2 KORINTUS 9 - Allah Wene Fano Wene Hupla Inane

Allah againafuri nen inerugwi inagaila'lak ekhe leberisogoin wene

¹ An nen he, hiren it Allah againafuri o Yudea mene leberisouwogeluk andogoti lagep mene andi faget, wene lisu palogo hinoba lakfei wesu lek mene lakfei wagi andi.

² Hiren he, it andi leberisouwogeluk anggilukhogo hilingiti lagep andi, hinobabut an nelu. An nen hit fogethinafi logolik, it afuni o Makedonia yoma mel yagaisikhi lagi: ”Tahun attak a'liba nen, it afuni o Akhaya andoma mene nen it andi yi'nogo leberisouwogeluk it mene andogorogo fesukwasik werek,” iluk agaugwethinafi lagi. Hit anggilukhogo hilingiti lagep andiba nen, it afuni yoma ekhe inebe hokhorogoaren it andi faget fisouwogeluk inendawinggen abolok ili'lagwi aro.

³ Hit hinobabut hilingiti lagep andi faget, niren fogethinafi lago mene andi, ”We tulemat fogerinafi lagoma,” iluk inogo nen he, hiren an igi hak fisambik logobagaigen iluk, ninagaila'lak hinoba lakfisa wago andi o.

⁴ A'nogo lakfisa wagi andi re, hiren oan andogorogo fisigi'lek were'ma, an afuni Makedonia mene ninom hinoba wesugun elo'lego. Attagat an nen ikhi logolik, ”It yi'nogo eberogoat fano hilingisugun werego,” iluk isigisi'mo re, an nenggali agik, hit hinenggali agik, inogo iluk, it tak lakfisa wagi andi. Hiren wene andi faget futfesigipmo re, hit hinenggali asinogo iluk yagahisa lek mene igi andi.

⁵ A'nogo oan andogorogo figi'lek logogun halok elo'lek andi nen he, an oan wagi'lek logolik ninagaila'lak andi tak lakfisa wesigeluk igi andi. It hinoba wesimbik he, hiren andi faget fisouwogeluk abok isigip mene a'nogo, iren wurep kobokhogo andogosi wesuageluk inendawimo kagalogo yagaisikhi lagi. An a'nogo hilingiti lagi andi re, hit hinagarek hinendawi werek kwelek iren ninghogo hinendawimo kagalumo fisogoin elo'lek. We, hit hinendawinggen nenat fisambik were'ma fano, iluk hilingiti lagi andi.

⁶ Wene andi faget igin yi hinendawimo futfeni. It afuni ekhe nen awi endephogo yari'lagwi mene re, enggen endephogo palugun o. Nen, it ekhe awi hokhorogo yari'lagwi mene re, ebe hokhorogo palugun o.

⁷ Afuni inendawimo inagaiyek mondok anggikhi logolik it ekhe fisagarek mene andi, Allah nen inebe endawi welagarek andi nen he, hit hinebe lombok hinagarek hinendawi werek kwelek, it ekhe nen hinendawimo ninghogo kagalhunem fisogoin elo'lego. We, hit hinendawimo fano logolik, hinonggwarek hinendawimo nenat kagalogo fisogoino.

^8-9 Afuni inobabut fano hilingitarek mene faget, Allah aneba lisu mel iluk palek werek: ”Iren fano mene afuni o yi awi ti awi wogisigik, sumburisigik ikhi logolik, it ekhe inelagaik mene sumburisagarek. Inobabut fano nen wogisagarek andi, Allah endawimo eberek mondok logogino,” iluk lisu palogo fesukwa hak, at Allah obabut fano nen, yi mene ti mene oba loukhogo wokhisugunem, hit hundik-handik hinonggwarek faget elokhogo logolik, oba loukhogo it ekhe fanorogo leberisikhi logobagaigeluk, Allah nen elok wokhisagain werego.

¹⁰ At Allah nen it awi yatarek mene awi wogisigik, sumburu ebe noageluk wogisigik, ikherek andi. A'nogoat, arenat afuni awi yasuageluk palisagarek hak, hinobabut it ekhe leberisikhi logogun andi mene wokhisigik, nen awi yatunem enggen hokhorogo isu hak, it ekhe hinendawi nen leberisugunem hokhotfigik, igin o.

¹¹ A'nogo wokhisamo re, hiren yi mene ti mene oba himbirik logolik hinenggi werek hokhoat it ekhe leberisikhi logoguno. A'nogo leberisogoin mene andi, niren sumburogo wogisugunem he, Allah hai wasugun aro.

¹² Hit afuni hinendawi nen leberisogoin andiba re, Allah againafuri inenggi lek mene nek fikhi logogun fuk. We, nineisena Allah nen wo'nisikhemo iluk afuni hokhorogo Allah hai hokhorogo wati logogun aro.

¹³ A'nogo leberisikhi logogun andiba, it Allah againafuri o Yudea mene nen he, ”It afuni Korintus mene Kristus hilingitikhe wene fano wene a'nogo wanhukwasik, Ninobabut higithogo hilingiti logoguno, iluk isukwa higithogoat hilingiri'lagwi. A'nogo hilingiti logolik it mene ekhe agi'lek nit lebe'nisigik, it ekhe mondogat leberisigik, aga o,” iluk hinobabut enegat paliluk Allah fogerasugun aro.

¹⁴ A'nogo fogerati logolik, iren he, ”Allah obabut fano a'nogo nen, iren afuni hokhorogo leberisikhi logouwageluk inobabut andi mene wogisikhemo hilingiri'lagwi,” iluk hinebe inendawi logolik Allah ayonggo hokhorogo fikhi logogun andi.

¹⁵ At Allah nen fano mondok niren pilingisogo ugun elo'lek mene wo'nisasikhe andi faget fogerati logouwogo.