2 TAWARIKH 21 - Allah Wene Fano Wene Hupla Inane

¹ At Yosafat a'nogo wa'lagaikhemo re, o kota Daud awiba it ap raja-raja salinafi lagaukwaba omanogo sali lagaukwa. Nen, obali'mo re at amlogo Yehoram a'nogo raja menlagaikhe.

Yehoram afuni Yehuda mene faget inoe raja menlagaikhe wene

² It afuni Yehuda mene inoe raja Yosafat a'nogo amlogo andi re, agaila'lak inebe falfaligen welagaukwa, nen it andem inenu re: Azarya, Yehiel, Zakharia, Azariahu, Mikhail, Sefaca inom andem.

³ It inebe andem were'ma re, it ineisena nen he emas inom, perak inom, yi mene ti mene onggo hokho mene inom hokhorogo wogisasukwasik he, o kota Yehudaba andoma leget pa'leget omamerogo waganek mene ekhe misik-misik wogisilik lagaikheat. Oba nen at Yosafat en he amlogo Yehoram enek he, manggusa mene andi nen he, at raja menlasigin iluk wenagaisogo fesikhe.

⁴ Andem oba re, at Yehoram a'nogo nen an nebe raja nomamerogo welagi iluk anggasikhesik he, aren agaila'lak omanogo mondogat inom, it agoromi at a'ma ineabu mondok lego welagaukwa mene fenakwe omanogo inom inoa'ni iluk yagaisasikhe.

⁵ At Yehoram umur 32 tahun werek kwelek ebe raja menlagaikhesik he o Yerusalem oba andoma 8 tahun melalinafi logolik welagaikhe.

⁶ Aren he, agwe hun Ahab a'logo helasikhesik he, at obabut ogo raja Ahab inom, nen it raja-raja Israel mene inobabut hilingiti lagaukwa omanogo higithogo hilingiti logolik he, Tuhan elokhoma weak mene nek hilingiti lagaikhe,

⁷ oba nen he, At Tuhan nen Daud wene wareti logolik, ”Hat hambisangma mene nen he mondok-mondok andoma afuni Israel mene melalinafi logolik enek logogun o,” iluk wene waretikhe a'nogo nen he, At Tuhan nen raja a'nogo weaget figi'lek welagaikhe.

⁸ At Yehoram en melalinafi lagaikhe huli aremnogoba nen he, it Edom inaben Yehuda inap inoba re, nirogo kerajaan ninamu logogun o, iluk ninget hasukwa.

⁹ A'nogo ninget hasukwama re, at Yehoram a'nogo agoromi sikhe fisogo mene inogogwi panglima omanogo inom kereta amboloba lagaluk weim yafarek mene omanogoba wulibi lagaukwasik he, o Edom pin kwi lagaukwa. It a'nogo pin kwi lagaukwasik hilingitunem en he at Yehoram a'nogo it tentara Edom mene nen hukhogo kwelakfesukwama nen he, o hubanggo it aselei mene nen hukhogo kwelabek werek kwelek polokhogo heise wulifikhe.

¹⁰ At Yehoram a'nogo nen it ambu-omba nen ineisena Tuhan Allah fogerati lagaukwa mene a'nogo herakfuluk hilingiti lagaikhemo re, andi huli nen he it Edom inap a'nogo re Yehuda mene ina'ma sebe ikhi lagaukwa lek. Nen, it Libna inap ogore ninamu logogun iluk ninghogo hilingisi waga lagaukwaat.

¹¹ At Yehoram en he it Yehuda inap werekwe tomkwe omanogo tugwi kembu fogerati logogun kwe wurik lagaikhe andiba re, it afuni Yehuda mene inom Yerusalem mene inom Tuhan elokhoma weak hilingiti lagaukwa.

^12-13 Andi nen at Yehoram a'nogo surat ekhe hun nabi Elia eluk logolik palhikhe mene wogetukwama wanhikhesik kwelakhasikhe re, surat andiba re yi'nogo palek were'ma hasikhe, ”Hun Hat he it afuni Israel mene inogogwi raja-raja omanogo nen hilingiti lagaukwa hak hilingiti lagen andiba re, it afuni Yehuda mene inom, Yerusalem mene inom, Allahba tiphogo hilingiri'lagwi lek andi. Hun Haren he raja Ahab en hilingiti laga mene inom, it at obali'mo menlagaukwa mene nen hilingiti lagaukwa omanogo hakhogo inom, hilingiti lagen. Andi nek he fuk, oba nen he, ekhere honggwarek hogogwi hagoromi weak haren hilingiti lagen oma hakhogo ekhe hilingiti'lek oba nen inebe mondogat inoaten. Noe hat he homba inom heisena inomen hilingiti lagaukwa hakhogo hilingiti'lek weak mene nek, hilingiti lagenma re Tuhan Allah at Daud en fogerati lagaikhe mene a'nogo nen noe hat unggum hoba fouwak.

¹⁴ At Tuhan en unggum enggin mene it hagainafuri holhu mene inoba inom, onggwarek againafuri inoba inom, hagagwi inoba inom, hangge yi mene ti meneba inom asi wesigin.

¹⁵ Nen noe honggwarek hebeba re ou halabutmo nilik kugunem enggin mondok hikhi logogin mene hoba asigin!” iluk palek were'ma hasikhe.

¹⁶ Andem huli re it ap Filistin mene inom Arab mene inom he, o i esanggoma it afuni Sudan mene inawi wurogo fisasukwama welagaukwaba andoma nen horokhogo andem welagaukwa. A'nogo were'ma re iren hun Yehoram inom weim yabi loageluk he Tuhan en inendawimo kagalhikhe.

¹⁷ A'nogo kagalhikhemo re, iren o Yehuda hugul kwi waga logolik he, o istana raja ebe welagaikheba a'nogo pin talogo kwikhi logolik, hun Yehoram agagwi, againafuri omanogo re inendawinggen lithugungge iluk hele warogo woginarek laga logolik he, at amlogo elabo mene Ahazia a'nogo nek he, herakfuluk lagaukwa.

¹⁸ A'nogo hilingitukwama nen he, at Yehoram a'nogo Tuhan nen ou alabutmo mondok fano asu elo'lek mene oba fesikhe.

¹⁹ A'nogo hilinglagaikhemo re werek kwelek enek tahun pire logolik oba enggin-fenggin hugu mondok welagaikhesigen ebe arat wa'lagaikhe. At wa'lagaikhemo re it afuni holhu mene a'nogo nen inambu-inombalak wa'lagunem hilingiti lagaukwa hakhogo at ebe warek a'nogo along anggaluk obaget hilimgiti logolik endu nonggwalek agandou nolhi'lek herakfisasukwa.

²⁰ At ebe wa'lagaikhemo re, ap misigen ogo ekhe yegei iluk inendawiratukwa lek. At ebe warek he, o kota Daud awiba omanogo salhukwaba nen he, it ap raja-raja salinafi lagaukwaba omanogo salhukwa legat. Hun Yehoram ebe umur he 32 tahun oba ebe raja menlagaikhesik he 8 tahun o Yerusalem oba melalinatu welagaikhe.