2 TAWARIKH 26 - Allah Wene Fano Wene Hupla Inane

Afuni Yehuda mene faget hun Uzia raja menlagaikhe wene

^1-2 Nen at Amazia ebe wa'lagaikhemo re it afuni Yehuda mene mondogaren he at amlogo Uzia a'nogo wenagaisogo raja logouwageluk menfesukwa. Andem oba re at Uzia ebe umur 16 tahun oba werek kwelek. Nen at Uzia agaisa re Yekholya awi Yerusalem mene.

³ A'nogo heragaisogo menfesukwama o Yerusalem oba andoma 52 tahun logolik melalinafu welagaikhe. O kota Elot andi re arenat telhikhesik he nekhengge obali'mo arenat wutikhe.

⁴ At Uzia re eisena nen hilingiti lagaikhe hakhogo Tuhan endawimo agaiyek anggikherek mene nek hilingiti lagaikhe.

⁵ Nen hun Zakharia a'nogo ebe eluk logolik oba re, at Uzia endawinggen Tuhan oba tipsek logolik hilingiti logouwageluk komotu mene re at welagaikhe. Aren tiphogo nek hilingiti logolik Tuhan obaget enek hilingitunem, Tuhan nen at Uzia oba fanot fikhi lagaikhe.

⁶ At Uzia nen he it ap Filistin inap inom, weim yabi lagaukwasik he, aren o kota Gat, Yabne, Asdod inom, leget pa' leget omamerogo waganek welagaikhe mene omanogo meisak-langkukhogo lakfisasikhe, aren hobuk he o kota-kota andoma mondok ning maniberogo o Asdod horokhogo andoma inom, o it afuni Filistin mene werekwe alekwe andoma inom wutikhe.

⁷ Aren he it ap Filistin inap inom, Arab inap inom, o Gur-Baal welagaukwa mene andoma inom, it Meunim inap inom, inalong lek hilingisogo fisoageluk Tuhan nen lebethikhi lagaikhe.

⁸ At mondok omame mene aga logolik he, enu re o Mesir huli andomabaat wialarik laga lagaikhe. It afuni Amon mene nen ogore it inom at a'ma welago oma re iluk onggo re at Uzia were'ma fei waga lagaukwa.

⁹ Aren he o kota Yerusalem a'nogo ninghogo iluk he, ap kagalek werek oba faget menara kwe unggutmo arem nogo ekhe, nen Pintu Gerbang Lembah ba aremnogo ekhe, nen leget waganek unggutmo maserogo kuguba aremnogo ekhe wutikhe.

¹⁰ Hun andi re yabu wanhu mene faget agaiyek welagaikhe andi nen he, o tomkwe omanogo anggur yabu hilingiti logouwageluk inom, kweang muli kwe omanogo hilingiti logouwageluk inom he, ap hokhorogo kwelaginafikhe. Aren he o leimo omanogo helep oba mondok omamerogo uanhogo wurik lagagik, at anggo tati lagaukwa mene mondok hokhorogo welagaikhe mene agai nunggu mene faget tonggo kwe inom, punukwe inom, mo ubuk ikherek fikhit inom, i mogo yenggelhukwe iluk kweang hokhorogo habulik lagaikhe.

¹¹ It weim yafu mene faget mondok pililik-pelalek inap fikfouksek logolik welagaukwa mene hun Uzia agoromi inebe hokhorogo welagaukwa. It welagaukwa mene a'nogo inebe esa logalhigik were'ma re, at raja a'ma werek mene omanogo nen misik ekhe hun Hananya a'nogo nen melalinafu kwelek, at raja agoromi sekretaris inebe pire mene hun Yeiel inom, Maaseya inomen lisu palhi lagaukwa.

^12-13 It tentara weim yafarek inap andi re, arogo it tentara ina'ma mene re inebe 307.500 nen were'ma re it inogogwi perwira inebe 2.600 nen logolik melalinafi lagaukwa. It ap andi re weim yabi lagu aple faget inom, raja agap telogo it inaselei mene mabenet fisugu mene faget inom he, elok mondok hilingik welagaukwa.

¹⁴ A'nogo were'ma re at Uzia nen agoromi tentara omanogo sikhe inom, togengge inom, su posiemanggen meneba ugu mene inom, unggul topi no baja meneba hilingik mene inom, tok ma'mungge sige kabelek anggwe mene inom, helep huk helep inoatungge mene faget inom, mondok fik-fukhogo hilingfisikhi lagaikhe.

¹⁵ It agoromi sikhe wutu inelu mene nen he o Yerusalem oba andoma o wurogo liabek mene andoma faget inom, o kota unggutkwe andoma faget inom, togengge andoma faget inom, weim yafu mene faget tok inom, helep hokhondek mene inom, lakfei lagunem inoatu mene elalhi lagaukwa. A'nogo At Allah nen lebethugunem he at omame agun aga logolik he, at Uzia abok yi kwe ti kwe sagarek mondok welagaikhe.

At Uzia endawimo leget fakhasikhemo wene oba agaikhe wene

¹⁶ At raja Uzia a'nogo ebe omame aga logolik he endawimo leget fakhikhi lagaikhe. Aren he Allah Wene melalek werek mene a'nogo sagalogo fuluk he, o Tuhan Awi wuri'mo mezbah a'nogoba amben fanongge no dupa nolhi lagaikhe mene a'nogoba noligin iluk kwi lagaikhe. Andiba re at ebe mondok weaget fakhasikhe.

¹⁷ A'nogo kwi lagaikheba nen he at imam Azarya a'nogo inom, it imam fena inomame rek logolik inambong serek inap enek inebe 80 nen he aren hilingiti lagaikhe mene a'nogo faget kwe paluogeluk ombo'ne kwi lagaukwa.

¹⁸ Kwi lagaukwasik he iren ikhi logolik, ”Ninoe hebe kain mene! Hun hat he Tuhan Allah ane sagal fegendik, Aren a'nogo hilingisin iluk yagahete lek oba nen kwi wagen andi nen he Aren hat hoba fanot hobagakhi logogin lek enggere, haren Tuhan faget amben fanongge dupa andi noligin lek. Yabu andi hilingiti logouwageluk he, it imam Harun ambisangma mene omanogo enogo fisasikhe hilingi'mo re, yi re it ineabu. Hun hat he yogondagat o mondok amu enek oba yi herakfuluk wulibi lan!” iluk yagatukwa.

¹⁹ Andem sambul he at hun Uzia a'nogo re amben fanongge dupa nolhi logolik kwalhungwe a'nogo enggimo senegeisogo o Tuhan Awi wuri'mo a'nogo nen, mezbah amben fanongge nolhu mene were'ma era'lu aremnogo mendek were'ma nen yagatukwa. A'nogo yagatukwa ma nen he aren it imam omanogo inoba a'mage fesikhesik hilingitunemen he ferekhogo aremnogo at elokhonggen oba oumo henanggo mene oba agaikhe.

²⁰ It imam omanogo inom, at Azarya inomen kwelakhasukwa re arigini'mo ineilenggen hasukwasik youk mondok lagaukwasik he, o Tuhan Awi Wuri'mo omanogo nen weak-weak wulibi loageluk yagatukwa. Tuhan nen unggum oba a'nogo fesikhemo re at a'nogo weak-weak wulibi lagaikhe.

²¹ At a'nogo ebe raja welagaikhe mene a'nogoba nen kofologo herakfesikhesik he, o Tuhan Awi wuri'mo omanogo kwikhi logogin lek iluk he, o ale'ma fesukwama re o misik ekhe fesukwama at amlogo Yotam a'nogo at a'ma wakil hakhogo melalinafi logolik welagaikhe. Ou a'nogo fano agi'lek welagaikhesigen he at raja Uzia a'nogo ebe arat wa'lagaikhe.

²² At raja Uzia nen melalinafi lagaikhe mene fenakwe re at nabi Yesaya hun Amos amlogo a'nogo nen palhikhe.

²³ At ebe wa'lagaikhemo re, at oba ou henanggo mene welagaikhe andi nen he it raja salinafi lagaukwaba omanogo herakfuluk he endakwe fikhit horokhogo omanogo salhukwa. A'nogo salfesukwasik at a'nogo obali'mo re at onggwarek amlogo Yotam a'nogo menlagaikhe.