2 TAWARIKH 18 - Allah Wene Fano Wene Hupla Inane

Hun Ahab endawi wenggelogo iluk nabi Mikha nen yagatikhe wene

¹ It afuni Yehuda mene inoe Yosafat a'nogo enggi werek agik, enu yi awi ti awi saga igik, ikhi logolik he, at eisok erokwe mene misik ekhe re hun Ahab it Israel mene inoe raja a'nogo eisok erokwe mene misik ekhe inom lombot fisasikhe.

² A'nogo hilingfisasikhesik tahun pire henagan hakhogo ekhe welagaikhesigen he at Yosafat a'nogo hun Ahab o kota Samaria andoma were'ma halagain iluk lagaikhe. A'nogo lagaikhemo re at hun Ahab en he it Yosafat agoromi inom lagaukwa mene a'nogo hai warogo liakfisikhi logolik iluk he, seni isasigiluk logolik wam domba inom sapi inom, hokhorogo wa'ni iluk yagaisasikhe. Iren a'nogo hilingiti logolik andi re at Yosafat en he o kota Gilead oba nen o Ramot a'nogo inoasi louwogen iluk mimingiti logolik he,

³ aren yi'nogo heinok wokhasikhe, ”Hat he an ninom o Ramot andoma inoasi logoin hendawimo anggegen a, habira?” iluk heinok wokhasikhemo re, at Yosafat en onggo ikhi logolik he, ”Fano o, tentara an nagoromi mene inom, hat hagoromi mene inom, misik lambulogo weim yabi kuogo.

⁴ Oba nen he niren Tuhan oba tak heinok wokhouwogo,” iluk yagatikhe.

⁵ A'nogo yagatikhemo re at Ahab en it ap nabi inebe 400 nen kabogerinafikhesik heinok wogisikhi loglik he, ”An o Ramot andi inoasi lagain fano a, lega?” iluk heinok wogisasikhe. A'nogo isikhemo iren ikhi logolik he, ”O kota andi re Allah nen hat henggiba fagain enggere, lagain fano o,” iluk yagatukwa.

⁶ A'nogo isukwaba nen he at Yosafat en heinok wokhikhi logolik he, ”O yoma re ap nabi nit faget Tuhan oba heinok wokhoageluk he ekhe werega lega?” iluk isikhe.

⁷ Andi isikhemo re at Ahab en onggo ikhi logolik he, ”Hun Yimla amlogo Mikha andi nek misik ekhe werek. Oba nen he aren he an nobaget fano mene ekhe yi'nogo asigin iluk ekhe yaganeti'legengge re weak mene nek ugu nen he, at faget he an nabitsek welagi,” iluk isikhe. Andi isikhemo re at Yosafat en ikhi logolik he, ”Ahwi, a'nogo ugu lek!” iluk yagatikhemo,

⁸ hun Ahab en he ap pegawai misik ekhe wolhasikhesik mimingiti logolik he, ”Weak-weak hun Mikha a'nogo hondosi lan o,” iluk yagatikhe.

⁹ A'nogo mimingitikhemo lagu kwelek he, andem oba re at Ahab inom Yosafat inom aremnogo re o Samaria kwe hokho mene ambe pale'ma kwi lagaikharek oba elokhoma gandum enggen lolhi lagaukwaba aremnogo inasu it ap raja nen labeti lagaukwa su labetukwasik he kursi it ap raja hurek werek oba aremnogo hu'lagaukwasik welagaukwa. A'nogo hurek were'ma it nabi omanogo nen yi'nogo hilinglasigin ti'nogo hilinglasigin iluk yagaisikhi lagaukwa.

¹⁰ It nabi omanogo inanggele'ma nen ap misik ekhe enu Zedekia hun Kenaana amlogo a'nogo nen he, posiemanggen meneba andimuk hangge hilingitikhesik he, aren hun Ahab yagati logolik he, ”Tuhan nen ikhe mene re yi, it ap Siria mene hinom weim yabugun sambul andi re, hun hokho haren he, andimuk yi hak meneba opnaginabigin ikhe o,” iluk yagatikhe.

¹¹ A'nogo yagatikhemo re it nabi fena mondogat a'nogo nen inane seberogo isukwasik he, iren ikhi logolik, ”Tuhan nen he hun hat hebikhit homamet hobagaumo hilingisigin mene andi ambisangma mondogat hilinglasigin enggere, o Ramot andi, hou sali kwin o,” iluk yagatukwa.

¹² It a'nogo ugu kwelek a'nogo re at Mikha hondosi loageluk lakfesukwa mene a'nogo nen Mikhaba ikhi logolik he, ”It nabi fenakwe mondogat andi nen he at raja along asigin mene faget aganggere, niren ogo hak neisena haren ogo at raja ba asigin mene andoma fano asigin mene ekhe inomat yagaom o,” iluk yagatikhe.

¹³ Oba nen he at Mikha nen ikhi logolik he, ”Neisena Tuhan eluk werek mene oak, an he At Allah nen yaganesigin mene nek igin o!” iluk isikhe.

¹⁴ A'nogo isikhesik at Mikha nen he, ”Tuhan nen hun hokho hebe halongap hobagaginmo re hat hoba ambisangma fano nek hilinglasigiluk werek, enggere inoasi kwin o,” iluk yagatikhe.

¹⁵ Oba nen he at Ahab en onggo ikhi logolik he, ”Haren Tuhan enuba an wene yaganesigiluk halok he, eberogo mene nek yagane'no; An nen wene andi faget he nenggi miren oba heluet hobagi nogo?”

¹⁶ Isikhemo re at Mikha nen onggo lagokhogo ikhi logolik he, ”It afuni Israel mene a'nogo re domba gembala halhu mene le'ma hilingitarek hakhogo tomkwe omanogo linggi-longgo agama isigi. Nen, Tuhan nen it faget ikhi logolik he, It afuni yire inogogwi melalinafu mene lek enggere, we inaiba selekhogo loak, ikhi laga o,” iluk yagatikhe.

¹⁷ Andi isikhemo re at Ahab en Yosafat oba ikhi logolik he, ”At andi re an nobaget asigin aple iluk ikhi logolik halok he, fano mene ekhe igi'legengge re mondok weak mene nek ili'lago o! Iluk igi a'nogo re eberogoat andi hegen a?” iluk isikhe.

¹⁸ Mikha nen ekhe inom ikhi logolik he, ”At Tuhan a'nogo re takhta at ebe hurek werek oba pogoroba omanogo hurek were'ma it ayonggo lakfisikherek mene malaikat omanogo re era'lukwe mendek were'ma isigi. Nen, yogondak he At Tuhan nen ikhe mene yi hinesanggo holini!

¹⁹ At Tuhan nen heinok wogisikhi logolik he, hun Ahab andi o Gilead oba nen Ramot andoma weim yabi lamo wa'lasuakhogo re, an lagain iluk endawimo anggoakhogo re hat sa nen endawimo kagali lagain? Iluk heinok wogisugunemen he, it malaikat omanogo nen onggore agaum fagaumhogo ugunem isigi.

²⁰ A'nogo aga agare ambisangma nen he munggwat heimengge misik ekhe weinam asi wagasik, aren Tuhan era'lu horokhogo aremnogo menlasi lagaikhesik ikhi logolik he, At endawimo an nen kagali lagain o, iluk ikhi laga higi. A'nogo ugunem he At Tuhan nen heinok wokhikhi logolik he, ’Haren he ninggi'nogo hilingiten hilingisu hale?’ iluk heinok wokhugunem he,

²¹ munggwat heimengge a'nogo nen onggo ikhi logolik he, ”An lambik he Ahab mene nabi andoma mondogat inane ineranhogo wene uageluk hilinginabi lagain o,” iluk ikhi laga. A'nogo ugunem he At Tuhan nen he, Haren endawimo kagalumo ambisangma fano asigin enggere, andi fano o, a'nogo hilingisi lan, iluk yagatunem higi o,” iluk yagaisasikhe.

²² A'nogo yagaisasikhesigen he nekhengge at Mikha nen ikhi logolik he, ”Tuhan nen he hun hokho hat hoba enggin-fenggin hobagagin iluk mondok webet fikhemo re, haren hagoromi nabi oma nen ineranen wene uageluk Tuhan nen hilinghinobagaikhe menere a'nogo aga andi!” iluk yagatikhe.

²³ A'nogo isikhemo re at nabi Zedekia a'nogo hun Mikha era'lu aremnogo menlagaikhesik yagati logolik he, ”Tuhan Areagun andi nen he an hera'nobagaluk hat hoba elok ane yagahesu hak nogo a?” iluk he Mikha elokheba enggi nen lambukhogo watikhe.

²⁴ A'nogo watikhemo at Mikha nen onggo yagati logolik he, ”Harogo o senggelek ekheba kuluk hinago logolik were'ma andoma ambisangma hilinglasigin mene enek hagain nogo!” iluk yagatikhe.

²⁵ A'nogo isikhemo re at raja Ahab en yagaisikhi logolik he, ”Ap andi fak feni! Fak fembik he o kota halherek agun hun Amon a'nogo inom, raja amlogo a'nogo inom, inoba wogisa lani.

²⁶ Wogisa lamo re, iren ap hele warogo kwelaginafarek oba omanogo kwelakfembik he, an weim yabi lambik nebe oan wagi'lek kwelek andem he, sumburu inom i inom he we endebengge nek wogeti logoino,” iluk yagaisasikhe.

²⁷ A'nogo yagaisasikhemo re at Mikha nen ane hokhoba yagati logolik he, ”Hun hokho hebe heluk hambotkwe wagen halok he, Tuhan ane an noba ikhe le'ma iluk helu asigin o, Nen it afuni mondogat werek mene ya ineil hanim yagaheti andi o,” iluk isikhe.

Ahab ebe wa'lagaikhe wene

²⁸ A'nogo hilingitukwasik he raja Israel mene Ahab a'nogo inom, raja Yehuda mene Yosafat a'nogo inom he, o Gilead en kota Ramot a'nogo inoasi logoin iluk lagaukwa.

²⁹ Lagaukwasik he, ”Hat he su hebe raja logolik laberek welagen mene a'nogo laberogo logoino, nen an he ap we mene hakhogo asimbik hinak-hinak it ari ninom weim yabi kwigin,” iluk yagatikhesik he at raja Israel mene a'nogo weim yabigiluk he, hinak-hinak inom yabi kwisukwa.

³⁰ Andem oba re it Siria inap sikhe fisogo mene no kereta ba kuluk weim yabi lagaikharek inap inogogwi panglima omanogo inoba inoe raja nen yagaisikhi logolik he, ”Hit weim yabuogeluk he it ekhe hinom yabu fuk, we ap Israel mene inoe raja andi hinom enek yabino o,” iluk yagaisasikhe.

³¹ A'nogo yagaisasikhemo re it a'nogo nen raja Yosafat ineil hasukwasik he ari re raja Israel mene iluk he at wasugun iluk lagaukwa. Oba nen he at Yosafat a'nogo ane kwerik lagu nen he Tuhan Allah nen he it a'nogo inelokhe amu fikhit halogo lakfisikhi logolik he, at Yosafat a'nogo telogo wulabi wagaikhe.

³² Nen, it Siria inap tentara omanogo nen he andi re raja Israel mene re fuk iluk anggilik laga logolik he iren hun Yosafat wasugun iluk hilingitukwa mene a'nogo herak fesukwa.

³³ A'nogo hilingiti logolik he, it tentara Siria mene misik ekhe nen he we ap inoba fut fisigi'lengge yugunat tok ekhe pisinghogo lak fesikhe re at kain Ahab a'nogo asu tok noasinogoluk laberek welagaikhe mene a'nogo wurep seleben sek kwe nen fo'lokhogo re ebe wasi lagaikhe. Tok a'nogo warogo re at Ahab en amingmingengge at angge kereta waluk laga logolik halhi lagaikhe mene a'nogoba re, ”An tok warek welagi! Enggere, yoma nen wo'narek wulibi lan!” iluk yagatikhe.

³⁴ Oba nen he weim yafi lagaukwa mene omanogo mondok palu elo'lekhogo hilingiti logolik tok ambisang enek wut watunem he, at raja Ahab a'nogo re angge kereta ba alokhogo logolik elokhe it tentara Siria mene fikhit hilingik logolik mendek welagaikhe. A'nogo were'ma nen o mo arat ubuk ugu kwelek enek he at ebe mondogat wa'lagaikhe.