2 TAWARIKH 22 - Allah Wene Fano Wene Hupla Inane

Hun Ahazia afuni Yehuda mene inobaget raja menlagaikhe wene

¹ Linggene misik sambul he it ap Arab inap inobabut mondok weak logolik weagerinabik nikhi lagaukwa mene omanogo fologo kwi waga logolik he, hun Yehoram amlogo elabo mene Ahazia a'nogo eluk herakfikhi logolik he, at ogogwi inalue mene omanogo mondogat inoatukwa. A'nogo inoatukwa andiba re it afuni Yerusalem mene nen he hun Yehoram welagaikheba a'nogo obali'mo re at amlogo Ahazia a'nogo menfesukwa.

^2-3 At Ahazia ebe re umur 22 tahun werek kwelek raja menlagaikhesik he, aren tahun we misik oba nek afuni o Yerusalem oba andoma melalinafu welagaikhe. At Ahazia agaisa he Atalya a'nogo nen kwanirogo nek hilingiti logouwageluk amlogo komotfesikhemo re, At Ahazia ogore hun Ahab logolik obabut hilingiti lagaikhe hakhogo nek hilingiti lagaikhe. He Atalya andi re hun raja Ahab a'logo raja Israel mene Omri a'nogo ombalo.

⁴ At Ahazia eisena wa'lagaikheba andem he it hun Ahab eisok erokwe mene omanogo re Ahazia komotu mene agaukwasik komotunem he, it Ahab eisok erokwe mene andoma nen hilingiti lagaukwa hakhogo re at Ahazia ogo Tuhan elokhoma kwanirogo nek hilingiti lagaikhe. At Ahazia ebere it komoti lagaukwa mene andoma nen alomarogo fesukwa.

⁵ Iren at komoratukwa mene omanogo higithogo re at Ahazia a'nogo raja Israel mene Yoram a'nogo inom mangosi lagaikhesik he, hun Hazael raja Siria mene a'nogo inom weim yabi lagaikhe. Yabi lagaikhesik he it weim o Gilead en, o Ramot kwe andoma yafunemen he, at Yoram a'nogo weim yafi lagaukwaba omanogo nen tok oba hun fesukwama re,

⁶ at ebe o kota Yizreel andoma nen fano hilingnabuageluk wagaikhesik were'ma at Ahazia a'nogo kwelakha lagaikhe.

Yehu nen Ahazia ebe pinggi watikhe wene

⁷ At Ahazia a'nogo hun Yoram kwelakha lagunem andem wa'lasigin iluk Allah nen mondogat wenagaisogo fesikhemo re, at Ahazia nen Yoram ha lagaikhe sambul a'nogo re at inom, Yoram inom, ap misik ekhe nen at raja Ahab eisok erokwe mene andi mondok lek hilingisogo fisoageluk wenak fesikhe mene hun Yehu Nimsi amlogo a'nogo nen it aremnogo inoasigiluk wagaikhe.

⁸ Tuhan nen hun Ahab eisok erokwe mene inoba unggum fagain anggasikhe mene a'nogo hun Yehu nen hilingisigin iluk hilingitunemen he, at Ahazia agaila'lak inom, it ap o Yehudaba andoma inobabut mondok weak logolik weagerinabik nikhi lagaukwa mene inogogwi kaindek esa logalek inom wagunem ambi agaukwa. A'nogo inom ambi agaukwasik he it a'nogo inebe mondogat pinggi inoatukwa.

⁹ A'nogo inoatukwasik he, andem sambul at Ahazia a'nogo o Samaria andoma hinago were'ma nen he at Yehu nen herasi lani iluk ap mimingisogo lakfisasikhe. Lakfisasikhemo lagaukwasik he, at Ahazia a'nogo ebe heratukwasik he at Yehu ambit waluk wagaukwama Yehu nen Ahazia ebe pinggi watikhe. A'nogo wa'lagaikhemo re, at omba raja Yosafat en endawinggen abirengge Tuhan oba tipsek logolik hilingiti lagaikhe andiba, along anggaluk alisikhogo re, iren at Ahazia a'nogo ebe warek salhukwa. A'nogo hilingitukwasik he it hun Ahazia eisok erokwe mene nen he ap misik ekhe ailo lekhogo raja menla'luk ferinarek logou mene re elo'lek enek aga lagaikhe.

It Yehuda mene faget he Atalya inagaisa ratu menlagaikhe wene

¹⁰ He Atalya amlogo Ahazia a'nogo mondogat wa'lagaikhemo re at agaisa elu agaikhesik, aren wene wilafi logolik he, it afuni Yehuda mene werekwe andoma at raja eisok erokwe mene mondogat inoarik lani o, iluk wene wilafikhe.

¹¹ A'nogo wulafikhemo re, ap Ahazia andi erei hele mene misik ekhe enu re Yoseba welagaikhe, at agun he eabu imam mene welagaikhe agun enu Yoyada andi inom helasikhe. At he Atalya nen raja againafuri mondogat inoatukwa sambul omanogo re at Yoseba nen hun Ahazia amlogo misik ekhe enu re Yoas andi inom ling-longengge helasikhe. Helasikhesik he hele ekhe omalik a'nogo ebe kulhi logogin mene a'nogo inom o Tuhan Awi wuri'mo nen senggelek misik ekhe elonggoma andoma hinakfisasikhe. At he Yoseba nen a'nogo hilingitikhe andiba re omalik andi he Atalya nen watikhe le'ma re agap telagaikhe andi.

¹² At he Atalya ratu menlagaikhesik melalinafu werek kwelek, tahun falfaligen hilingitikhe andi re, abo Yoas a'nogo o Tuhan Awi wuri'mo andoma hinago mondok welagaikhe andi.