2 TAWARIKH 27 - Allah Wene Fano Wene Hupla Inane

Ap Yotam raja Yehuda mene faget menlagaikhe wene

¹ Ap Yotam andi agaisa re hun Zadok a'logo he Yerusa a'nogo. Nen, Yotam ebere umur 25 tahun werek kwelek raja menlagaikhesik, o Yerusalem oba andoma 16 tahun logolik melalinafu welagaikhe.

² At Yotam ebere at eisena nen hilingiti lagaikhe hakhogore, Tuhan endawimo anggikherek mene nek hilingiti lagaikhe. We at eisena nen amben fanongge Tuhan Aiba nolhi lagaikhe omanogo higit he nolhi lagaikhe lek. A'nogo hilingiti lagaikheba nen he it afuni holhu mene omanogo re weak enek hilingiti lagaukwa.

³ O Tuhan Awi wuri'mo nen Kwe Ambe Hokho Mene Utara fikhit mene andi re at Yotam enat wutikhesik he o Yerusalem en o Ofel ikhi lagaukwaba pa' leget waganogo o a'nogo omamet figik isikhe.

⁴ Aren he o it afuni Yehuda mene inawi kota tomkwe omanogo wutik, leget pa' leget omamerogo wanhik, kagalek werek oba faget menara o enggama omanogo wutik, hilingitikhe.

⁵ Aren he raja Amon mene inom agoromi tentara inom inoba weim yabi lagaikhesik inalong legaphogo fisasikhemo at oba onggo fei laga logouwageluk ane omamerogo yagaisikhi lagaikhe. Andiba re iren tahun henagan oba andem he perak he enggin 3.400 kilogram hilingik engge inom, gandum enggen elokhe pire mene amu-amu re enggin 1.000 ton nen hilingik mene inom fei laga lagaukwa.

⁶ Aren he eisena Tuhan Allah a'nogoba tiphogo hilingiti logolik, ane hologo nek hilingiti lagaikheba re at Yotam ebe omame hokho aga lagaikhe.

⁷ At Yotam ebe raja mendek logolik melalinafi lagaikheba, weim yafi lagaikhe mene faget inom, ap inoasigiluk endawi wenggelhhi lagaikhe mene faget inom, mondogat he buku it raja-raja Israel mene inom, Yehuda mene inom, en hilingiti lagaukwa mene palek werek mene a'nogoba palogo fesukwa.

⁸ At Yotam ebere umur 25 tahun logolik raja menlagaikhesik he, o Yerusalem oba andoma 16 tahun melalinafu welagaikhe.

⁹ A'nogo hilingiti lagaikhesik wa'lagaikhemo re, o kota Daud aiba omanogo salhukwama re at obali'mo at amlogo Ahas a'nogo raja menlagaikhe.