2 SAMUEL 17 - Allah Wene Fano Wene Hupla Inane

At Ahitofel en, ”Yi'nogo hilingisigin,” iluk Absalom yagatikhe mene, at Husai nen sebelhikhe wene

¹ A'nogo isukwasik, inenggi welagi'legat, at Ahitofel en he Absalom mel yagatikhe: ”An nen ap tentara inebe 12.000 nen wendeberogo fisambik o yogondak hubanggo at Daud murok lageluk yagaheti o.

² A'nogo lambik, it seren inomame lek asimbik were'ma inoba wulifi logolik, youk la'lak laga logolik, agoromi inebe pugulogo wulakfisambik, it inoe raja Daud amunek he ebe pinggi wasigin o.

³ A'nogo wulakfisambik at agoromi nek he, hemi inaguni herakfisaluk wuliplugen hobuk inaguni inoba inambotkwe wagaikharek andi hak, agoromi inebe mondogat inambotkwe hat hoba woginarek wesigin o. Hat hendawimo hagaiyek he, ap misigat mene ebe wati logolik, ap inebe hokhorogo mene re, yi'nogo ti'nogo ekhe hilinginabugun habit anggegendek anggigi,” iluk yagatikhe.

⁴ A'nogo yagatikhemo at Absalom ebe nen inom, afuni Israel mene inogogwi kaindek mondogaren inom, ”Wene andi fano ikhe,” iluk isukwa.

⁵ A'nogo isukwa meneat he at Absalom en he yi'nogo yagaisasikhe: ”At Husai endawimo nen ninggi'nogo anggagain. Heinok wokhouwogen he, ebe wole'ni o,” iluk yagaisasikhemo wolesi lagaukwa.

⁶ A'nogo wolesi lagaukwama, Absalom oba wagaikhemo re, Absalom en wene at Ahitofel hilingisigin mene pilingisogo yagatikhesik he, mel yagatikhe: ”Niren Ahitofel en wene ikhe mene andi ane hologo hilingisugun a? Lega. Lek halok, hat hendawimo anggegen mene ekhe yaganisan o,” iluk yagatikhe.

⁷ A'nogo yagatikhemo at Husai nen he, ”At Ahitofel en wene yogondak ikhe andi re weak ikhe o.

⁸ At Daud agoromi tentara inom andi re mondok inailo'lek logolik weim mondok inomamerogo yafarek a'nogo hat helu o. It he, ina'mage mondok het-petsek logolik wam maro hangge enu beruang isa mene eak nalfuluk, a'mage hokhorogo lagaluk aigen palinabigiluk welagarek andi hangge werego. Nen, at Daud ebe ogore weim en enek mondok melalek logolik elu-pelurek agun, nen at agoromi inom misi'mo nogo igi'lek ale'ma oumokwe nogolik nikherek a'nogo helu o.

⁹ Andi nen he o yogondak ogore, at ebe oumo he a, ale'ma he a, hinago werek anggikhi lagi o. A'nogo hinago logolik, aren noe hagoromi inoba wilibimbik, inebe ekhe inoasigin halok, afuni ekhe sa nen wene andi inesanggo holugun mene nen he, Absalom agoromi Daud en mabenetfisikhesik inoate o, iluk ugun anggikhi lagi.

¹⁰ A'nogo ugun halok afuni Israel mene mondogaren he, Daud andi weim mondok aniniweak, nen agoromi tentara mene andi inailo mondok lek logolik, weim inomamerogo mondok yafarek, iluk agare'ma re, ap weim yafu inailo mondok lek mene olomene enu singa obabut hangge mene ogore, mondok inailoat asugun o.

¹¹ Andi nen he, an nendawimo anggigi mene yagahesik: Haren ap Israel mene inawi o yi awi ti awi welagaikharek mene mondogat andogorinabimbik he, inebe mondok hokhorogo ial laut yenggelek esanggokwe welagarek andi hak agu halok, noe hat hebe nenat woginarek weim yabi lano o.

¹² At Daud ebe o koma were'ma nineilenggen hogo halok, at oba wilibimbik ebe wasugun onggot were'ma oba wulibugun halok, at ebe inom agoromi inom ekhe poloksek wulibugun mondok lego. We, felelenghogo inoasugun.

¹³ A'nogo meneat he, at ebe heise o kota ekheba laga halok, ap nit mene ninebe mondogaren hele kombi heleba kota andi kelfembik lisogo tonggoma horokhogo andoma pelakfoumo, punu andiba helep we misigat halok ogo ekhe logogin mondok lego,” iluk yagatikhe.

¹⁴ A'nogo yagatikhe andi, Tuhan endawimo nen he, ”Absalom mondok weak asuagen he, Ahitofel en wene ebe asigin ikhe mene andi Husai nen sebeluak,” iluk anggasikhebaat yagatikhemo, at Absalom ebe inom agoromi Israel mene mondogat inomen he, mel isukwa: ”Wene Ahitofel en ikhe andi weak ikhe meneat he, Husai nen ikhe andi nek he, fano mondok ikhe o,” iluk isukwa.

At Daud ebe telogo heise ekhema lagaikhe wene

¹⁵ At Husai nen a'nogo yagatikhesik hobuk wene at Ahitofel en isikhe mene a'nogo inom, at onggwaregen komo wene inom Absalom oba inom, afuni Israel mene inogogwi inoba inom yagaisasikhe mene a'nogo ap imam Zadok inom, Abyatar inom yagaisa lagaikhe.

¹⁶ Lagaikhesik he mel yagaisasikhe, ”At Daud ebe horok o leimo afuni le'ma andoma nogo inogo, weak-weak i Yordan palogo wulibuago. A'nogo heise lagi'lek kamo igin halok, at ebe inom, agoromi tentara esa logalharek mene inom, inebe wulil tagalogo inoasugun, iluk weak-weak yagaisa lani o,” iluk yagaisasikhe.

¹⁷ A'nogo hilingitu kwelek andem sambul he, at Abyatar amlogo Yonatan inom, Zadok amlogo Ahimaas inom, emberek o kota kwi wagunem afuni nen ineilenggen isanogo iluk, wene waluk lagunem holuogoluk yerogo re, o kota Yerusalem esanggoma i enu En-Rogel elesimo horokhogo andoma hinago welagaukwa. Were'ma, wene at raja Daud yagasi logoin mene halok, hele yenggerek inamingmingengge mene ekhe nen yagaisa laga lagaikhe.

¹⁸ A'nogo hinago welagaukwa meneat he, alage yenggerek mene ekhe nen eilenggen isasikhesik, Absalom yagasi wagaikhe. Andi nen he, it weak-weak ap ekhe awi sili Bahurim mene aiba andoma hina'lasi lagaukwa. Lagaukwasik, at ap andi aiba era'lu i mogo ekhe habuli'mo re, andoma hina'lasi kwisukwasik welagaukwa.

¹⁹ A'nogo hina'lagaukwama, ap awi eise werek andi agwe nen he, su kain meneba i mogo a'nogo salogo fesikhesik he, amboloba gandum enggen pilelogo letfesikhemo, i mogo a'nogo ineilenggen ha re mondok hinago welagaikhe.

²⁰ A'nogo fisasikhesik were'ma, ap Absalom en lakfisasikhe mene aremnogo, he a'nogo aiba lagaukwasik he mel yagatukwa: ”Ahimaas inom Yonatan inom aremnaga isegeba?” iluk heinok wokhasukwama aren he, ”It he, yogondak yaat i palogo wulibi lagaikha ari o,” iluk yagaisasikhe. A'nogo yagaisasikhemo, it ap a'nogo ap alage inebe pire a'nogo heraginabik lagaukwa mene inom ambi agi'legen he, inambotkwe o Yerusalem wagaukwa.

²¹ A'nogo wagaukwama, it ap Ahimaas Yonatan emberek aremnogo i mogo habuli'mo a'nogo nen wulibi wagaukwasik, weak-weak raja Daud oba lagaukwasik he, wene waluk lagaukwa mene omanogo mondogat yagati logolik mel yagatukwa: ”Ahitofel en hat hoasigiluk weim abok arat ikhe. Halok, weak-weak heise i yi palogo aik elikwe wulibi lan o,” iluk yagatukwa.

²² A'nogo yagatukwama, at Daud agoromi inom i Yordan palogo wulibi lagaukwasik, i aik elikwe wulifukwa hak he, o hil arat lakfei wagaikhe.

²³ Nen, at Ahitofel a'nogo endawimo nen he, ”An nen wene igi mene hologo hilingiti'lek herakfisaga andi weak higi,” iluk futfesikhesik he, inebe woginarek lagungge wam keledai ambot oba kelogo fesikhesik, ebe oba lagasikhesik he, at onggwarek aiba lagaikhe. Lagaikhesik, yi mene ti mene aren hilingisu mene mondogat arat katokhogo hilingitikhesik, ebe onggwaregen alonggop hele kelogo warasikhemo, at eisena wa'lagaikhemo salhukwaba andoma salhukwa.

²⁴ Nen, at Daud ebe o kota Mahanaim asi lagaikhe hak he, at Absalom agoromi tentara Israel mene nen inanggele'marogo re, i Yordan palogo wulifukwa.

²⁵ (At Absalom en he, ap Amasa andi Yoab obali'mo agoromi tentara esa logalhi logogun mene inoe menfesikhe. Ap Amasa andi ap Yitra unggulenu Ismael mene andi amlogo. Nen, agaisa re enu Abikail ap Nahas a'logo andi. At he Abikail andi ap Yoab agaisa enu Zeruya andi agailak.)

²⁶ At Absalom agoromi tentara mene inom a'nogo re, inawi tenda o Gilead andoma wusi lagaukwa.

²⁷ Nen, at Daud o Mahanaim lagunem he, ap Nahas aiba o Amon kota Raba mene andi amlogo enu Sobi andi inom, nen, ap Amiel aiba Lodebar mene andi amlogo enu Makhir andi inom, ap Barsilai aiba Rogelim o Gilead mene andi inom, inomen Daud ebe wanhukwa.

^28-29 A'nogo wanhukwasik, iren he, ”At Daud ebe inom, agoromi tentara mene inom, o leikwe afuni lekwe uanhogo wagaikha hilingi'mo re, sumburu inom, i inom nelerogo wagaikha,” iluk anggasukwasik he, iren he, at Daud agoromi inom faget iwak i keralogo nenggarek mene inom, kuali inom, talogo nogo agarek mene enu kasur inom, gandum enggen inom, gandum hangge enu jelai enggen inom, gandum enggen sagalek mene tepung inom, gandum enggen werago mene inom, kacang eil mep mene endep mene inom, hokhondek mene inom, kin amusu keralek inom, nenggarek mene ekhe enu keju inom, sapi eilak amusu sei amboloba lagai wagarek mene inom, wam domba ebe pire henagan hangge ekhe inom, wogosi wagaukwa.