2 TAWARIKH 23 - Allah Wene Fano Wene Hupla Inane

He Atalya ninabit iluk ninget hasukwa wene

¹ Tahun falfaligen walagaukwasik sabit meneba re hun imam Yoyada a'nogo nen an ogo yogondak hilingisigiluk welagi iluk wene katokhogo tegetikhe. A'nogo hilingitikhesik aren he ap sikhe fisogo inap inogogwi perwira inebe 100 nen omanogo hun Azarya Yehoram amlogo a'nogo inom, Ismael hun Yohanan amlogo a'nogo inom, Azarya Obed amlogo a'nogo inom, Maaseya hun Adanya amlogo a'nogo inom, Elisafat hun Zikri amlogo a'nogo inom, it inane a'nogo hilingisugun iluk misik katokhogo isukwa.

² A'nogo isukwasik he it aremnogo afuni Yehuda mene werekwe o kota-kota omanogo mondogat laga logolik he, it Lewi mene mondogat inom, it afuni inunggulenu lombok omanogo faget inogogwi kepala werek mene inom, andogerinabik lagaukwasik woginarek he o Yerusalem kabogesi wagaukwa.

³ It a'nogo wagaukwasik he o Tuhan Awi wuri'mo omanogo kabogetukwasik, at Yoyada nen it fenakwe omanogo inoba yagaisikhi logolik he,” Tuhan nen hun Daud oba wene wareti logolik, Hat hambisangma mene re, mondok-mondok andoma raja logolik melalinafi logogun,” iluk wene waretikhe hilingi'mo re, hun raja Ahazia wa'laga mene a'nogo amlogo Yoas ebe yiat menfogoin o. Nen yogondak yaat hat hebe hurek oba takhta ariba hu'lasi lagain o, iluk hun raja amlogo Yoas a'nogo inom wene isukwa.

⁴ A'nogo isukwasik iren ikhi logolik he, niren hilingisugun mene re ebe yi'nogo: It ap Lewi mene inom, it imam inom linggene sabat a'nogoba yabu hilingi'luk halok he, iren inaiba pikhit laga logogun lego, it inebe fena heirogo minggilogo re o Tuhan Awi wuri'mo kwe kwi wagu meneba oma kagalek logogun,

⁵ nen fena minggilogo ekhe re at raja ebe were'ma omanogo kagalek logogun, nen tindel asi lagain mene andem he kwe ambe enu Pintu Gerbang Dasar a'nogoba kagalek logogun. Nen, it afuni holhu mene mondogat he Tuhan Awi wuri'mo nen olulu andoma kagalek logogun.

⁶ O Tuhan Awi wuri'mo andi re Tuhan nen it ap Lewi mene inom nen it imam inom andoma yabu hilingiti logogun iluk penogo fisikhemo re, it afuni hesangge mene we masik-masik iluk ogo ibi-eberogo nen he ekhe kwi wesugun mondok lek. At he it Lewi inap inom, it imam inap inom andoma yabu hulingiti logolik werek mene nek kwikhi logogun. It afuni amu mene re Tuhan ane ikhe mene hologo inebe endakwe nek logogun,

⁷ ap ekhe nen Tuhan Awi wuri'mo ari kwi wesigin iluk leil watu halok he ebe pinggi wasugun. Nen it ap Lewi hinap he at raja era'lu andem karok fanghogo mendek logogun, nen at ekhema lagu halok ogore ebe kagalek mondok laga logogun o!” iluk ayo palogo fesukwa.

⁸ A'nogo isukwasik he it ap Lewi inap inom, it afuni Yehuda mene a'nogo inomen he at Yoyada nen yagaisasikhe mene a'nogo higithogo nek hilingitukwa. It ap inenggi Sabat sambul yabu hilingiti legengge welagaukwa mene omanogo ogore hinaiba logoin lek iluk yagaisikhi lagaukwa. Andiba re it ap perwira omanogo nen he ap yabu mondok hilingitu werek meneet, it ket yabu hilingisugun iluk wagu mene omanogoet, inoba re yi'nogo hilingi'ni iluk yagaisikhi lagaukwa.

⁹ At Yoyada nen he sige kabelek inom, tok ma'mungge inom, raja Daud en Tuhan Awi wuri'mo fesikhe mene omanogo it inogogwi perwira 100 mene omanogo inoba sumburogo wogisasikhe.

¹⁰ Nen at Yoyada nen ogore raja kagalek logouwageluk he ap fenakwe karok fanghogo o Tuhan Awi Wuri'mo elokhe fikhit andoma kagalek logouwageluk fisasikhe.

¹¹ A'nogo mondogat hilingfisasikhesik at Yoyada nen he hun Yoas a'nogo hondo'luk wulibi lagaikhesik he, at Yoas ungguloba kware-kware hangge makhota a'nogo puget figik, nen buku Tuhan Awene melalek palek werek mene a'nogo enggimo figik, isikhe. A'nogo hilingfuluk he at imam Yoyada inom at againafuri inomen he linggene at raja menfesukwa sambul a'nogoba re amusu ebene kweisalogo hilingfesukwama re, it afuni mondogat a'nogo nen inane lambulogo ikhi logolik he, ”Nineisena raja heluk mondok logoino!” ikhi lagaukwa. Iren at Yoas ebe raja logouwageluk he a'nogo menfesukwa andi.

¹² A'nogo menfesukwasik he it afuni a'nogo inagaiyegeti logolik raja a'nogo faget ngai-wai ugunem, at he Atalya a'nogo esanggo holhikhesik he, at ebe weak-weak o Tuhan Awi wuri'mo a'nogo nen it inane anggiluk etunem omanogo lagaikhe.

¹³ At a'nogo lagaikhesik hilingitunemen he, raja ket mene a'nogo re o Tuhan Awi wuri'mo kwi laguba solombonma aremnogo ebe menogo fesukwama aremnogo were'ma re, it trompet futu mene inom, it sikhe fisogo mene inogogwi perwira 100 nen omanogo inom he, haningisogo kwelabek logolik welagaukwa. Nen, it Tuhan Awi wuri'mo andoma pinggong kongetu inap omanogo re, wene kabogetukwasik a'nogore it inangge pinggong omanogoba inagaiyegerati lagaukwa. A'nogo hilingitunem he it afuni omanogo mondogaren trompet futi logolik inagaiyegeti lagaukwa. Ariginhunem a'nogo isasikhesik he at Atalya asu laberek welagaikhe mene a'nogo tiliphogo hugisasikhesik ane hokhoba humeti logolik he, ”Neil palhi lageba, neil palhi lageba,” iluk ane humeti lagaikhe.

¹⁴ A'nogo humetunem at Yoyada nen he aben Atalya ebe o Tuhan Awi wuri'mo oma nen wasi nogo iluk he, it perwira 100 mene omanogo inoba yagaisikhi logolik he, ”Ap at ebe agap laberogo erarogo kwelabek mene andoma inanggelekwe nen waluk enda'ma wulibi lani o, ap ekhe nen at ebe agap telogo fagain iluk hilingitu halok he ap andi ebe pinggi wa'no,” iluk yagaisasikhe.

¹⁵ A'nogo yagaisasikhemo re it omanogo nen sene'luk wulibi lagaukwasik he o raja awi wuri'mo istana omanogo waluk lagaukwa. Andoma nen he o kwe ekhe enu Pintu Gerbang Kuda ikhi lagaukwaba andem en, he a'nogo ebe pinggi watukwa.

Yoyada nen kerabenggetikhe wene

¹⁶ A'nogo hilingitukwasik he at imam Yoyada nen he, it afuni holhu mene omanogo inom, at raja Yoas a'nogo inom, at ebe inomen he,” Nit Tuhan againafuri a'luk logouwogo,” iluk wene watukwa.

¹⁷ Wene a'nogo watukwasik iren he kembu Baal fogerati lagaukwaba omanogo pin kwikhi logolik he, sanokhogo lakfisigik, kembu obaget wam warogo noletukwe obalik mezbah wurik omanogo inom, ap alik wokhigik werek mene omanogo inom, halik-halokhogo figik, nen mezbah elokhoma omanogo nen ap imam Matan Baal faget hareise higit logolik hilingiti lagaikhe mene a'nogo ebe warogo figik, hilingitukwa.

¹⁸ A'nogo hilingitukwasik he at raja Daud en halfesikhe aple higithogo re, at Yoyada nen it ap imam inom, Lewi inap inom, a'nogo yabu o Tuhan Awi wuri'mo omanogo sumburogo higit-higit hilingiti logouwageluk yagaisasikhe. Musa nen wene melalek a'nogoba werek higithogo at Daud en fik-foukhogo hilingfesikhe mene, wene kabogeti logolik wuni wati logogun mene inom, wam warogo Tuhan obaget nolengge noleti logogun mene inom, hilingisuageluk yagaisasikhe.

¹⁹ Afuni emerek mene omanogo Tuhan apne wanhuba kwi lanogo iluk at Yoyada nen he, it ap o wuri'mo kagalek welagaukwa mene omanogo kagalek logouwageluk Tuhan Awi wuri'mo kwi laguba kwe ambe hokho palek mene omanogo ap yaga logogun mene menfisilik lagaikhe.

²⁰ A'nogo fisilik lagaikhesik he it afuni inogogwi kaindek-kaindek omanogo inom, it pemerintah ba yabu legoma hilingiti lagaukwa inap omanogo inom, O Tuhan Awiba omanogo nen hun raja a'nogo waluk onggwarek ebe werek oba fei lagunem, iren at Yoyada a'nogo ombo'ne lagaukwa. Lagaukwasik it inebe kwe ambe fem attak-attak mene a'nogo kwe nen kwi lagaukwasik he, at raja a'nogo ebe hurek mene enu singgasana a'nogo ba hu'lagaikhe.

²¹ Nen at Atalya a'nogo ebe eiloak mondogat leget fesukwama re o kota andomaba inailo mondok legengge welagaik, afuni mondogat inagaiyegetik hilingitukwa.