2 KORINTUS 6 - Allah Wene Fano Wene Hupla Inane

^1-2 At Allah nen he, mel isikhemo lisu palogo fesukwama werek: ”An nen, hit hinane nesanggo holigin anggigibaat holhi o. Hinebe telhinabigin higithogoat lebethisa wagi o,” iluk isikhe andi re, Allah nen ninane esanggo holigin he, o yogondak ya aro. Nen, ninebe telninabigin he, o yogondak ya aro, iluk hinendawimo ebe'nio. Halok he, nit Allah ninom at faget hilingiti logolik he, at obabut fano nen endawithinafikhemo, at ebe wanhigip a'nogo, we tulemat alomatubo, iluk komothinafi lago andi.

³ Afuni ekhe nen he, ”Hit Allah faget hilingiti lagep andi weak hilingiti lagep,” iluk ninabok weak palinogo iluk he, afuni ekhe weak hilingisuageluk inendawimo kagalogo yi mene ti mene faget weak mene hilingiti lago lek.

⁴ Afuni nen he, ”It Allah nen inayonggo fesikhemo, at faget hilingiti logou hagat hilingiri'lagwi,” iluk futninobagauwageluk he, yi enggin ti enggin hilingninafik, wiik-weakhogo hilingninafik, hobetnisigik, ugu kwelek, ninafe morogoat logolik yi mene ti mene enegat hilingiti lago.

⁵ Yei ninoatik, ninenggi hele warogo o hele warek fisagarek oba ninobagagik, afuni hokhorogo nen ninoba limamit palik-palik ninoasu hak hilinglagik, ugu kwelek welago. Yabu set kwil-kwalogo hilingitik, nogo u lek hak hilinglagik, sumburu nele agik, ikhi logolik hilingiti lago.

⁶ A'nogo hikhi logoligat he, ninobabut weak hilingiti'lek tegelek logolik, fano wene ninelu welagik, ninafe morogo welagik, ninobabut enago welagik, ikhi lago. At Allah Areagun ninendawimo logolik afuni inebe eberogoat ninendawirogo welago.

⁷ A'nogo logolik, Allah omameba ebe wene yagaisilik nikhi lago. A'nogo yagaisilik nikhi logolik, afuni nen he, ”Sige sikhe ninenggi pire wurat welago,” iluk agarek hak, nit Allah endawimo amolo mene hilingiti lago andi.

⁸ It ekhe nen fogetninafik, ninabok fano igik, ugu kwelek, it ekhe nen wena'nisigik, ninabok weak palhik, ili'lagwi. Wene eberogoat yagaisugu kwelek meneat he, ”Ineranen lalninabi'lagwi,” iluk wena'nisili'lagwiat.

⁹ Afuni nen ninebe inonggot mene halok, mondogaren inelu meneat welagik, ninebe wa'lasuageluk hilingninabi'lagwi meneat he, nineluk welagik, yi enggin ti enggin hilingninafu kwelegat he, ninebe mondok wa'lagi'lek welagik, ikhi lago andi hani!

¹⁰ Ninendawinggen weak logoligat he, ninagaiyek hikhi logolik welago. Yi mene ti mene ninenggim lek meneat he, afuni hokhorogoat ebe mene ineilmo werek asuageluk hilingfisikhi lago. Ninagarek mondok lek meneat he, ebe mene mondogat eise agosik welago.

¹¹ A'nogo logolik he, hit afuni o Korintus mene, nerugwi nagaila'lak. An nendawimo wene ekhe sebelfigi'lek mondok fakhogo yagahisigi andi. Menere, hit faget an nendawimo ebetirik welagi.

¹² Niren hit faget he, ninendawimo a'nogo eberek welago meneat he, hit enek he, nit faget hinendawimo enggin welagebo.

¹³ Halok he, hiren lagakhogo nit faget hinendawinggen ebe'ni o, iluk an nonggwarek nagainafuri yagaisa hak yagahisigi andi.

”Afuni inendawinggen Allah oba himbiret figi'lek mene hinom hunesugun lek,” iluk komorinafikhe wene

¹⁴ Hit afuni inendawinggen Allah oba himbiret figi'lek mene andi, hinom hunetubo. Afuni higithogo hilingiri'lagwi mene inom, komore'lek hilingiri'lagwi mene inom, inom hundik logogun nogo? O selek andi inom, o mum andi inom, inom misi'mo logogun nogo? Mondok elo'lego.

¹⁵ At Kristus Iblis emberek, inendawinggen misigat logogun nogo? Nen, afuni inendawinggen Allah oba himbiret fili'lagwi mene andi re, it ekhe inendawinggen Allah oba himbiret fili'lagwi lek mene inom hundik logogun nogo? Mondok elo'legaro.

¹⁶ At Allah awi wurik andi inom, tugwi kembu awi wurik inom, inom misi'mo lambuget fogoin nogo? At Allah eluk mondok welagarek mene awi wurik he, nit ninebe yiaro. Aren he, mel isikhe: ”It inendawimo an nawi wurogo logogin o. An nen it ninom logogin. It ineisena Allah anat logogin o. Nen, an nagainafuri irat logogun o,” iluk isikhe andi nen he,

¹⁷ Nineisena Enupogot a'nogo nenat, ekhe mel isikhe: ”Hit hinebe it afuni ekhe inanggelekwe, welagep andi herakfisaluk he, andogorogo wulibi we'ni o. Wulibi wagunem he, an nen wokhinabumo, hobuk weak mene andi hinenggi fakha lagubo.

¹⁸ An hit hineisenaat logogin o. Nen, hit an nagainafuri logogun, iluk nineisena Enupogot yi mene ti mene hilingisu hak enek a'nogo nen isikhemo,” iluk lisu palogo fesukwa.