2 TAWARIKH 24 - Allah Wene Fano Wene Hupla Inane

Yoas it afuni Yehuda mene inobaget raja menlagaikhe wene

¹ Hun Yoas a'nogo agaisa enu re Zipya awi o kota Bersyeba mene. Nen, at ebe re umur 7 tahun werek kwelek raja menlaikhesik he o Yerusalem oba andoma 40 tahun raja melalinafu welagaikhe.

² At Yoas nen he hun imam Yoyada a'nogo eluk logolik andem he aren Tuhan endawimo anggikherek mene faget enek hilingiti lagaikhe.

³ At Yoyada nen he, Yoas faget iluk he agagwi helime inebe pire mene wenaginafikhe. It inebene nen he at Yoas amlogomi inom, a'logomi inom taginafikhe.

⁴ At Yoas a'nogo tahun minggilogoba melalinafi lagaikhesigen he, aren Tuhan awi a'nogo pugunesigin iluk anggasikhe.

⁵ A'nogo anggasikhesik he, aren it ap Lewi inap inom, it imam inom inoba yagaisikhi logolik he, ”O Tuhan Awi wurik a'nogo pugunetu mene faget, it afuni holhu mene mondogaren uang tahun hundik-hundik kabogeti logogun nen iluk, o it afuni Yehuda mene werekwe kota-kota andoma melalinabi lani,” iluk yagaisasikhe. Aren yagaisikhi logolik he, wene andi re weak-weakhogonek hilingi'no, iluk yagaisasikheba nen he, it Lewi inap a'nogo re mondok andimik-andomokhogo hilingiti lagaukwa.

⁶ A'nogo hilingiti lagaukwama re, at Yoas nen imam Yoyada a'nogo wolhasikhesik he, it a'nogo woginarek loageluk mel yagatikhe, ”Yogondak it ap Lewi inap andi nen it afuni Yehuda mene inom, Yerusalem mene inom, it andem inebene nen kweang, yi mene ti mene onggo pajak a'nogo fugu mene andoma kabogesi lani, iluk he, nenahalok hun haren miminginafi logolik weak-weakhogo hilingi'ni iluk yagaisikhi lagen lek? At Tuhan amingmingengge Musa a'nogo nen ogore, o Tuhan Awi Sabu salek oba a'nogo faget, afuni uang kweang onggo fugu mene andoma kabogesi waga logoni iluk yagaisikhi lagaikhe omanogo re lek nogo a?” iluk yagatikhe.

⁷ (He Atalya a'mage weak hwe a'nogo agoromi ane hologo hilingiti lagaukwa mene omanogo nen he, yi mene ti mene Allah obaget iluk amu penogo werek mene omanogo kembu Baal fogerasuogeluk wanhik, Tuhan Awi wuri'mo a'nogo weagerogo figik isukwa.)

⁸ Andiba re, it Lewi inap a'nogo nen e peti misik ekhe wutfuluk he kwe ambe hokho mene o Tuhan awi wuri'mo kwi wagu meneba aremnogo hut fouwageluk yagaisasikhe.

⁹ A'nogo fesukwasik he, at Musa nen it afuni mondogaren hilingiti logogun iluk yagaisasikhe mene higithogo re, it afuni Yerusalem mene werekwe inom, it Yehuda mene werekwe inom, wene menfikhi logolik he, afuni abirengge nen uang kweang onggo faget mene a'nogo Tuhan faget fuluk fei aga logogun iluk yagaisasikhe.

¹⁰ Wene melalek wulafikhe mene a'nogo re, it afuni holhu mene inom, it inogogwi melalinafu mene inomen, inagaiyek agaukwasik he, iren inebe anggilukhogo uang pajak onggo re e peti wurik a'nogoba kwelafi lagaukwa.

¹¹ A'nogo kwelafunem he, it Lewi inaben he, linggene hundik-hundik peti a'nogo raja agoromi pegawai omanogo werekwe inambit iren kwelakfouwageluk waluk laga lagaukwa. Waluk lagunem he, kwelakfugunemen ambi peti a'nogo ele hopo ugu halok he ap negara faget lisu palhu mene a'nogo inom, Imam Agung a'ma werek mene a'nogo inom, inomen uang omanogo wulakfei we'luk he, peti a'nogo nekhengge obali'mo fei laga lagaukwa. Iren linggene hundik-hundik hilingitunem he, uang omanogo mondok hokho-pokhorogo kabok ikhi lagaikhe.

¹² A'nogo kabogetunem he, at raja inom, at Yoyada inomen he, uang omanogo it o Tuhan awi wurik a'nogo pugunetu mene faget kepala hakhogo mendek werek mene omanogo wogisugunem he, iren he, ap yabu helep oba wutu mene inom, e meneba wutu mene inom logam meneba wutu mene inom, omanogo inoba onggo wogisikhi lagaukwa.

¹³ A'nogo hilingfisasukwama re, it ap tukang omanogo nen o Tuhan Awi a'nogo eroratukwa. Iren he, o a'nogo mondok wenggelogo nek wuti logolik o ebe attak wurik welagaikhe hakhogo mondok omamerogo fano mondok wutukwa.

¹⁴ O a'nogo mondogat wutukwasik he emas, perak inom fena tindel agaikhe mene omanogo re, it hun raja inom Yoyada inom wogisasukwama re, iren Tuhan Awi a'nogo elonggoma weregengge faget yi mene ti mene elalogo hilinghigik fesukwa. Nen, iren elalhigik fesukwa mene andoma re, yi mene ti mene wene kabogeti logolik hilingitu mene faget inom, wam warogo nolhi logolik hilingitu mene inom, amben fanongge nolhi logolik hilingitungge faget inom piring inom mangkok inom, elalhukwa. Ap Imam Yoyada ebe eluk logolik oba andem he, Tuhan obaget wam warogo Tuhan awiba omanogo nolesi kwikhi lagaikhe.

Imam Yoyada nen hilingitikhe mene omanogo wenggelhigi'legengge hilingitukwa wene

¹⁵ Yoyada ebe re umur 130 tahun agaikhesik at ebe yaman agaikhesik wa'lagaikhe.

¹⁶ At ebe wa'lagaikhemo re, aren Allah faget hilingiti lagaikhe mene inom, Tuhan Awi wurik a'nogo faget hilingiti lagaikhe mene inom, it afuni Israel mene inobaget hilingiti lagaikhe mene inom faget, wenggelek logolik he, iren o kota Daud en meneba omanogo sali lagaukwa.

¹⁷ At Yoyada ebe mondok wa'lagaikhemo re, it Yehuda inap inogogwi melalinafi lagaukwa mene omanogo nen at Yoas a'nogo endawimo kagalhik, endawinggen wanhik, hilingitunem he, at Yoyada nen wene yagati lagaikhe mene omanogo furogo halhi lek hilingiti lagaikhe.

¹⁸ Andiba re, it afuni holhu mene omanogo re it inambu-inombalak ineisena Tuhan Allah a'nogoba wene kabogeti'lek engge re, iren kembu fogeratik, dewa he mene dewi Asyera a'nogo alik waganek meneba fogeratik, hilingiti lagaukwa. It inaweak hilingiti lagaukwa mene andomaba re, Tuhan en it afuni Yehuda mene inom, Yerusalem mene inom, a'mage inoba fesikhe.

¹⁹ A'nogo inoba fesikhesik he, At Tuhan en it At ane yagaisikhi lagaukwa mene nabi omanogo nen he, it afuni nen Tuhan obaget enek hilingiti logouwageluk, komorinabi loageluk lakfisa laga wagaukwaba nen he, it afuni holhu mene omanogo nen inesanggo holu inabit mondok welagaukwa.

²⁰ A'nogo hilingik welagaukhama re, at Zakharia hun imam Yoyada a'nogo Allah areagun oba asi wagaikhesik, Aren melalhu kwelek, at ebe it afuni omanogo were'ma menlasi lagaikhesik ane ikhi logolik he, ”Hiren ogo An noba ebeti'legengge hilingiti lagepma re, An nen ogo hit hinoba ebesigin lek. An nen nawene melalek yagaisikhi lagi mene a'nogo hologo hilingiti'legengge hinebe hinonggwaregen alomat fakhikhi lagep andoma nenahalok nogo?” iluk yagaisasikhe.

^21-22 A'nogo yagaisasikhe oba nen he, raja Yoas a'nogo it afuni holhu mene inom, wene misik seberogo makfesukwasik he, at Zakharia ane a'nogo puliarogo fesukwa. A'nogo hilingitukwasik he, at Zakharia eisena Yoyada nen hilingiti lagaikhe mene inom, aren ekhe mene ekhe mene kamo igi'lek hilingiti lagaikhe mene inom omanogo wenggel higi'legengge at raja nen he Zakharia a'nogo ebe wa'ni iluk yagaisasikhemo re, at Zakharia a'nogo o Tuhan Awi wuri'mo nen ambe kabukhogo tale'ma omanogo nen helep oba fukfugenggerogo pinggi watukwa. A'nogo watfesukwama, aremnogo ebe wa'lasigiluk logolik he, at Zakharia ane yi'nogo isikhe, ”Haren hilingiten mene yi re, At Tuhan amu nen enek eilenggen hikhemo re, aren enek hat henggi ambisangma hilinghobagauwak!” iluk yagatikhe.

At Yoas raja welagaikhe mene a'nogo wurep oba asi lagaikhe wene

²³ Tahun misik mene a'nogoba o hibi agik salim agik hilingituba re it tentara Siria mene o Yerusalem inom, Yehuda inom, oba andoma pin kwi waga logolik, iren ap inogogwi melalinafu mene omanogo inoati logolik he, inangge yi mene ti mene telhukwa mene omanogo mondogat hogouk eraluk he o Damsyik lagukwa.

²⁴ It afuni Yehuda mene nen he, it inambu inomba lak ineisena Tuhan Allah a'nogo ane ugu mene furogo holfigi'legengge hilingiti lagaukwama re, it afuni Yehuda mene nen tentara inebe hokhorek welagaukwaba nen he, At Tuhan nen he, it tentara Siria mene inebe endebengge mene nen inalong legaphogo hilingfisoageluk eilenggen fesikhe. A'nogo hilingfesikhe andiba re, At Tuhan en raja Yoas a'nogo unggum wogetikhe andi.

²⁵ At Yoas a'nogo tok wat fesukwama it tentara inaselei mene a'nogo mondogat lagaukwama re, at Yoas agoromi pegawai inebe pire mene ap wasugun iluk inane misik isukwasik he, aren hun imam Yoyada amlogo watukwa mene a'nogo unggulmo re, at ebe awi nogoli'lagoba omanogo wengik were'ma wasi kwisukwa. At raja a'nogo wa'lagaikhemo re o kota Daud aiba omanogo sali lagaukwaba nen he, at he it raja-raja salinafi lagaukwaba omanogo salhukwa lek.

²⁶ (Ap it inane misik mak fesukwasik hun Yoas wasi kwisukwa mene andem inenu re Zabad he Simeat awi Amon mene a'nogo amlogo andi inom he, hun Yozabad he Simrit awi Moba mene a'nogo amlogo inomen wasi kwisukwa,)

²⁷ At Yoas amlogomi nen hilingiti lagaukwa mene inom, at obaget heinogennge nen weak aple isikhe mene inom, aren Tuhan awi wurik a'nogo pugunetikhe mene inom, mondogat he, buku it raja-raja mendek welagaukwa mene tindelogo palek mene a'nogoba palek werek. Nen at eisena obali'mo re Amazia, Yoas amlogo a'nogo raja menlagaikhe.