2 TAWARIKH 12 - Allah Wene Fano Wene Hupla Inane

It Mesir inaben Yehuda inap inoasi wagaukwa wene

¹ At Rehabeam Raja menlagaikhesik a'nogo re ebe mendek werek oba o kerajaan a'nogo omamerati logolik he, at inom it afuni Israel mene mondogat inomen he Tuhan awene melalek omanogo sagalogo fikhi logolik he,

² At oba tiphogo hilingiti'lek, hilingiti lagaukwa. Andiba re Tuhan nen it unggum inoba fesikhe. At Rehabeam raja menlagaikhesik melalinafi lagaikhe huli re tahun enggaminogo welagaikhesik, fuabenggeba re at raja Mesir mene hun Sisak a'nogo agoromi kereta ba weim yabik lagaikharek mene re inebe 1.200 nen inom, nen tentara kuda ba

³ lagaluk weim yabik lagu mene re inebe 60.000 nen inom, it sikhe fisogo inap esa-esangge mondok wenasu elo'lekhogo inom, it Libia inap sikhe fisogo inap inom, Suki, Sudan mene inom, wagaukwasik o Yerusalem pin kwi wagaukwa.

⁴ Kwi wagaukwasik he it afuni Yehuda mene nen o kota leget omamerogo waganek mene omanogo mondogat sebelik-sebelik he o Yerusalem huli fei lagaukwa.

⁵ Andem oba re it afuni Yehuda mene inogogwi melalinafu mene omanogo inom, at raja Rehabeam inom he, hun Sisak a'nogo inailo nen he wulifukwasik o Yerusalem kabogesi lagaukwa. It a'nogo kaboksek were'ma re at nabi Semaya inambit wagaikhesik yagaisikhi logolik he, ”Tuhan Ane re yi'nogo ikhe, Hit he An nobagaluk enek laga-lagep andi nen he, yogondak he, An nen ogo hit herak-hinobagagimo re, at Sisak a'ma asuogeluk welagep andi, ikhe,” iluk yagaisa lagaikhe.

⁶ A'nogo yagaisa lagaikhemo re at raja inom it afuni inogogwi melalinafi lagaukwa mene omanogo nen he, nit he mondogat weak hilingitoma o, iluk fagetukwasik he, iren ikhi logolik, ”At Tuhan nen wene ikhe andi re mondok higithogoat ikhemo o,” iluk isukwa.

⁷ Iren isukwa mene a'nogo Tuhan eilenggen isasikhe re inendawi mondok sebel fakhasukwasik ugunem isasikhesik he, Aren Semayaba ikhi logolik he, ”Iren nit weak hilingito iluk mondogat fagetama re An nen it weak-weak telinabigiluk welagi o. Nen An nen it inebe legaphogo fisagain lek. O Yerusalem ogore weaget fagain legat.

⁸ Ariginik oba nen he, iren An nobaget hilingiri'lagwi mene inom, afuni kweangma mene inomameba hilingiri'lagwi mene inom, enek hoageluk he at Sisak a'ma hinobagagin, ikhe yagaisano,” iluk yagatikhe.

⁹ A'nogo isukwasik hilingitunemen he at Raja Sisak a'nogo o Yerusalem pin kwi waga logolik he, yi mene ti mene onggo hokho mene o Tuhan Awi wuri'mo omanogo inom, at Raja awi wuri'mo omanogo inom, nen at hun Raja Salomo nen tok ma'mungge perisai emas meneba hilingitikhe mene omanogo inom, mondogat hugul hela kwisukwa.

¹⁰ A'nogo helasukwama re at Rehabeam en he raja obali'mo iluk he no perunggu meneba hilingitikhesik he it ap sikhe fisogo mene inogogwi perwira o hun raja awi silimo kwi laguba kwe ambe hokho meneba andoma kagalek welagaukwa mene nen halhi logouwageluk wogisasikhe.

¹¹ A'nogo wogisasikhemo re linggene hundik-hundik omanogo re at raja a'nogo Tuhan Awi wuri'mo lagunem he it ap at along palogo laga lagaukwa mene omanogo nen tok ma'mungge omanogo waluk laluk he nekhengge o ap kagalek werek oba a'nogo fei waga lagaukwa.

¹² Nen at raja a'nogo Tuhan a'ma sebelfakhasikhemo re, Tuhan Allah a'mage lagasikhe mene a'nogo lek agik, weaget fagain iluk wenggelhikhe mene a'nogo herak figik isikhe. Andi nen he it Yehudaba andoma wene fano mene ekhe welagaikheat.

Hun Rehabeam raja logolik hilingiti lagaikhe mene horokhogo yi

¹³ Hun Rehabeam agaisa re he Naama o Amon he a'nogo. At Rehabeam ebere umur 41 tahun were'ma raja menlagaikhesik he, aren o wilayah it afuni inunggulenu Israel mene werekwe omanogo nen o kota Yerusalem afuni nen wene kabogeti logogun oba iluk At Tuhan nen wenagaisogo fesikheba omanogo, 17 tahun raja mendek logolik melalinafu welagaikhe. A'nogo o Yerusalem oba andoma at Rehabeam en melalinafi logolik were'ma re at omame hokho mene welagaikhe.

¹⁴ At Rehabeam en he Tuhan endawimo anggikherek mene a'nogo higithogo hilingiti legengge, kwanirogo nek hilingiti lagaikhe.

¹⁵ At Rehabeam logolik eroma nen hilingirik erembulmo andi re buku sejarah it attak andoma hilingiti lagaukwa mene iluk hun nabi Semaya ambuku ba inom, buku sejarah hilingiti lagaukwa mene hun nabi Ido ambuku ba inom andoma palek werek. At Rehabeam hilingi'luk Yerobeam hilingi'luk andem he hundik-hundik weim yak-yak enek hilingiti lagaukwa.

¹⁶ At Rehabeam a'nogo wa'lagaikhemo re o kota Daud aiba omanogo it ap raja salinafi lagaukwaba andoma salhukwa. Nen, at obali'mo re at amlogo Abia a'nogo raja menlagaikhe.