2 TAWARIKH 17 - Allah Wene Fano Wene Hupla Inane

Yosafat raja menlagaikhe wene

¹ At Asa a'nogo mondogat wa'lagaikhemo re obali'mo at amlogo Yosafat a'nogo it afuni Yehuda mene inobaget raja menlagaikhesik it afuni Israel mene inom, weim yafi logogiluk aren omameet fakhikhi logolik he,

² o it afuni Yehuda mene were'ma nen leget pak leget omamerogo waganek kwe andoma o kota-kota mondogat inom, o it Yehuda mene were'ma andoma nen endakwe fikhit andoma kota werek mene omanogo inom, kota o wilayah Efraim oba nen eisena nen telhikhe mene omanogoba inom, tentara fisilik lagaikhe.

³ At Yosafat andi re eisena Daud nen hilingiti lagaikhe hakhogo hilingiti logolik tugwi kembu fogerati'lek, Allah obaget enek hilingitik, it ap Israel mene inogogwi raja logolik,

⁴ hilingiti lagaukwa mene omanogo hakhogo hilingiti'legengge, aren Allah wene melalek a'nogo furogo hologo hilingitik, hilingitunem at Tuhan nen Yosafat fanoabet fikhi lagaikhe.

⁵ A'nogo hilingfugunem he at Yosafat en melalinafi lagaikhe awi o kerajaan andiba Tuhan nen omamet fikhi lagaikhe. Nen it afuni Yehuda mene mondogaren he at raja Yosafat faget yi mene ti mene wogosi wagu were'ma re at enggi werek hilinglagik, afuni nen along anggaluk legeisogo figik, ikhi lagaukwa.

⁶ At endawinggen sebelek logolik Tuhan nen yagatikhe mene a'nogo higithogo hilingiti lagaikhe andiba re, aren kembu he mene enu dewi Asyera it Yehuda mene were'ma a'nogo inom, nen kembu fogerati lagaukwa kwe omanogo inom mondogat halik halokhogo hilingfesikhe.

⁷ A'nogo hilingiti logolik he, at ebe raja menlagaikhesik melalinafi lagaikhe mene a'nogo tahun henaganek meneba asi lagaikhemo re, o kota andi afuni Yehuda mene welagaukwa kwe omanogo Tuhan nen wene melalek yi'nogo hilingi'no ti'nogo hilingi'no iluk palek werek mene a'nogo yagaisa loageluk it pemerintah yabu legoma hurek inap omanogo lak fisilik lagaikhe. It lakfisasikhe inap andi inenu re: Benhail, Obaja, Zakharia, Netaneel, Mikha inom andem.

⁸ It andi lakfisasikhemo lagunem he it inom he ap Lewi mene inebe sogo nen mene inom, it imam inebe pire mene inom lagaukwa; It andem inenu re: Semaya, Netanya, Zebaja, Asael, Semirabot, Yonatan, Adonia, Tobia, Tob-Adonia inom lagaukwa. Nen, it ap imam pire andem he Elisama inom he Yoram inom.

⁹ Iren he buku Tuhan awene melalek palek werek mene a'nogo waluk he o kota-kota it afuni Yehuda mene welagaukwa kwe yi kwe ti kwe omanogo mondogat yagaisilik lagaukwa.

At Yosafat along welagaikhe aple a'nogo

¹⁰ Tuhan nen he o kerajaan mondogat it afuni Yehuda mene were'ma nen horok-horokwe welagaukwa mene omanogo re raja Yosafat inom weim yafu aple faget inailot fisasikhe.

¹¹ It afuni Filistin inaben at agaiyekhogo iluk he perak inom, amungge inom, hokho pokhorogo wogosi wagaukwa, nen it afuni o Arab mene nen he wam domba ebe 7.700 nen inom, kambing ebe 7.700 nen inom wogosi wagaukwa.

¹² At Yosafat en he o it afuni Yehuda mene were'ma omanogo leget pak leget omame mondok hokho mene inom, yi mene ti mene foukhogo fuguba inom, mondogat wurik lagaikhe. Andiba re at Yosafat a'nogo ekhe sambul ekhe sambul mondogat omame hokho aga lagaikhe.

¹³ Aren he o omanogo a'nogo wutfesikhesik he sumburu yi mene ti mene nunggu mene faget o elonggoma andoma mondok hokho-pokhorogo kwelabik laga lagaikhe. Nen, o Yerusalem oba andoma re ap tentara inogogwi lego mene perwira omanogo mondok sikhe inenggi puk mene nek,

¹⁴ inagoromi it inunggulenu hilingik higithogo fisilik lagaikhe. Hun Adna andi re it Yehudaba andoma nen inunggulenu akhogo hilingik welgaikhe mene omanogo faget inoe panglima lego mene welagaikhe. Aren he it ap tentara inebe 300.000 nen melalinafi lagaikhe.

¹⁵ Ap pirenek mene ekhere enu Yohanan andi, at he it ap tentara inebe 280.000 nen faget inoe kepala welagaikhe.

¹⁶ Ap henaganek mene re, hun Amasia hun Zikhri amlogo andi, (Hun Amasia ebere we endawi fano nen Tuhan obaget hilingiti logogin iluk hilingiti lagaikhe agun.) Aren he it ap tentara inebe 200.000 nen faget inoe kepala welagaikhe.

¹⁷ Nen, it afuni inunggulenu Benyamin oba omanogo ineisok erokwe mene lambulogo omanogo inobaget inoe panglima re, hun Elyada welagaikhe. At andi re weim yafu aple faget mondok hebelek agun welagaikhe. Aren he it ap tentara inasikhe inom, inandok ma'mungge inom inenggimo weregenek mene inebe 200.000 nen melalinafi lagaikhe.

¹⁸ It inunggulenu misik seberek welagaukwa mene andiba nen ap pirenek mene re hun Yosabad andi, Aren he it ap tentara inasikhe inom, mondok lik-louksek mene inebe 180.000 nen melalinafi lagaikhe.

¹⁹ It ap andem he o Yerusalem andoma logolik yabu hilingiti lagaukwa inap, oba nen he it werek kwelek ap fena re o wilayah Yehuda meneba nen o leget pak leget omamerogo waganek kwe omanogo inagoromi esa logalhigik, fisilik lagaukwa.