhe hakhogo hilingiti'legengge re, Tuhan endawimo weak ugu mane nek hilingiti lagaikhe.

² At he it afuni Israel mene faget inogogwi raja mendek welagaukwa mene andoma hakhogo logolik he, aren kembu Baal a'nogo alik hilingik logam meneba wusuageluk yagaisigik,

³ amben fanongge o Hinom Tonggoma andoma nolhik, hilingitikhe. It afuni Israel mene o Kanaan kwi laga logolik, afuni andoma welagaukwa mene At Tuhan nen mugusogo wulakfisasikhe mene omanogo nen inetokhogo, kembu faget inonggwarek inomalik warogo woge'luk fogerati lagaukwa hakhogo, onggwarek omalik warogo kembu faget noletik, hilingiti lagaikheat.

⁴ At Ahas nen he nolengge noletungge inom, amben fanongge inom, tomkwe, e hokho enggi talek mene erokwe omanogo, kembu dewa a'nogo apne wanhu kwe andoma fei laga lagaikhe.

It afuni Siria mene inom Israel mene inom weim yafukwa wene

^5-6 It afuni Yehuda mene nen he Tuhan awene melalek a'nogo fut figi'lek engge hilingitik, it inambu inombalak ineisena Tuhan Allah a'nogo herakfuluk hilingitik, hilingitu aple nen he, At Tuhan nen hun Pekah Ramalya amlogo raja Israel mene a'nogo nen mabenet fisoageluk eilenggen fesikhemo re, linggene misik sambul enek he, tentara Yehuda inap inailo mondok lek mene nek inebe 120.000 nen mene inoatukwa. Nen at raja Ahas a'nogo re weak mondok kwanirek mene nek hilingitu nen he, raja Siria mene nen mabenet fouwageluk Tuhan nen herakfesikhemo re, at a'nogo mebenet fuluk he afuni Yehuda mene mondok hokho-pokhorogo tok ambisangma mene iluk felelenghogo woginarek he o Damsyik lagaukwa.

⁷ A'nogo hilingiti logolik he, hun Ahas amlogo Maaseya a'nogo ogore hun Zikhri ap Israel mene inoe perwira ekhe nen watikhe. At nekhe agun andi nenat he ap o raja werek oba faget wene palhi lagaikhe agun hun Azrikam a'nogo inom, at raja enggi ebekwe mene hun Elkana a'nogo inom inoatikheat.

⁸ It afuni Yehuda mene andi re it Israel mene inom he inunggulenu misik meneba nen he, it tentara Israel mene nen he it Yehuda mene omanogo hemi inom yenggerugwi magendek mene inom inebe lambulogo re 200.000 nen mene hele warinafukwasik he, inangge yi mene ti mene telasukwa mene omanogo inom, hogoukhogo woginarek he o Samaria lagaukwa.

Nabi Oded en hilingitikhe wene

⁹ O kota Samaria oba andoma nabi misik ekhe enu Oded andi welagaikhe. At andi were'ma nen he it tentara Israel mene omanogo re weim yabi lagaukwasik afuni Yehuda mene hele warinarek wagaukwasik he, it a'nogo o kota kwi wesugun iluk hilingitunemen he at Oded a'nogo it inom ambi agaukwa. Ambi agaukwasik he aren ikhi logolik, ”Hit hinambu-hinombalak ineisena Tuhan Allah a'nogo nen it afuni Yehuda mene inoba anini fikhemo re, hiren it afuni Yehuda mene mabenet fisa lagep andi. Oba nen he hiren it tentara Yehuda mene andi mondok elo'lekhogo inoatunem At Tuhan nen esanggo holhe andi.

¹⁰ Afuni Yehuda mene inom, Yerusalem mene inom, omanogo yogondak hiren hinamingmingenggeap eregepma re, hirogo At hineisena Tuhan Allah eilhanem weak hilingito lek iluk anggegepsik hilingiti lageba? Hiren hilingitep andoma re weak meneat hilingitebo.

¹¹ Hit he hinesanggo fanorogo holini! Afuni hele warinarek wagep mene yi re hit hinonggwarek hinagaila'lak mene hilingi'mo re inaiba loakhogo yagaisani! Nen, hiren a'nogo hilingisugun lek halok he At Tuhan anini hit hinoba fembik unggum wokhisagain o,” iluk yagaisasikhe.

¹² Aren a'nogo yagaisugu kwelek aremnogo re it afuni Israel mene inogogwi kaindek elokhoma mene inebe enggaminogo mene inenu re: hun Yohanan amlogo Azarya inom, hun Mesilemot amlogo Berekhya a'nogo inom, hun Salum amlogo Yehizkia a'nogo inom, hun Hadlai amlogo Amasa a'nogo inom, en he it tentara Israel mene nen hilingiti lagaukwa mene andi faget he kwe mondok palhukwasik he,

¹³ iren ikhi logolik he, ”Nit he Tuhan elokhoma weak hilingitoma o, ninaweak hokho andi nen unggum ninoba fou hak hilingi'mo re, ap hele warinarek wagep mene andi re yoma woginarek wagup! Yogondak hiren hilingiti lagep mene andi re niren hilingitu aple weak mene ekhe inom oba louk uageluk hilingiti lageba?” Iluk yagaisasukwa.

¹⁴ A'nogo yagaisasikhemo re, it ap tentara omanogo nen he it hemi, yenggerugwi hele warinarek wagaukwa mene omanogo inom, inangge telaluk wagaukwa mene omanogo inom he, it afuni holhu mene inom, it inogogwi melalinafarek mene omanogo inom, inenggiba fesukwa.

¹⁵ A'nogo wogisasikhemo re it ap inebe enggaminogo mene aremnogo menlagaukwasik he it hemi hele warinarek wagaukwa mene omanogo halinafi lagaukwa. Iren halinafi logolik he, yi mene ti mene teluk wagaukwa mene omanogo re it hemi mondogat hinelagaik mene omanogo sumburogo wogisasukwa. Inamburu inom inagai inom, inangge sepatu inom sumburisigik, it hele warinarek wagaukwa mene omanogo nen inebene inoumo werek mene omanogo re e zaitun amusuba fano hilinginafik, ineisok kwe lagu aple ilimit agaukwa mene omanogo no keledai amboloba liakfisigik, hilingfisasukwasik he, it inebe inawi eroma o Yehudaba omanogo loageluk he hemi hele warinarek wagaukwa mene omanogo re mondogat woginarek he o Yerikho e kurma eroma agarek oba a'nogo fisa wagaukwa. A'nogo fisa wagaukwasik he it afuni Israel mene a'nogo inaiba o Samaria lagaukwa.

At Ahas nen it Asyur mene nen lebetnabi wesuageluk kinotikhe wene

^16-17 It afuni Edom inap omanogo re weim hobuk erotukwasik o Yehuda pin kwi wagaukwasik afuni hokhorogo hele warinarek lagu nen he, at raja Ahas nen an lebetnea we'no iluk, raja Asyur mene enu Tiglat-Pileser a'nogoba yonggo lakfesikhe.

¹⁸ Nen, andem oba ogore it Filistin mene nen he o it afuni Yehuda mene were'ma nen abel a'makwe selatan fikhit omanogo inom, o kota mo liabi wagarek fikhiren tom a'makwe werek mene omanogo inom, oba andoma pin kwi wagaukwasik he iren o kota Bet-Semes, Ayalon, Gederot, inom o kota era'lukwe mene Sokho, Timna, Gomzo inom, nen o sili endep-endebengge welagaikhe kwe omanogo inom, sebeli kwi wagaukwasik he, andoma femhogo welagaukwa.

¹⁹ At raja Ahas a'nogo nen he Tuhan onggoret figik, afuni holhu mene omanogo mondogat wiik-weakhogo hilingfisigik, hilingitu aple nen he it afuni Yehuda mene were'ma omanogo Tuhan nen enggin-fenggin inoba lakfei wagaikhe.

²⁰ A'nogo were'ma re raja Asyur mene wagaikhe andi re hun Ahas lebethagain iluk wagaikhe lek oba nen he we enggin mene at oba fagain iluk wagaikhe.

²¹ A'nogo waga lagaikhemo re at Ahas nen ningginik-ningginik he o Tuhan awi wuri'mo omanogo emas werek mene inom, at raja aiba omanogo mene inom, it inogogwi kaindek inailokwe omanogo nen inom wanhikhesik he at raja Asyur mene a'nogo wogetikheba nen he, Ahas nen wogetikhe mene aremnogo faget he raja Asyur mene a'nogo nen he enggin oba mene a'nogo aremnogo inom higit anggasikhe lek.

Ahas aweak hilingiti lagaikhe wene

²² Enggin fenggin a'nogo hilingi'mo aremnogo re at Ahas nen Tuhan elokhoma weak mene nek hilingitu mene omanogo re ekhe inomat hilingitu welagaikhe.

²³ Aren anggikhi logolik he, ”O Siriaba kembu dewa werek mene andoma nen he it ap raja Siria mene ogo leberina fikhengge a'nogo re, an nen wam warogo wogosi lagain halok he, an ogo elok lebetneagain iluk anggasikhesik he it Siria inap at ebe mabenet fesukwa mene omanogo inanggembu dewa omanogo oba wam warogo fei laga lagaikheba re at onggwarek ebe inom, it afuni holhu mene omanogo inom alomat fisikhi lagaikhe.

²⁴ A'nogo hilingiti logolik he, aren he o Tuhan Awi wuri'mo a'nogo nen o elonggo lokwe weregengge omanogo wanhikhesik he wiik weakhogo hilingfesikhesik he kwe yagatikhe. Nen it afuni Yerusalem mene werekwe omanogo mondogat he aren wam kembu faget warogo nolhukwe iluk mezbah wurik lagaikhe.

²⁵ O it afuni Yehuda mene were'ma andoma kota kwe inom, o sili endep-endep kwe inom, it afuni inunggulenu amu mene inanggembu dewa omanogo oba apne wanhik, amben fanongge omanogo noletik, ugukwe iluk wurik lagaikhe. Aren a'nogo hilingiti lagaikhe andiba re at ambu omba ineisena Tuhan Allah a'nogo endawimo ou pourogo hilingfikhi lagaikhe.

²⁶ At Ahas nen amu mene hilingiti lagaikhe mene inom, aren melalinafi lagaikhe mene inom he mondogat buku it raja-raja Yehuda mene inom Israel mene inom en hilingiti lagaukwa mene pilingisogo palek mene a'nogoba palek werek.

²⁷ At Ahas ebe wa'lagaikhe mo re o Yerusalem salhukwaba nen he it ap raja-raja salinafi lagaukwaba andoma salhukwa lek. Nen at obali'mo re at amlogo Hizkia a'nogo raja menlagaikhe.