2 TAWARIKH 11 - Allah Wene Fano Wene Hupla Inane

Ap Nabi Semaya nen it heinogengge nen agarek hakhogo isikhe wene

¹ Raja Rehabeam a'nogo o Yerusalem asi lagaikhesik he, it afuni inunggulenu Israel mene abel ambolkwe utara fikhit werek mene omanogo inoasi lagik, it afuni Israel meneba at ebe omame a'luk werek mene a'nogo halfigik hilingisigin iluk he, aren afuni inunggulenu Yehuda mene inom Benyamin mene inom andem oba nen agoromi tentara fano mene nek inebe 180.000 nen folhigik fisasikhe.

² Oba nen he, Tuhan nen nabi Semaya a'nogoba re,

³ ”At Tuhan nen Rehabeam inom it afuni inunggulenu Yehuda mene inom, Benyamin mene inom, inoba re yi'nogo ikhe, iluk wene yi yagaisa lan,” iluk lakfesikhe.

⁴ A'nogo lakfesikhemo re mel yagaisasikhe, ”Mondogat hilinglaga mene andoma re, an nendawimo anggigi mene higithogo hilinglagama re, hit hinagaila'lak Israel mene hinom weim yabi logoin lego. Hinaiba lani o! iluk ikhemo yagahisa wagi o,” iluk yagatikhe. A'nogo isikhe mene a'nogo it omanogo yagaisa lagaikhe mo re, iren Yerobaeam inom weim yabugun iluk isukwa mene a'nogo lek agaikhemo re, it inebe omanogo mondogat he Tuhan nen isikhe mene a'nogo nek holfesukwa.

Rehabeam en o kota-kota omanogo leget omamerogo wanhikhe wene

⁵ At Rehabeam a'nogo o Yerusalem logolik he, o kota-kota wilayah it afuni Yehuda meneba inom Benyamin meneba inom were'ma omanogo leget omamerogo wanuageluk yagaisasikhe. Nen, o leget wanuageluk yagaisasikhe kwe andoma re:

⁶ Kota Betlehem inom, Etam inom, Tekoa inom,

⁷ Bet-Zur inom, Sokho inom, Adulam inom

⁸ Gat inom, Mares inom, Zif inom,

⁹ Adoraim inom, Lakhis inom, Azeka inom,

¹⁰ Zora inom, Ayalon inom, Hebron inom andem.

¹¹ Aren he o kota andem leget omamerogo wokfilik lagaikhesik he, o kota ebe lombok sumburu nunggu mene faget inom, zaitun amusu inom, anggur amusu inom, tok ma'mungge perisai inom, sige kabelek inom mondogat fougerik lagaikhe.

¹² A'nogo hilingfesikhesik he aren o kota-kota omanogo ebe lombok faget he ap inoe kain komandan melalinafu mene faget inebe misik-misik menfisilik lagaikhe. A'nogo mefisilik lagaikhesik he o kota-kota andoma ebe lombok faget he inamburu nunggu mene inom, inangge zaitun amusu inom, anggur amusu inom, nen tok kwe palengge inom sige inom fik-foukhogo filik lagaikheat. A'nogo filik lagaikhe andiba re o wilayah Yehuda inom, Benyamin inom a'nogo re omame a'ma welagaukwa.

It imam inap inom Lewi inap inom o Yerusalem wagaukwa wene

^13-14 Hun Yerobeam inom it raja-raja at obali'mo menlagaukwa mene omanogo inomen he, it ap imam Tuhan obaget yabu hilingiri'lagwi mene andoma nen at lebethikhi logogun andi ninabit ikhi lagaukwama re, it Lewi inap a'nogo re iren inagengga o lei inom, ineabu inom herakfuluk he, o Yehuda ba nen Yerusalem oba andoma asi lagaukwa. Nen ap imam-imam inom, it Lewi inap inom wilayah it afuni Israel mene werek kwe omanogo nen he at Rehabeam inom sebesi laga lagaukwa.

¹⁵ At Yerobeam en he kembu sapi mene ekhe wutikhe mene andi apne wanhik, kembu andi obaget hilingitik, eluk-elugengge (muruagun) omanogo apne wanhik hilingiti logouwogeluk he wesagun inap onggwaregen menfisilik lagaikhe.

¹⁶ A'nogo hilingitunem he it afuni inunggulenu Israel mene mondogat inendawinggen eberogo meneba it afuni Israel mene ineisena Tuhan Allah a'nogo apne wanhi lagaukwa mene omanogo re, it ap Lewi inap a'nogo o waluk Yerusalem lagunem omanogo, iren he Allah it inambu-inombalagen apne wanhi lagaukwa mene andiba wam warogo Tuhan wogeti logogun iluk he, irogo o Yerusalem waga lagaukwa.

¹⁷ It a'nogo wagaukwasik he tahun henagan inukhogo re hun Salomo amlogo Rehabeam a'nogo nen melalinafi lagaikhe mene a'nogo faget fano anggaluk hilingitunem he, it inebe re at raja Daud inom, Raja Salomo inom, en melalinafu were'ma welagaukwa omanogo hakhogo welagaukwa. Andiba re kerajaan Yehuda ba omanogo re omame hokho aga lagaikhe.

Rehabeam eisok erokwe mene a'nogo

¹⁸ At Rehabeam he agwe enu Mahalat a'nogo welagaikhe. He Mahalet andi eisena re Yerimot, hun Daud amlogo agaisa he Abihail, hun Eliab a'logo, hun Isai omba a'nogo.

¹⁹ It inamlogomi re inebe henagan welagaukwa mene inenu re: Yeus, Semarya, Saham inom andem.

²⁰ Andi nen he at Rehabeam a'nogo hun Absalom a'logo hele Maakha a'nogo helasikhesik he, iren he inamlogomi inebe enggaminogo taginafukwa mene inenu re: Abia, Atai, Ziza, Selomit inom andem.

²¹ Hun Rehabeam andi re agagwi ebe mene re inebe 18 nen welagaukwa, nen amingmingengge mene et he 60 nen, at againafuri abengge inebe 28 nen, helime 60 nen welagaukwa. At agagwi ebe mene inom amingming engge mene inom andoma werek kwelek oba nen he agwe he Maakha andi nek he mondok endawirogo welagikhe.

²² Andiba re at againafuri fenakwe omanogo werek kwelek he at he Maakha amlogo andi nek he mondok endawi hundik welagaikhemo re, at amlogo Abia a'nogo re at obali'mo raja menlasuageluk wenatikhe.

²³ At Rehabeam en he endawi mondok wenggelek oba re, at againafuri omanogo o kota-kota it wilayah Yehuda mene werek kwe inom, Benyamin mene werek kwe inom leget mondok omamerogo waganekwe omanogo yabu hilingiti logouwageluk sumburogo wogisilik lagaikhe. A'nogo fisilik lagaikhesik he aren nunggu mene mondok sumbut-sambathogo wogisigik, it inagagwi ogo hokho-pokhorogo wogisilik lagaikhe.