2 TAWARIKH 20 - Allah Wene Fano Wene Hupla Inane

Ap o Edom mene inom weim yafukwa wene

¹ Inenggi miren hakhogo ekhe welagaukwasigen he, it Moab inap inagoromi tentara inom, Amon inap inagoromi tentara inom, it tentara Meunim mene attak leberisikhi lagaukwa mene omanogo inom seberogo re, it afuni Yehuda mene inoasi kwugun iluk wagaukwa.

² A'nogo wagunem en he, ap ekhe yonggo wene waluk at raja Yosafat oba wagaikhesik he yi'nogo yagatikhe, ”It Edom inap tentara mene esa mondok hokho-pokhorogo re, o Hazezon-Tamar a'nogo telagasik he, hun hat were'ma kwi wesuogeluk he i Laut Mati fena fikhit omanogo nen kwi wagaikha o,” iluk yagasi lagaikhe. (O Ed-Gedi andi faget he enu ekhe Hazezon-Tamar ikhi lagaukwa andi.)

³ A'nogo yagasi lagaikhemo re at Yosafat a'nogo endawimo ailo agaikhesik he, Tuhan nen yi'nogo hilingisin yaganesuageluk samban isikhe. Andi nen it afuni mondogat a'nogo sumburu ninggik legengge inambe heang logouwageluk yagaisasikhe.

⁴ A'nogo yagaisasikhemo re it Yehuda mene inawi kota lombok werek mene omanogo re, Tuhan nen lebetnisoagen yagasugun iluk o Yerusalem lagaukwa.

⁵ It a'nogo lagaukwasik he, o Tuhan Awi wuri'mo senggelek ket meneba omanogo afuni Yerusalem mene inom seberogo kabokse'ma re, at raja Yosafat a'nogo it inelokhoma menlagaikhesik he,

⁶ ane omameba samban ikhi logolik mel isikhe, ”Nit ninambu-ninombalak ineisena Tuhan Allah nineisena! Allah Hat hebe pogoroba logolik o kweangma yoma yi afuni ti afuni mondogat melalinafi lagen. Hat hebe homame hokho mene logolik yi mene ti mene Hat ha'ma nek were'ma, ap misigen iluk ogo Hat hane sagalogo fou lek hak.

⁷ Nit nineisena Allah re we Hat hamu nek welagen. Hat hagainafuri inunggulenu Israel mene o kweang yomaba wagunem aremnogo re, Haren afuni o yoma welagaukwa mene omanogo mugusogo wulakfisasigin. A'nogo wulakfisasigindik he o kweang yi at Abraham Hat hare a'nogo ambisangma mene hundik-handik mondok-mondogat andoma it inangge a'luk logouwageluk wogisasigin.

⁸ A'nogo wogisasiginmo re, iren o yoma logolik Hat foget hafuba iluk o misik ekhe wutukwa. Iren,

⁹ weak hilingitu mene onggo re, aben weim inoasi lagik, ou amben weak mene inoba asi wagik, sumburu ouwak lagagik, hilingfisugunem iren Hat hambit we'luk o wene kabogetuba faget wurik mene yi elokhoma menlasi wagu aple andi faget he, irogo inelurek. It inoba enggin agu halok he Hat hoba samban ugunem, Hat hesanggo holuk leberisikhi lagen.

¹⁰ It ninambu-ninobalak o Mesir en wagaukwa huli re, it afuni inunggulenu amu mene were'ma inaiba andoma logogun lek, isiginmo re, it inambu-inombalagen it afuni inunggulenu Amon mene inom, Moab mene inom, Edom mene inom, inoati'legengge kwe amukwe nen ogal-ogal haningisogo wagaukwa.

¹¹ Nit ninoasuogeluk waga logolik, iren hilingitukwa mene re, yi'nogo hilingninabi'lagwi. Iren he, Haren kweang nit wo'nisegen mene ariba nen mugisogo wulakninobagauwogeluk hilingiri'lagwi.

¹² Nineisena Allah re, we Hat hamuat! Nit he niren hilingisu elo'lek mene nek agama re, Haren lebe'nisan iluk Hat hambit wagoma re, niren ap tentara hokho-pokhorogo andoma nen nit noasuogeluk hilingitunem nit he ninomame legen he, haren it unggum wogisan,” iluk samban isikhe.

¹³ At a'nogo samban ugu kwelek he, it afuni Yehuda mene omanogo inagagwi, inagainafuri inom he o Tuhan awi wuri'mo omanogo mendek welagaukwa.

¹⁴ It afuni hokhorogo kabokse'ma omanogo inanggele'ma re ap Lewi mene ekhe enu Yahaziel andi welagaikhe. At andi re hun Zakharia amlogo it inunggulenu Asaf mene a'nogo oba nen he, it ta'larik wagaukwa mene re, hun Benaya, Yeiel, Matanya, andi inambisangma mene welagaukwa. Nen, andem sambul he, at Yahaziel a'nogo Allah aheime oba agaikhesik melalhu kwelek,

¹⁵ Aren ikhi logolik he, ”Ninoe kain lego mene inom, nerugwi nagaila'lak inom, Tuhan nen ikhi logolik he, it ap tentara hokhorogo andi inom he, hiren weim hinom yabugun lek, we At Allah nen enek yabigin enggere, hiren inailo a'luk hinendawi fisu fuk.

¹⁶ It andi inom hit inom he o tonggo andi ambisangma nen leimo o Yeruel horokhogo andoma ambi asugun enggere, it andi o ohealekwe o Zis en lagokhogo lagai wagaikharek fikhit a'nogo nen wagunem he andem en inoasi wulibugun.

¹⁷ Yago, hit afuni Yehuda mene inom, Yerusalem mene inom, hit hinendawi fit la'luk hinailosi fuk. Weim ari re, hit hinom yabugun he lek, hit andem laluk logoino igiba andemat lani. Hit hinoba Tuhan en hinalong mene hilinghinobagagunem hogoin. Tuhan en he hit lebethinabigin enggere weim ari yabi lani!” iluk yagaisasikhe.

¹⁸ A'nogo yagaisasikhemo re at raja Yosafat a'nogo inom, it afuni holhu mene omanogo abirengge inom he ineindep awi yagaisogo Tuhan fogeratukwa.

¹⁹ A'nogo hilingitukwasik he it ap Lewi inap a'nogo inunggulenu Kehat inap inom, Korah inap inom, menlagaukwasik he inagaiyegen hilingiti logolik, it afuni Israel mene ineisena Tuhan Allah a'nogo fogeratukwa.

²⁰ A'nogo hilingitukwasik hubet o weigiluk ugu kwelek, it afuni a'nogo wulibi lagaukwasik he o Tekoa horokhogo leimo omanogo lagaukwa. It lagunem he at Yosafat en wene inoba fikhi logolik he, yi'nogo yagaisasikhe, ”Yago hit afuni Yehuda mene inom, nen Yerusalem mene inom, hit logoin mene andi ambisangma fano agunem hogoin enggere, hit hineisugwi nabi nen yagahisaga mene andi furogo wanino. Nen, it hinaselei mene wagu halok hinendawinggen hambukhogo logobagaigen he, hit hineisena Tuhan Allah ba hinendawinggen tibet feino!” iluk yagaisasikhe.

²¹ At raja a'nogo it afuni holhu mene inom inane seberogo makfesukwasik he aren it ap inebe misik seberogo wuni wulabik lagu inap a'nogo it inaweneba linggene hokho mene halok inasu elokhe misik mene nek labetu mene a'nogo labesuageluk yagaisasikhe. A'nogo yagaisasikhemo re it wuni inane misik seberogo wulafi lagaukwa inap a'nogo re it tentara erarogo lagu inap a'nogo inelokhoma mondok anggilukhogo erarogo laga logolik he, wuni yi'nogo ikhi lagaukwa, Tuhan nen endawi hundik ninabi'lago mene andi re mondok-mondok logogun mane Tuhan andi nek fogerati mondok logouwak,” ikhi lagaukwa.

²² A'nogo it wuni wati lagaukwa inap a'nogo nen wuni ero wulagaisogo watunem he, Tuhan nen it ap inaselei mene inanggelek kwe lakfei wagaikhemo nalek-falek isasikhe.

²³ A'nogo nalek-falek isasikhemo re it a'nogo hebekhogo laga logolik he, ekhe nen ekhe wat fugunem he, ekhe nen ekhe watik, mondok elo'lekhogo wat-wat aga lagaukwa. A'nogo hilingiti logolik he it tentara Amon mene inom, Moab mene inomen he, it tentara Edom mene mondok al perelogo inoatukwa.

²⁴ It a'nogo wat-wat agaukwasik were'ma it afuni Yehuda mene a'nogo o leimo nen ap kagalek were'ma faget o pela wuri'mo aremnogo asi lagaukwasik it inaselei mene fikhit a'nogo kwelagisugunem he, tentara it inaselei mene omanogo we misikhogo ekhe eluk welagi'lek engge ap inebe mondogat waregenek kweangwe pi-pou ugunem hasukwa.

²⁵ A'nogo were'ma isasukwasik he, at Yosafat inom he at agoromi inomen he, it inaselei mene inasunggwe omanogo telogoin iluk lagaukwa. Lagaukwasik kwelakhasukwa re, wam inom, inangge fik-fouk eraluk nikharek engge inom, inasu labetu mene inom, inangge fano-fanongge fena omanogo inom were'ma hinatukwa. A'nogo hinatukwasik he iren he linggene henagan inukhogo sunggwe omanogo kabogeti lagaukwasik he, sunggwe fenakwe hokhorogo werek weregen he, herakfuluk wagaukwa.

²⁶ Inenggi enggaminogo nek enggere, At Tuhan nen hilingitikhe mene omanogo faget he, Tuhan fogerasuogeluk o Fogeratuba Tonggoma andoma kabogetukwa. Andiba re, Tonggo andi enu re, ”Fogeratuba,” salhukwa.

²⁷ A'nogo hilingitukwasik he, it inaselei mene omanogo Tuhan en mondogat inomame leget fisasikhemo re at Yosafat a'nogo nen it tentara omanogo abirengge woginarek he inagaiyegerik o Yerusalem wagaukwa.

²⁸ It a'nogo wagaukwasik he, o kota kwi waga logolik he, it inebe erarogo lak fesukwasik pinggong kecapi inom, trompet inom, anet higik hilingirik lagaukwasik he o Tuhan Awi wuri'no omanogo lagaukwa.

²⁹ At Tuhan nen it afuni Israel mene inaselei mene omanogo inomame legaphogo fisikhi logolik inoatikhe mene a'nogo faget it afuni o negara amu-amu kwe nen inesanggo holhukwasik he, it mondok inailo nek agaukwa.

³⁰ Andiba re, at Tuhan en Yosafat oba aren melalinafukwe omanogo mondogat ap youk mondok legengge fanorogo logouwageluk hilingfisasikhemo re, at Yosafat a'nogo weim abok legengge melalinafu welagaikhe.

At Yosafat en melalinafi lagaikhe mene a'nogo ambisangma hilinglagaikhe wene

³¹ Hun Yosafat andi agaisa re he Azuba hun Silhi a'logo andi. At Yosafat ebe re, umur 35 tahun logolik oba it Yehuda inap inobaget raja menlagaikhasik o Yerusalem andoma 25 tahun melalinafu welagaikhe

³² At eisena Asa nen hilingiti lagaikhe hakhogo re, at Yosafat en hogo Allah eilhanem mondok higithogo nek hilingiti lagaikhe.

³³ Oba nen he, aren it afuni omanogo nen tugwi kembu fogeratu kwe a'nogo mondogat wolelenggen tagalogo fesikhe le'ma re, it afuni Yehuda mene a'nogo nen it inambu-inomba ineisena Allah a'nogoba inendawinggen abirengge nen kabogeti lagaukwa lek.

³⁴ At Yosafat raja logolik melalinafi lagaikhe mene eroma nen pikhit enempul obe hilingiti lagaikhe mene faget he, at Yehu hun Hanani amlogo a'nogo ta'lagaikhe huli hilingiti lagaikhe aple palek werek mene a'nogoba inambuku it Israel inogogwi raja nen hilingiti lagaukwa aple buku palek werek meneba inom palek werek.

³⁵ Linggene misik sambul he, it Yehuda mene inoe at raja Yosafat a'nogo it Israel mene inoe raja Ahazia mondok kwanirek aple nek hokhorogo hilingitarek agun a'nogo inom pali watukwa.

³⁶ A'nogo hilingitukwasik he, it a'nogo e kapal oba re, o Tarsis logoin iluk he, kapal kwi we'luk yasi wagarek oba o Ezion-Geber omanogo iren kapal ekhe wutukwa.

³⁷ A'nogo wutukwaba nen he, at nabi ekhe o kota Maresa mene enu Eliezer hun Dodawa amlogo andi nen Yosafat oba eluabet fikhi logolik he, yi'nogo yagatikhe,” Hun haren at Ahazia hinom pali watepsik inom sebetepma re hun haren e kapal wusigin iluk hilingiti lagen mene andi Tuhan en weagerogo fagaino,” iluk yagatikhe. A'nogo yagatikhemo hilingitunem en he kapal wuti lagaikhe mene a'nogo mondok weagerogo hilinglagaikhemo re it a'nogo kapal a'nogoba kuluk la re mondok elo'lek agaikhe.