2 SAMUEL 4 - Allah Wene Fano Wene Hupla Inane

Raja Isyboset ebe pinggi watukwa wene

^1-4 At Saul ambisangma nen tagongge mene nen amu mene ekhe re hun Yonatan amlogo Mefiboset a'nogo. At ebe re umur lima tahun werek kwelek, hun Saul inom Yonatan inom wa'lagaukwa huli aremnogo nen eisok holurek mene agaikhe. Erore, it Saul inom, Yonatan inom, wa'lagaukwa mene a'nogo faget warek abok waluk o kota Yizreel en wagaukwama, hele at Mefiboset ebe fisogo logolik halhi lagaikhe mene a'nogo nen enggimo magaisogo pukhogo waluk humusek lagunemen he omalik a'nogo tagaisogo pisikhemo eisok holutikhe andi. Nen, at hun Saul amlogo Isyboset en holhugunemen he Abner a'nogo o Hebron en wata ugunem holhikhesik he, at omame mondok lek agaikhesik oba mondok lebelek agaikhemo, it inunggulenu Israel mene mondogat ina'manggen lagaukwasik inailo nen hilingiti lagaukwa. At hun Isyboset andi re agoromi it pin kwagarek mene inogogwi lego perwira inebe pire mene, inenu re Baana inom Rekhab inom welagaukwa. Nen, it inebe re, hun Rimon againafuri o Beerot mene it inunggulenu Benyamin mene. (O Beerot andi re, it Benyamin nen meneba wenago welagaukwa. Nen, it afuni o andomaba attak femhogo welagaukwa menere o Kitaim andoma agaukwa huli nen yogondak huli inomat werek.)

⁵ It ap sikhe fisogo mene inogogwi perwira inebe pire mene inenu Rekhab inom Baana inom aremnogo lagaukwasik he, at Isyboset lingge tulem aremnogore ailoba set warikhi logolik were'ma oba lagaukwa

⁶ It a'nogo lagaukwasik hilingitunemen he, at hele ekhe oloba andoma halhi lagaikhe mene a'nogo re gandum pugunetunemen nogo eil agaikhemo, nogo ugunem lagaukwasik he at Baana inom Rekhab inom aremnogo linglong kwi lagaukwa.

⁷ It inebe kwi lagaukwasik he, pikhit at Isyboset ebe nogoli'lagoba aremnogo at ebe nogo homokhogo ugunem kwi lagaukwasik he, iren hun a'nogo talogo watukwama wa'lagaikhe. Wa'lagaikhemo iren hun a'nogo unggul palogo wanhukwasik, waluk he lingge tulem hilingik kwelek he it inebe o Yordan tonggokwe andoma nen lagaukwa.

⁸ Lagaukwasik he, iren hun Isyboset unggulpalek a'nogo Daud ambit o Hebron wogosi lagaukwasik iren yagati logolik he, yi'nogo isukwa, ”Yi re, hun Saul amlogo nineisena hat haselei mene Isyboset, nineisena hat hoasigeluk hundik-handik hilingiterek mene a'nogo. Yogondak yi sambul he At Tuhan nen nineisena hat hobaget, at Saul en inom, at eisok erokwe mene nen inom, hilingiti lagaukwa mene a'nogo faget onggo fikhe yi o,” iluk yagatukwa.

⁹ A'nogo yagatukwaba nen he at Daud en onggo ikhi logolik he, ”Tuhan eluk mondok welagarek mene nen he, an nebe yi mene ti mene ambisangma a'luk noasu hagenek agunem nagap telnaferek mene a'nogo nen he, an nen igin mene yi re eberogo mene ikhe iluk eluat logogin.

¹⁰ An o Ziklag were'ma ap ekhe nen hun Saul wa'lagama iluk wene waluk wagaikhemo re, an nen ebeti logolik fano wene waluk weri'lago iluk anggasigi. Oba nen he hilingik kwelek an nen ap a'nogo fakfigirik ebe pinggi watigi. Aren wene a'nogo waluk wagaikhe mene andi faget onggo wogosu hak he ebe pinggi watigi andi.

¹¹ Oba nen, ap inobaharo mondok weak mene nen ap weak hilingiti'le'maat onggwarek ailoba nogogu kwelek ebe wata mene andi re an nen unggum engginhogo inoba fagain o! Yogondak he hiren ap watep mene andi faget unggulmo fikhi logolik he, hit hinebe o kweangma yoma nen leget hinobagaigiluk ikhi lagi!” iluk yagaisasikhe.

¹² A'nogo isikhesik he at Daud en agoromi inoba yagaisikhi logolik, ”Hiren hun Rekhab inom Baana inom, andem inebe pinggi inoa'ni,” iluk yagaisasikhe. A'nogo yagaisasikhemo iren pinggi inoatukwama re it ap aremnogo inenggi ineisok inom lebekhogo re i mogo horokhogo andoma porogo fisasukwa. Oba nen he at Isyboset unggul palek a'nogo nek he waluk o kota andoma nen at Abner anggweang afuni salinafuba faget fesikheba omanogo salhukwa.