2 TAWARIKH 25 - Allah Wene Fano Wene Hupla Inane

It afuni Yehuda mene faget Amazia raja menlagaikhe wene

¹ Hun Amazia re agaisa enu Yoadan awi Yerusalem mene andi. Nen, at Amazia ebere umur 25 tahun oba raja menlagaikhesik o Yerusalem oba andoma 29 tahun melalinafu welagaikhe.

² At Amazia nen he Tuhan endawimo anggikherek mene nek hilingiti lagaikheba nen he, we endawimo eberogo mene hakhogo hilingiti lagaikhe lek.

³ At ebe raja menlagaikhe mene a'nogo omame aga logolik he; it at eisena watukwa mene agoromi pegawai omanogo unggum inoba fesikhesik inoatikhe.

⁴ It a'nogo inoatikheba nen he it inoatikhe mene andoma inagainafuri omanogo faget enek he buku Musa nen palhikhe mene a'nogoba palhi logolik he, ”It inagainafuri nen weak hilingitu halok he it weak hilingitu mene onggo iluk it ineisugwi inoasu fuk, nen it ineisugwi weak hilingitu halok he it weak hilingita onggo iluk it inagainafuri inoasu fuk. Ap inebe lombok inonggwarek weak hilingitu onggo nek inoasugun,” iluk palek werek mene a'nogo higithogo re inagainafuri omanogo inoatukwa lek.

Ap Edom mene inom weim yafukwa wene

⁵ It afuni inunggulenu Yehuda mene inom Yerusalem mene inom a'nogo at raja Amazia nen kabogerinafikhesik he it inebe inunggulenu akhogo hilingik aremnogo higit-higit inebe 1.000 nen faget he inoe misik ekhe helagerogo; Nen inebe 100 nen faget he inoe misik ekhe helagerogoat menlani o, iluk yagaisasikhe. A'nogo yagaisasikhemo it aremnogo menlagaukwama re aren he it inebe umur 20 tahun ambolkwe hilingik mene nek inarige kabelek inom, tok kwe palengge perisai inom mondok hebelek logolik weim elok yabu hak mene nek wenagaisogo fisasikhe. Nen it wenaginafikhe mene andem inebe lambulogo re 300.000 nen hilingik welagaukwa.

⁶ It a'nogo werek kwelek he aren it afuni Israel mene inagoromi tentara ekhe inebe 100.000 nen mene no perak ebe enggin 3.400 kilogram hakhogo meneba onggo palugun mene inayonggo fesikhe.

⁷ Aren a'nogo hilignitikheba nen he nabi misik ekhe raja ambit wagaikhesik yagati logolik he, ”It afuni Israel mene o kerajaan abel utara fikhit werek mene andi re Tuhan nen leberisagain lek enggere haren it tentara Israel mene andi woginabu fuk.

⁸ We At Allah amu nen enek inalonget fisigik, inomame leget figik, hilingitere'ma re hun haren it woginabigin halok hat hagoromi tentara inomamerek logolik, inailo lek logoin meneba nen ogore; Tuhan nen he hun hat halong leget hobagauwageluk hilinghobagagin logou hak.

⁹ A'nogo yagatikhemo re at Amazia nen heinok wokhikhi logolik he, ”An nen perak it wogisigi mene andoma re ninggin lasigin?” iluk heinok wokhasikhemo re at nabi a'nogo nen onggo yagati logolik he, ”Haren it wogisegen mene andem he we endep harek oba nen he, At Tuhan nen ekhe inom seberogoat honggwarek wokhesu hak,” iluk yagatikhe.

¹⁰ A'nogo yagatikhemo re at Amazia nen it tentara onggo palinafikhe mene omanogo inoba hinaiba hinambotkwe lani o, iluk yagaisasikhemo re, inendawimo weakhogo wene palik lagaukwa.

¹¹ At Amazia a'nogo nen ailo lek agaikhesik he at agoromi woginarek o tonggo ekhe enu Lembah Asin andoma lagaikhesik he andoma nen it ap Edom inap inom weim yafukwasik iren ap inebe 10.000 nen mene inoatukwa.

¹² Nen it inebe 10.000 nen fena re hele warogo woginarek o kota Sela tom helep mene ungguloba andoma woginarek lagasukwasik huginabi pi wagaukwama re inebe mondogat wa'lagaukwa.

¹³ It a'nogo hilingitu kwelek a'nogo re it tentara Israel mene at Amazia nen ninom weim yabi lagi'lek hinaiba lani iluk yagaisasikhe mene omanogo re, it afuni Yehuda mene inailokwe o Samaria hilingi'luk Bet-Horon hilingi'luk tulem omanogo pin kwikhi logolik he iren ap inebe 3.000 nen mene inoatik, inasungge mondok hokho-pokhorogo heligik, isukwa.

¹⁴ Nen at Amazia a'nogo re it afuni Edom mene inoasi lagaikhesik a'nogo re aiba waga logolik he, it Edom mene inanggembu ilirengge hilingik a'nogo waluk wagaikhesik he aren o it afuni Yehuda mene were'ma omanogo fei wagaikhe. A'nogo fei wagaikhesik he, Aren amben fanongge kembu a'nogo faget warogo noletik, obaget hilingitik, ikhi lagaikhe.

¹⁵ Aren a'nogo hilingiti lagaikhe mene a'nogo At Tuhan nen hasikhesik he a'mage mondok lagasikhesik he ap nabi misik ekhe ayonggo fesikhesik Amazia oba lakfei wagaikhe mo re at nabi a'nogo nen yagati logolik he, ”Hun hat homame logolik ha'ma ferinarek were'ma re it afuni inunggulenu amu mene andi inanggembu dewa andi nen fikhalogo wulaginaferek lek meneba nen neisena haren fogerati lagen andi nenahalok nogo?” iluk yagatikhemo re,

¹⁶ At Amazia nen ikhi logolik he, ”Hat he raja komotu mene logoinogoluk hobagogo re fuk! Hane lek ame. Nen hat hane igin halok he niren hebe hoasuogeluk welago,” iluk yagatikhe. A'nogo yagatikhemo re at nabi a'nogo ane lek agaikheba nen he oan ane lek agi'lek logolik he mel yagatikhe, ”An nen komothafi mene andi hol fegen leksik hun haren hobabut hilingiten mene andiba re At Allah nen hat hebe weaget hobagagiluk fik-foukhogo hilingfikhesik werek andi,” iluk yagatikhe.

Yehuda mene inom Israel mene inom weim yafukwa wene

¹⁷ At Amazia it afuni Yehuda mene inoe raja a'nogo inom, it ap raja komoti lagaukwa mene omanogo inomen he, it Israel mene inom weim yabugun iluk weim yonggo wulafukwasik he at Amazia nen he hun Yoas it afuni Israel mene inoe raja, Yoahas amlogo, hun Yehu omba a'nogo oba ap yonggo lakfisikhi logolik he, nit ninom wal houwgen he we'no o,” iluk wene lakfesikhe.

¹⁸ A'nogo lakfesikheba nen he at raja Yoas nen he wene onggo lakfei waga logolik he, ”Linggene misik oba re e alok-alok agayo o Libanon tomkwe wulibik mene omanogo nen e laik oba wene lak fikhi logolik he, Laik agwi, hat ha'logo tugum mene an namlogo ekhe agweap eroakhogo re wo'ne'nogen o. Oba nen he hobugen maro enggama mene ekhe kwe andi laga logolik he, eisogen alok agan a'nogo unggul warogo sibik-sebekhogo hilingfikhe.

¹⁹ Amazia agwi hat he it Edom inap andi inoatirik iluk wonoget fakhikhi lagen a? Hat honggwarek hebe inom it hagainafuri holhu mene inom hinebe alomat fakha hak he, wonoget fakhikhi lagep andi, we hat he hailoba yamukhogo logoino o,” iluk lakfei wagaikhe.

²⁰ A'nogo lakfei wagaikheba nen he at Yoas raja Israel mene a'nogo nen he at Amazia raja Yehuda mene nen isikhe aple a'nogo futfesikhe lek. Aren futfesikhe lek andi nen he at Amazia nen it Edom inap inanggembu alik hilingik mene fogerati lagaikhe andi nen At Tuhan nen ebeti logolik he at Amazia andi re mabenet fogoin halok he fano anggasikhe.

²¹ Andiba re at Yoas a'nogo agoromi inom he o Bet-Semes andoma lagaikhesik he at Amazia inom weim yafukwa.

²² Weim yafi logolik he it tentara Yehuda mene omanogo re mabenet fisasukwama re it inebe inawi lombok linggi-longgo iwagaukwa.

²³ At Yoas nen he hun Amazia a'nogo fakfesikhesik he waluk o Yerusalem lagaikhesik, o kota andi leget pa' leget waganek mene a'nogo, kwe ambe Pintu Gerbang Efraim kwi wagu mene iluk ambe palek mene a'nogo ba nen he kwe ekhe ambe Pintu Gerbang Sudut eil uanhogo 200 meter en hakhogo meisalogo lakfisasikhe.

²⁴ A'nogo hilingfuluk he o Tuhan awi wurik oba a'nogo nen emas, perak hinatukwa mene omanogo inom hun Obet-Edom en halhi logolik welagaikhe mene omanogo inom; O raja awi wuri'mo yi mene ti mene werek mene omanogo inom ap onggo fei wagu halok wogisogoin mene iluk fak fisasukwa mene inom, omanogo at Yoas nen mondogat felelenghogo woginarek he aiba o Samaria lagaikhe.

²⁵ Hun Yoas it afuni Israel mene inoe raja a'nogo wa'lagaikhemo nen he at Amazia it afuni Yehuda mene inoe raja a'nogo re 15 tahun ekhe inom eluk welagaikhe.

^26-28 At Amazia a'nogo Tuhan herakfuluk hilingiti lagaikhe huli andemen he it ap andoma nen at ebe wasugun iluk anggomo palhukwasik he o Yerusalem omanogo wasi logoin iluk hilingitunemen at ailo nen he heise o Lakhis wulibi lagaikhe. Oba nen he it aselei mene omanogo nen o andoma murok lagaukwasik ebe wasi lagaukwa. At ebe wa'lagaikhemore' he ebe warek a'nogo no kuda amboloba liakfesukwasik waluk o Yerusalem wagaukwasik, o kota Daud aiba it ap raja-raja salinafi lagaukwaba omanogo salhukwa. Nen, at raja Amazia ket menlagaikhesik hilingiti lagaikhe mene inom, wurep kobokhogo hilingiti lagaikhe mene omanogo inom he, mondogat buku it raja-raja Israel mene inom Yehuda mene inomen hilingiti lagaukwa mene palek mene a'nogoba palogo fesukwa mene werek.