2 KORINTUS 8 - Allah Wene Fano Wene Hupla Inane

Allah againafuri nen it ekhe inendawi nen uang andogorogo fisasukwa mene faget yagaisasikhe wene

¹ Nerugwi nagaila'lak. At Allah obabut fano a'nogo nen againafuri o Makedonia mene yoma inobabut fano hilinginafemo hilingita mene hinelurogo yagahisak.

² It afuni ekhe nen yi enggin ti enggin hokhorogoat weagerinafu kwelegat he, it inendawimo inagaiyek hokhorogo anggili'lagwi andiba inobabut enegat aga. It inagarek mondok lek inelagaik logoligat he, it mene hokhorogoat, lebekhogo it afuni ekhe wogisili'lagwi andi.

³ Wogisogoin higithogo wogisikhi logolik ekhe inom oba mangorogo wogisili'lagwiat. An inobabut nelu. Neilenggen isigirigen yagahisikhi lagi o. It afuni ekhe nen inendawimo kagalhi'le'ma, inonggwarek inendawimo nen kagalogo,

⁴ yi'nogo yaganisikhi lagaikha: ”Niren ogo re, Allah againafuri o Yudea mene ekhe leberisouwogen iluk yagaheto,” iluk nit yaganisugu mondok welagaikha.

⁵ Nit ninendawimo nen he, ”It yi'nogo fogoin,” iluk anggogo mene werek kwelek, inebe tak ninoe Enupogot wogotasigen, at Allah endawimo anggasikhe hak, inebe nit wo'nisaga aro.

⁶ Wo'nisagama re, at Titus hit hinom logolik, hiren Allah againafuri ekhe hinendawi nen leberisouwogeluk isigip mene andi faget yagahisikhi laga hak arat andogosuageluk endawimo kagalho o.

⁷ Hit he, yi mene ti mene faget fano mondok hilingiti lagep. Andi re, hinendawinggen Allah oba ninghogo himbiret figik, fano wene fano mondok yagaisigik, ebe wene fano mondok hinelu agik, afuni ekhe leberisouwogeluk anggilukhogo hilingitik, nit ninebe hinendawirogo mondok welagik, ikhi lagep andi hak, hit mene it Allah againafuri ekhe andoma ogo fano mondok hilingfisobagaigen iluk yagahisigi.

⁸ An nen, ”Hit yi'nogo hilingi'no,” iluk, nane ninghogo yagahisigi lego. We, it Allah againafuri o Makedonia yoma mene nen inendawimo nen kagalogo it mene andogorogo Allah againafuri ekhe andi anggilukhogo leberisili'lagwi andi hak, hiren ogo re, it andi hinendawirogo leberisugunem, ”Eberogoat it inendawi hundik werek,” iluk enegat asuageluk yagahisigi andi.

⁹ Ninoe Enupogot Yesus Kristus obabut fano nen endawitninafikhe a'nogo hit hinelu mondok anggigi. Athe, ebe Allah mene logolik he, eilmo werek welagaikhe meneat he, at elagaik agaikhe andiba, hit ebe mene hineilmo werek asubagaigeluk, at ebe nit afuni mene agaikhesik elagaik agaikhe andi.

¹⁰ Leberisogoin andi faget, an nendawimo anggikhi lagi mene yagahisak. Tahun attak a'liba re, afuni ekhe oan werek kwelek, hiren tak, ”It andi leberisouwok,” iluk wene palhigipsik hinabit logolik leberisigi'lek, we, anggilukhogo leberisasigip andi hak, yogondak wurep kobokhogo leberisobagaigeluk yagahisigi.

¹¹ Hiren attak anggilukhogo it ekhe andi hinendawirinafigipsik, ”Yi'nogo leberisouwok,” iluk isigip andi hak, yogondak a'nogo hinenggim asigin lombok anggilukhogo wurep kobokhogo andogosubagaigen iluk yagahisigi.

¹² Hit hinangge lek mene fuk. Athe, werek mene hinendawinggen oba nen it andi fisogoin halok he, at Allah nen, ”Fano faga,” iluk anggagain.

¹³ Hit enek engginhogo leberisugunem, it ekhe nen inendawimo serogo weat wanuageluk yagahisigi lego. We, hinom higithogoat lebet-lebet ikhi logogun iluk yagahisigi o.

¹⁴ Hit mene yogondak hokhorogo werek andi. Halok, it lek mene andi fisogoin o. It mene hobuk hokhorogo a'luk he, hit lek werek halok ekhe hinobagagun andi. A'nogo hilingisugun halok, hiren leberisigik, iren lebethisigik, hinom higithogo hilingiti logogun andi.

¹⁵ A'nogo hilingiti logogun andi faget Allah nen he mel isikhe: ”At ekhe agarek hokhorogo andogorogo fakhagain mene andi tindelogo fagain lego. Nen, at ekhe agarek endebat andogorogo fakhagain mene andi lek asigin lego,” iluk isikhemo lisu palogo fesukwa.

Paulus nen Titus agaila'lak inom inayonggo fesikhesik lakfisasikhe wene

¹⁶ Niren hit faget ninghogo hilingisuogeluk hilingiti lago hak, at Titus a'nogoat hilingiti logouwageluk Allah nen endawimo kagalhunem hilingiri'logo andi nen he, Allah hai wati logouwogo.

¹⁷ Andi re, niren at endawimo kagalho meneat he, niren, ”Hat lan,” iluk ninane ninghogo yagatoma waga fuk. We, at onggwarek endawimo wenggelhesik he, mondok ninghogo endawinggen hinoba logolik he, ”It inoba lagain,” iluk hinoba waga andi.

¹⁸ Ninagailak ekhe fano wene yagaisilik nugunem he, it Allah againafuri o yi awi ti awi nen he, ”At obabut fano,” iluk fogerari'lagwi mene, at Titus emberek lakfisa wagi andi.

¹⁹ Mene re, andi nek fuk. It Allah againafuri nen it andi leberisouwogeluk inobagaga mene andi, at andi inomen andogorogo fesukwasik wogisa loageluk menfaga aro. A'nogo wogisa lagunem, ninoe Enupogot fogerati logolik, ”It Paulus lak inobabut he, it ekhe leberisogoin elok werek,” iluk enegat asigin andi.

²⁰ Hokhorogoat fisili'lagwi mene andi, niren andogorogo wilik lagunem, it afuni ekhe nen ninabok weak palinogo iluk he, ninendawinggen wenggelogo mondok hilingiti lago.

²¹ A'nogo hilingiti logolik he, ninoe Enupogot eilhanem enek ninobabut higithogo hilingiti logouwogeluk ikhi lago lek. Athe, ninoe Enupogot inom, afuni inom, ineilhanem ninobabut higithogo hilingiti logouwogeluk anggikhi lago.

²² It andem inomat, ninagailak ekhe lakfei wagi aro. At andi re, yi mene ti mene faget hundik-handik afuni ekhe agaiyekhogo leberisugunem obabut enegat palhoresik he, hinoba lakfei wagi andi o. Aren he, ”It fano hilingisugun,” iluk endawinggen hinoba lakfei wagaikhe andi nen he, yogondak hit lebethisageluk endawimo mondok agaiyekhogo waga andi o.

²³ Nen, at Titus andi re, an nagailak hit lebethisouwogeluk nemberek yabu misik hilingitorek mene. Nen, ninagaila'lak ekhe at inom wagaikha andi re, fano hilingitunem it afuni ekhe nen inobabut palharesik Kristus fogerari'lagwi mene, Allah againafuri nen inayonggo fesukwasik lakfisa wagaikhama wagaikha andi.

²⁴ Allah againafuri ekhe nen he, ”It o Korintus mene nen it Titus lak inebe eberogoat inendawi hundik werek,” iluk igik, nen, ”It Paulus lagen it Korintus mene fano hilingisugun iluk agaugwerinafarek a'nogo eberogoat,” iluk igik, uageluk, it andi hinendawirogo woginabino o.