2 TAWARIKH 14 - Allah Wene Fano Wene Hupla Inane

Raja Ahas nen it inunggulenu Sadan mene inomame lek hilingisogo fisasikhe wene

¹ At raja Abia a'nogo wa'lagaikhemo o kota Daud aiba it ap raja salinafi lagaukwaba omanogo salfesukwa, at obali'mo re at amlogo Asa a'nogo raja menlagaikhe. At Asa menlagaikhesik melalinafi lagaikheba andem he o afuni Yehuda mene were'ma andoma 10 tahun andiba yi wene ti wene legengge we liok-layokhogo mondok welagaukwa.

² Hun Asa nen he fano mene nek hilingitik, higithogo nek hilingitik, ugunem he eisena Tuhan Allah endawimo agaiyegerati lagaikhe.

³ Aren he it afuni inunggulenu amu mene nen wam warogo nolhi lagaukwa mene inom, iren kembu wuti lagaukwa mene inom, hambokhogo enda'ma hugisigik, kembu dewa alik hilingik mene omanogo halik-halokhogo hilingfisigik, kembu inagaisa dewi Asyera wurogo menfesukwa mene a'nogo tamakhogo lakfisigik, hilingitikhe.

⁴ Aren it afuni Yehuda mene inoba yagaisikhi logolik he, hit hinambu-hinomba ineisena Tuhan Allah andi endawino anggikherek mene higithogo nek hilingitik, At ane yagahisili'lago mene a'nogo inom, At awene melalek werek mene a'nogo inom, hologo hilingitik, hilingiti logoni o, iluk yagaisikhi lagaikhe.

⁵ Aren he kembu wutuba obalik omanogo inom, inanggembu obaget amben fanongge iluk nolhi lagaukwa kwe omanogo inom, o Yehudaba omanogo nen mondok waganogo wulakfisasikhe. A'nogo hilingitikhemo re o kerajaan Yehuda ba andoma aren melalinafi lagaikheba andem he youk mondok legengge welagaukwa,

⁶ andiba re it afuni Yehuda mene faget o kota andoma leget pak leget mondok omamerogo wurik lagaukwa. Tuhan nen o andoma youk legengge inoba fanorogo nek logouwageluk wogisasikhemo re tahun miren hakhogo re weim yafi'lek fano lioksek mondok welagaukwa.

⁷ A'nogo logolik he, at Asa nen it afuni Yehuda mene inoba ikhi logolik he, ”Niren nineisena Tuhan Allah a'nogo endawimo anggikherek mene higithogo hilingiti lago andiba re o yi niren sebelek logolik welago. Nen, aren he nit halogo ninobagagik, o kweang yiba abirengge yi wene ti wene legengge logouwageluk fetninarek welagik, ili'lago. Enggere niren o it afuni Yehuda mene werekwe kota omanogo leget pak leget omamerogo wanhik, ap lagaluk futi logolik werekwe wutik, kwe ambe palek hokho mene kwi wagukwe a'nogo e lang oak inom, nunggulik mene inom, omamerogo wutik uogo,” iluk yagaisasikhe. A'nogo yagaisasikhemo re iren yabu a'nogo hilingisugun mene erotukwasik, hilingitunemen enek he ambisangma mondok fanorogo nek hilingirik lagaukwa.

⁸ Hun raja Asa andi agoromi tentara welagaukwa mene re, it Yehuda mene nen ap tok ma'mungge inom, sige kabelek inom, inenggimo werek mene re inebe 300.000 nen, nen it Benyamin mene nen ap tok ma'mungge inom, sikhe inom, togengge inom, fago welagaukwa inap he inebe 280.000 nen welagaukwa. It inebe lambulogo re mondok milil-melalsek inap logolik, inailo lek inambok siserogo nek hilingitu inap welagaukwa.

⁹ Linggene misik sambul he ap mene ekhe awi Sudan agun enu re Zerah andi nen he agoromi tentara mene inebe satu juta nen inom, nen angge kereta amboloba lagaluk weim yafarek mene re 300 nen inom, he o Yehuda pin kwi wagaukwa. A'nogo kwi wagaukwasik andoma nen wagaukwa-wagaukwa re o Maresa huli andoma asi wagaukwa.

¹⁰ A'nogo asi wagunem he hun Asa a'nogo ogore at Zerah inom weim yabigiluk he wulibi lagaikhesik, it inebe tegelhik esa inamu-inamu o Zefata tonggoma o Maresa horokhogo andoma folhukwa.

¹¹ A'nogo folhukwasik he at Asa nen eisena Tuhan Allahba samban ikhi logolik he yi'nogo isikhe, ”Tuhan Allah neisena, afuni inomame werek mene inoba re, it inomame lek mene re we Haren enek leberinafi lagenma re, yogondak Harenat nit lebetninabin o, nineisena. Nit he Hat hoba nek lomborogo logolik, Hat henuba, it ap inasikhe werek inap esa mondok hokho mene yi ninom weim yabuogeluk wulifi lago yi. Tuhan, nit nineisena Allah we Hat hamu welagenma re, Hat hebe afuni nen mabenet hobagagun lego, neisena,” iluk samban isikhe.

¹² A'nogo samban isikhesik he Asa inom, agoromi tentara inom a'nogo it Sudan inap inom weim yabi wulifukwama nen he, Tuhan nen it tentara Sudan mene mabenet fisasikhemo re inailo nen heise wulifukwa.

^13-14 A'nogo wulifunem he at Asa agoromi tentara omanogo inomen he it a'nogo muginarek lagaukwa-lagaukwa re o Gerar huli andoma mugusogo fisa lagaukwa. At Tuhan nen inom, it tentara Yehuda inaben inom, mondok warogo fisasukwama re it Sudan inap fikhit he ap inebe hokhorogo wa'lagaukwa, nen it inangge yi mene ti mene ogo hokhorogo telasukwaat. Andi nen he At Tuhan nen it afuni o kota wilayah Gerar oba welagaukwa mene andoma mondok inailo hokho mene hilingfisasikhemo re it inawi mondogat weak-peakhogo hilingfisasukwa. A'nogo hilingfisasukwasik he it tentara Yehuda mene nen he o kota andiba nen inangge yi mene ti mene hokhorogo telasukwa.

¹⁵ Nekhengge it a'nogo nen he ap wam tati logolik inawi sabu salhigik welagaukwa kwe omanogo pin kwi laga logolik he inanggo domba inom, unta inom, hokhorogo hogouk eraluk wagaukwa. A'nogo mondogat hilingfisasukwasik enek he it a'nogo inambotkwe inaiba o Yerusalem wagaukwa.