2 SAMUEL 8 - Allah Wene Fano Wene Hupla Inane

At Daud weim yafunem omame arik waga lagaikhe wene

¹ Enggi miren hakhogo welagaikhesigen he, at Daud a'nogo nen ap Filistin inap a'nogo inoasi lagaikhe. Inoasi lagaikhesik aren it inomame leget fisasikhesik he it mene inanggweang omanogo at helasikhe.

² Andi nen it Moab inap ogo inomame leget fisasikheat. A'nogo hilingfisikhi logolik it inebe henagan menere kweang kwe weing la'ni iluk misik ekhe herakfikhi logolik it inebe pire mene halok enek he inoarik lagaukwa. Andiba re it afuni Moab mene re at Daud a'ma sebeluk afuni ap lego mene ekhe nen a'ma sebetu mene omanogo nen onggo wogeti lagaukwa higithogo at Daud oba wogeti lagaukwa.

³ Andi nen at Daud en he, raja Hadadezer hun Rehob amlogo o Zoba melalinafi lagaikhe agun, o kota Damsyik horokhogo andoma o kerajaan welagaikhe mene omanogo mabenet fesikhe. Andi sambul he at Hadadezer he wilayah i Efrat elesi fikhit andoma at omame werek mene a'nogo ambotkwe ekhe inom omamerasigin iluk ebekhalem lagunemen omame leget fesukwa.

⁴ At Daud en he ap sikhe fisogo mene wam kuda amboloba lagaluk weim yabi lagaikharek mene re inebe 1.700 nen inom, nen it ap sikhe fisogo mene ineisok oba kweangwe lagu mene inebe 20.000 nen sen fisasikhesik hele warinafikhe. Aren he inanggo kuda againanggen tegisilik lagaikheba nen he, we kereta kuda nen li'luk lagunem weim yabik lagaikharek mene ebe 100 nen omanogo nek he herakfisasikhe.

⁵ A'nogo hilingitunem it afuni Siria mene inom, Damsyik mene inom, inagoromi sikhe fisogo mene at Hadadezer lebethoageluk lakfisa wagaikhe. Oba nen he at Daud en it inomame leget fisasikhesik, it mene inebe 22.000 nen inoatikhe.

⁶ A'nogo inoatikhesik at Daud en he agoromi sikhe fisogo mene at a'ma mene faget o sabu it afuni andoma inawi wilayah ba wurogo fisilik lagaikhe. A'nogo wutikhemo re iren at a'ma sebeluk logolik he onggo at oba fei laga lagaukwa. Tuhan nen at Daud ekhema-ekhema weim yabi lagunem he at aselei mene mabenet fisikhi lagaikhe.

⁷ It sikhe fisogo mene at hun Hadadezer agoromi nen tok ma'mungge huli-huli waluk laga lagaukwa mene emas meneba wurigengge omanogo re at Daud en telhikhesik he waluk o Yerusalem lagaikhe.

⁸ Andi nen he at Daud en ogore no perunggu hokho-pokhorogo o kota Betah inom, Berotai inom, attak at Hadadezer en sebelinarek welagaikheba andoma nen helasikhe.

⁹ A'nogo hilingitukwama at raja Tou o Hamat agun a'nogo nen esanggo holhasikhe re at Hadadezer agoromi sikhe fisogo mene omanogo mondogat mabenet fisaga o, iluk ugunem holhikhe.

¹⁰ A'nogo holhikhesik he, at amlogo Yoram a'nogo hun raja Daud oba, ”Hat homame agen mene andi faget hai wat hafi o,” iluk yagasi loageluk lakfesikhe. Ariginhikhe andi erore at Tou re Hadadezer inom weim yafi lagaukwa andi nen isikhe. A'nogo laga logolik at Yoram en he hun Daud ambit agaiyekhogo iluk, emas, perak, perunggu inom hokhorogo waluk lagaikhe.

^11-12 A'nogo wogosi wagaikhemo re at raja Daud en he wogosi wagaikhe mene omanogo wene kabogeti logolik hilingitu mene iluk Tuhan faget fesikhe. Andi nen he fena aren hun Hadadezer oba nen emas, perak telhikhe mene omanogo ogo, nen it inunggulenu amu mene aren mabenet fisasikhe kwe it inunggulenu Edom mene inom, Moab mene inom, Amon mene inom, Filistin mene inom, Amalek mene inom, omanogo nen telhikhe mene ogo, a'nogo nek hilingitikhe.

¹³ At Daud en afuni Edom mene o Asin tonggoma nen afuni inebe 18.000 nen inoasi lagaikhesik wagaikhe mene andiba nen he at Daud enu ekhe inom hokho agaikhe.

¹⁴ Aren he agoromi at a'ma werek mene sikhe fisogo inap omanogo faget he inawi sili o Edom kwe andoma mondogat halogo fisilik lagaikhe. Nen, it afuni Edom mene andi re mondogat at a'ma nek agaukwa. At Daud en yikwe tikwe weim yabi lagunem Tuhan nen omamet fugunem he mabenet fisikhi lagaikhe.

¹⁵ A'nogo at Daud en it afuni Israel mene mondogat halfisikhi logolik he, aren againafuri Israel mene inoba fanorogo hilingfisigik, higithogo hilingfisigik, ikhi logogin iluk hilingiti lagaikhe.

^16-17 Nen at Daud agoromi ineabu lego mene at Daud en menfisasikhe mene inebe re yi: Panglima it sikhe fisogo mene inoe mondok lego mene re Yoab hun Seruya amlogo a'nogo. At Daud aiba at ebe werek oba andoma lisu palhi lagaikhe mene re Yosafat hun Yehilud amlogo a'nogo. Imam he Zadok hun Ahitub amlogo a'nogo inom, Ahimelekh hun Abyatar amlogo a'nogo inom welagaukwa. Nen Negara faget lisu palhu mene re hun Seraya nen palhi lagaikhe.

¹⁸ At raja ebe kagalek nugu mene faget inoe kepala re Benaya hun Yoyada amlogo a'nogo. Nen at raja aiba yabu imam mene faget hilingiti lagaukwa mene re at Daud amlogomi omanogo welagaukwa.