2 TAWARIKH 15 - Allah Wene Fano Wene Hupla Inane

Hun Asa nen o halogo kerabenggerik lagaikhe wene

¹ Hun Oded amlogo nabi Azarya a'nogo Allah areagun oba louk isikhemo re,

² hun Raja Asa ambit lagaikhesik aren ikhi logolik he, ”Noe raja Asa hebe inom, it afuni Yehuda mene yoma inom, Benyamin mene inom, hinesanggo fanorogo holini o! Hit hinebe Tuhan hinom horokhogo welagep halok he, At ogo hit hinom horokhogo werego. Nen hiren nit yi ninggi'nogo hilingisugun anggaluk kino ugun halok he, Aren ogo onggo higithogo lebethisikhi logogin aro. Oba nen he hiren At a'nogo hinonggot a'luk hilingitep halok he, Aren ogo hit hinoba onggoret hinobagaginat.

³ It afuni Israel mene a'nogo re o inenggi aninurogo andoma Allah eberogo mene a'nogo obaget hilingiti legengge welagik, inawene melalek it hologo hilingitu mene ogore, legengge welagik, it inogogwi imam en it yagaisugu mene ogo legenggeat welagik, hilingik welagaukwa.

⁴ Oba nen he it inoba enggin agunem aremnogo nek he, it afuni Israel mene ineisena Tuhan Allah a'nogo nen lebetninabuageluk kino igik, Aren yi'nogo hilingi'ni ti'nogo hilingi'ni iluk yaganisoageluk kino igik, hilingitunem Aren inane hologo leberisikhi lagaikhe.

⁵ Andem sambul he it afuni o yi awi ti awi andoma mondogat weak mene nek hilingitunem he la mondok elo'lek welagaukwa.

⁶ At Allah nen it afuni inanggele'ma nonghonget isugunem he, it inunggulenu ekhe mene nen he, inunggulenu ekhe mene sebelinarek welagik, o kota ekhe nen he kota ekhe sebelinarek welagik, hilingiti lagaukwa.

⁷ Oba nen he, hiren hilingiti lagep mene andi re ambisangma fano agunem hogoin enggere, hinendawinggen hambukhogo logolik, hinailo lekhogo logoino,” iluk yagaisasikhe.

⁸ A'nogo isikhesik he at hun Oded amlogo Azarya a'nogo nen ugunem at Asa nen esanggo holhikhesik he agaiyegen endawimo abolok isikhemo re aren he o Efraim tomkwe kota sebelogo fisasukwa mene omanogo inom, o it afuni Benyamin mene inom, Yehuda mene inom werekwe omanogo nen tugwi kembu welagaikhe mene omanogo mondogat waganogo wulakfisasikhe. A'nogo hilingitikhesik he aren Tuhan obaget warogo nolhuba obalik mezbah o Tuhan Awi wuri'mo a'nogo nen senggelek elokhoma mene a'nogoba welagaikhe mene a'nogo re fanorogo halogo fesikhe.

⁹ It afuni Efraim mene inom, Manasye mene inom, Simeon mene inom, a'nogo nen hasukwa re Tuhan nen at Asa lebethugunem hasukwasik he, o wilayah at Asa nen melalinafi lagaikhe kwe kerajaan a'nogoba logogun iluk it inebe mondogat at Asa ambit sebesi wagaukwa. Sebesi wagaukwama re at Asa nen it afuni Yehuda mene inom, Benyamin mene inom, o Yerusalem kabogesi we'ni iluk yagaisasikhe.

¹⁰ Andem oba re hun Asa o kerajaan andiba melalinafu tahun 15 meneba were'ma tugi henaganek mene werek kwelek it afuni omanogo andoma kabogesi wagaukwa.

¹¹ Kabogesi wagaukwasik he, linggene andi sambul he Tuhan obaget wam sapi ebe 700 nen inom, domba 7.000 nenat inom, weim yabi lagaukwasik telaluk wagaukwa mene omanogo warogo noletukwa.

¹² A'nogo nolhukwasik he iren wene wati logolik he, ”Nit ninebe ninendawinggen abirengge re, nineisena Tuhan, nit ninambu ninombalagen fogerati lagaukwa mene Tuhan Allah a'nogo endawimo anggili'lago mene higithogo hilingiti logogun o,” iluk wene wanogo fesukwa.

¹³ Iren ikhi logolik he, ”Ap ogo, hemi ogo, yaman mene halok ogo nen souge mene halok ogo, Tuhan endawimo anggili'lago mene hologo higithogo hilingitu lek halok he at oba wene fuluk ebe pinggi wasugun o.”

¹⁴ Iluk ikhi logolik he mel isukwa, ”Niren wene wato mene andi furogo fisogo logogun o,” iluk inane hokhorogo Tuhan enuba hombuk palhukwa. A'nogo isukwasik he iren inagaiyekhogo anggiluk kwelafi logolik trompet futi lagaukwa.

¹⁵ Iren he hombuk palho mene andi ninedawimo nen eberogoat hilingito iluk he, it afuni Yehuda mene mondogat inagaiyegetukwa. A'nogo hilingiti logolik he iren Tuhan obaget wene kabogetu mene faget ogo inagaiyekhogo hilingiti lagaukwama re At Tuhan nen ogo it woginafu aple endawimo agaiyek a'luk he, it inawi werek oba wilayah omanogoba inendawimo youk legengge inailo legengge logouwageluk hilingfisasikhemo welagaukwa.

¹⁶ A'nogo hilingitukwasik he, at hun raja ombalo enu Maakha a'nogo nen kembu he mene enu dewi Asyera kweang yi mene ti mene heiseli'lago mene iluk mondok weak hokhorogo hilingiti lagaukwa mene a'nogo alik hilingisogo wutikhe andi nen he, at ombalo andi eabu re he raja agaisa iluk u hak he Ibu Suri agarek mene a'nogo halokhogo leget fisasikhe. A'nogo leget fesasikhesik he at Asa nen kembu alik waganek a'nogo o Lembah Kidron andoma nen eraphogo nolhikhe.

¹⁷ At Asa nen he o kweang at welagaikhe meneba andoma re afuni inanggembu fogeratarek kwe omanogo mondogat weaget fisasikhe lek oba nen he, at Asa eluk welagaikhe huli andi re aren Tuhan oba tiphogo mondok welagaikhe.

¹⁸ Emas, perak inom weim yafi logolik telhukwa mene omanogo re eisena nen mene inom, aren mene inom, Tuhan angge logouwageluk Tuhan Awi wuri'mo omanogo fei kwisikhe.

¹⁹ At hun Asa nen melalinafu werek kwelek enek he 35 tahun welagaikhe huli andi re o andomaba weim abok ogo mondok legengge welagaukwa.