2 TAWARIKH 19 - Allah Wene Fano Wene Hupla Inane

Nabi misik ekhe nen Yosafat enggali warogo wenagetikhe wene

¹ It Yehuda mene inoe raja Yosafat a'nogo at oba wene legengge ambotkwe awi eroma o Yerusalem omanogo wagaikhesik were'ma nen he,

² ap nabi misik ekhe enu re Yehu hun Hanani amlogo a'nogo raja ambit wagaikhesik yagati logolik he, ”Haren ap ekhe obabut weak logolik Tuhan abit meneba ebikhit agendik lebethegen andi re, higithogo hilingiten a? Hun hokho haren a'nogo hilingiten andiba re Tuhan a'mage hat hoba fikhesik werek andi.

³ A'nogo meneat he, hun haren fano mene hilingiti lagen mene ekhe weregat. A'nogo andi re neisena haren dewi Asyera afuni nen fogerati lagaikha mene omanogo mondogat waganogo wulak fisegendik, hat hebe Allah endawimo anggikherek mene a'nogo higithogo hilingitu mondok welagen o,” iluk yagatikhe.

Yosafat en agoromi ket mene heragaisogo menfisilik lagaikhe wene

⁴ At raja Yosafat ebe re o Yerusalem welagaikhe, oba nen he aren enggi ekheba re o yi awi ti awi afuni welagaikharekwe omanogo eilenggen kwelagisilik laga logolik he, it inambu-inomba nen ineisena Tuhan Allah fogerati lagaukwa mene a'nogoba inambotkwe hebelogo waga logouwageluk yagaisilik laga lagaikhe.

⁵ Aren he o afuni Yehuda mene werek kwe leget omame hokho mene waganek kwe omanogo hunogo tomok faget he, ap hakim omanogo menfisilik lagaikhesik he,

⁶ wene melalek he yi'nogo yagaisasikhe, ”Hiren unggum pilingi'luk tegeti logogun sambul andi re afuni inenuba tegeti logogun lek, we Tuhan enuba tegeti logogun enggere, hinendawinggen hebelogo hilingiti logoino.

⁷ Nit nineisena Tuhan Allah andi nen he, aben henarogo hilingitik, fena fikhit enek ebikhit agik, inenggi a'makwe heligik, hilingitarek mene andi re, mondok abit anggikherek enggere, hiren Tuhan oba hinailorogo logolik hinendawinggen wenggelogo nek hilingitu nogo,” iluk yagaisasikhe.

⁸ A'nogo hilingitukwasik he nekhengge at Yosafat en he o Yerusalem oba omanogo it ap inunggulenu imam mene inom, Lewi inap inom, it afuni holhu mene inogogwi inom, hakim inom, menfisasikhe. It andi re afuni nen Tuhan awene melalek yi'nogo hilingi'no, ti'nogo hilingi'no, iluk palek werek mene omanogo inom, wene amu mene inom, pilingisogo tegeti logouwageluk menfisilik lagaikhe.

⁹ It andi menfisilik lagaikhe andiba re, at Yosafat en yagaisikhi logolik he, yi'nogo yagaisasikhe, ”Hit hineabu wokhisigirik menhinobagagi mene andi re At hineisena Tuhan oba hinailorogo logolik, hiren yi aple ti aple hilingiti logolik at awene melalek yagaisugu mene andoma higithogo hilingitik, hinendawinggen sakhorek oba hilingitik, ikhi logoino.

¹⁰ Wene hilingiti logogun mene andoma ebe re yi'nogo: Wene warek faget inom, wene melalek werek mene a'nogo sagalogo fugu halok faget inom, wene yi'nogo ikhi logogun iluk palogo werek mene omanogo taganhogo hilingitu halok faget inom, it hinagaila'lak o kota ale'ma nen hit hinambit waluk kwi wagu halok he, At Tuhan en, hit inom, it inom, a'mage hinoba feinogo re, hiren hilingiti logogun mene andoma inelu asuageluk mondok fani fanorogo yagaisugu nogo. A'nogo hilingisugun oba re, iren Tuhan oba weak hilingisugun lek. Hiren wene melalek yi higithogo hilingiti logogun halok he, kwanirek mene hilingisugun lek andi.

¹¹ Allah Wene melalek werek mene omanogo sagalogo fugu halok pilingitu mene faget he, hun Amarya eabu lego mene wenagaisogo figi andi. Nen, Ismael amlogo Zebaja o Yehudaba gubernur werek mene a'nogoba re, yi wene ti wene amu mene hilinglagunem wuretu mene faget eabu lego mene menfigi. Nen it Lewi inap he wene katokhogo palhi logogun oba andi higithogo halogo hinobagakhi logouwageluk fisigi. It ap wene katokhogo palhik, higithogo hilingitik ikhi logogun mene andi re, we At Tuhan nen enek ferinarek logouwak!” iluk yagaisasikhe.