2 SAMUEL 9 - Allah Wene Fano Wene Hupla Inane

Daud en ap Mefiboset fanot fikhi lagaikhe wene

¹ Inenggi ekhe sambul at Daud en he, afuni ekhe mel yagaisasikhe: ”Ap Saul againafuri mene ekhe ineluk werega? Lega! Werek halok, an nen Yonatan alisikhogo fano hilinginabigin namolo o,” iluk heinok wogisasikhe.

² A'nogo heinok wogisasikhemo, Saul againafuri inamingmingengge mene ekhe enu Ziba were'ma kain Daud oba wesuageluk yagatukwa. A'nogo yagatukwama wagaikhemo re, Daud en mel yagatikhe: ”Hat he Ziba a?” iluk heinok wokhasikhemo, aren he, ”I o, an hamingmingengge nebe yi o,” iluk yagatikhe.

³ A'nogo yagatikhemo, at Daud en he, ”Saul againafuri mene ekhe werega? Lega! An nen, it yi'nogo hilinginafi logogin, iluk wene Allah waretigi higithogoat, at andi fanot feigilugen heinok wanhi o,” iluk yagatikhemo, at Ziba nen he, ”Ap Yonatan amlogo ebe awe wut warek mene werego,” iluk yagatikhe.

⁴ A'nogo yagatikhemo, at Daud en he, ”At ebe koma werek,” iluk heinok wokhasikhemo, aren he, ”O Lodebar ap Amiel amlogo Makhir aiba werego,” iluk yagatikhe.

⁵ A'nogo yagatikhemo, ap Yonatan amlogo andi wolesi loagaluk lakfisasikhe.

⁶ Ap Yonatan amlogo andi enu re, Mefiboset. At Mefiboset andi, Daud oba wagaikhesik he, eindep awi yagaisogo Daud agaugweratikhemo, at Daut en mel yagatikhe: ”Hat Mefiboset a?” iluk yagatikhemo, aren he, ”I o, an nebe yi o, neisena,” iluk yagatikhe.

⁷ A'nogo yagatikhemo, at Daud en he, ”Hailo agun o. Heisena Yonatan alisikhogo, an nen hat nendawithabimbik he, kweang homba Saul eise welagaikhe mene mondogat ambotkwe hat wokhesimbik he, hat hebe nek he, hamburu an naiba ninom nunggu mondok logogin o,” iluk yagatikhe.

⁸ A'nogo yagatikhemo, at Mefiboset en eindep awi yagaisogo hobuk agaugweratikhesik mel yagatikhe: ”Noe. An hamingmingengge nebe kembu meneat he, haren a'nogo fano hilingnabigin andi nenahalok,” iluk yagatikhe.

⁹ A'nogo yagatikhemo, at kain Daud en he, ap Ziba Saul amingmingengge a'nogo woletikhemo, wagaikhemo re, mel yagatikhe: ”Yi mene ti mene Saul againafuri inom inaminingengge inom andoma mondogat he hoe omba yi wogosigin o.

¹⁰ Hat hebe inom, hagainafuri inom, hamingmingengge mene inom, hinomen at Saul againafuri inamburu inom, yi mene ti mene enggen inom, higithogo ninggi logouwagaluk yabu andoma fanorogo waganogo fisambik, enggen palogo ebe tagaisogo wogisikhi logoino o. A'nogo meneat he, at Mefiboset enek he, amburu an naiba ninom nunggu mondok logogin o,” iluk yagatikhe. (Ap Ziba andi againafuri ap mene inebe 15 nen welagaukwa, nen amingmingengge mene inebe 20 nen welagaukwa.)

¹¹ A'nogo yagatikhemo, at Ziba nen Daud mel yagatikhe: ”Haren hilingi'no, iluk hamingmingengge wene yaganeten andi mondogat hilingisigin o,” iluk yagatikhe. A'nogo yagatikhemo, at Mefiboset andi enupogot Daud onggwarek amlogo higit, sumburu inom misi'mo ninggi lagaukwa.

¹² At Mefiboset amlogo enu Mikha welagaikhe. Nen, at Ziba againafuri mondogat inom ap Mefiboset amingmingengge agaukwa.

¹³ At Mefiboset eisok fena-fena wut warek mene a'nogo, o Yerusalem logolik, sumburu Daud aiba nunggu mondok welagaikhe a'nogo re andi.