2 KORINTUS 5 - Allah Wene Fano Wene Hupla Inane

¹ Afuni inawi wurik meisalagunem hobuk ket wutarek hak, nit ninagap kweangma elama faget welago yi, wa'lagu halok he, pogoroba ninebe ninetok mondok logogun mene afuni nen fanorogo hilingiti'lek Allah nen hilingisogo ninobagagin mene werego, iluk futfikhi lago.

^2-3 Su nonggolhunem inalfulukwa agaikharek hak, ninebe hobuk logogun mene andi oan werek kwelek, ninagap yi lek agunem he, weat logoinogo iluk, su elonggoma laberek kwelek, endakwe labetarek hak, ninagap yi werek kwelek he, ninebe pogoroba logogun mene andi labetninobagagin mene iluk, oba eberek welago andi nen he, weak logolik, ”Eige,” iluk anggikhi lago.

⁴ Ninebe elama faget yi logolik he: ”Eige,” iluk ninoba enggin-fenggin weak welago. Andi re, ninagap yi mene nonggologo herakfisaluk, weat logou ninamolo nen ikhi lago fuk. We, yi werek kwelek he, hobuk ninebe nineluk mondok logogun mene andi labetninobagaumo re, ninagap wa'lagorek mene yi nabulal-habulal hilingninabuageluk ikhi lago.

⁵ At Allah nenat hobuk a'nogo hilingninabigeluk telogo ninobagasikhesik, ”Eberogoat hilinghinabigin,” iluk, yi mene ti mene nouwogeluk attak nenggarek hak, Areagun wo'nisasikhemo ninendawimo werek.

⁶ A'nogo logolik, hobuk fano asigin, iluk ninendawimo se welago. Afuni o hobuk wuri'mo logouwogeluk attak wuri'mo welagaikharek hak, ninagap yi meneba logolik he, ninoe Enupogot awiba ninom logogun oba andi yatma welago, iluk ninelu.

⁷ Nit he, nineilenggen hikhi lago mene yoma oba himbiret fuluk welago fuk. We, ninendawinggen at Yesus oba himbiret fuluk welago.

⁸ Andi nenat ninendawimo se welago. Ninagap yi nonggologo herakfisaluk, ninoe Enupogot were'ma kwimbik ninom logoilo ninamolo e, anggikhi lago.

^9-10 At Kristus nen nit mondogat ninagap yiba logolik hilingiti logogun mene lombok ninanema waganogo wene ninoba figik, kotik, ikhi logolik, fano hilingito mene halok, ”Fano,” igik, nen, weak hilingito mene halok, ”Weak,” igik, higithogoat yaganisagaino. A'nogo yaganisagain andi nen he, nit o yoma okuluk logolik inom, hobuk at aiba kuluk inom, ninendawinggen tulem, at endawimo fanorogo nek hilingiti logoilo ninamolo nen hilingiti lago andi.

”At Kristus nen Allah ninom ninambotkwe lambulogo ninobagaikhemo welago,” iluk yagaisasikhe wene

¹¹ It andi nen he, ninoe Enupogot ebe ninailorogo logogun iluk futfikhi logolik he, afuni nen wene andi futfouwageluk inendawimo kagalogo yagaisilik nikhi lago. Nit ninobabut hilingiti lago andi re, at Allah eilhanem weinam andi hak, hit hinendawimo nen nit futninobagakhi logogun anggikhi lagio.

¹² Andi re, hiren nit fogetninabubagaigen iluk ninonggwaregen fogerakhikhi lago lego. We, it afuni ekhe inendawinggen faget he, fogerakhigi'lek, inagap endakwe faget fogerakhugunem he, hiren onggo nit ninabok fano ikhi logolik agaugwet ninabubagaigen iluk yagahisigio.

¹³ It afuni nen ineilenggen nisugunem, lugulugwi palik hangge welago halok he, andi Allah fageraro. Mene re, ninebe hebelek hangge welago halok he, hit fageraro.

¹⁴ At Kristus nit ninebe endawit ninaferek andi nen fetninarek welagarek. At alegat nit mondogat faget wa'lagaikhe andi. Halok he, nit mondogat wa'lagagu aro, iluk futfikhi lago.

¹⁵ Nit mondogat faget wa'lagaikhe andi re, nit ninebe ninonggwarek faget nineluk logouwageluk wa'lagaikhe fuk. We, nit ninebe at faget logouwageluk, at ebe nit faget wa'lagaikhesigen ambotkwe eluk agaikhe andi.

¹⁶ Andi nen he, niren huli yogondak ya huli nen he, afuni nen inobabut palharek hak, it afuni ekhe inobabut a'nogo palhi lago lego. Nen, attak he, Kristus obabut a'nogo palhugu hak, hobuk a'nogo palhi lago legaro.

¹⁷ Afuni inebe Kristus inom hundik werek halok he, inobabut ket mene elalinafemo werego. Attak mene legat aga. Hobuk ket mene hilinglaga.

¹⁸ Mene re, yi mene ti mene andi mondogat at Allah nenat hilingiterego. At Kristus hilingitikhe andiba, Allah onggwarek ninom lambukhogo ninobagasikhe. A'nogo ninobagasikhesik he, afuni ekhe at inom inambotkwe lambukhogo inobagaigeluk wene andi niren yagaisoageluk nit ninoba fesikhe.

¹⁹ Wene ninoba fesikhe andi ebe re yi. At Kristus ebe hulisanem logolik hilingitikhe andiba, Allah nen yi afuni ti afuni mondogat at onggwarek inom lambukhogo ninobagasikhe. Aren a'nogo ninobagakhi logolik, nit afuni nen weak hilingitorek mene wene ninoba figi'lek sebelogo herakfisasikhe andi. Aren a'nogo hilingitikhe wene andi niren yagaisilik nikhi logouwageluk ninoba fesikhe.

²⁰ Nit he, Kristus nenat, ninayonggo fesikhesik lakninobagai wagaikhemo wagagusik he, Allah nen wene yagahisa hak, komothinafi lago andi. A'nogo komothinafi logolik, ”At Allah nen hobuk hinambotkwe lambukhogo hinobagauwagen he, at hinom lambulinio,” iluk Kristus enu hombuk palogo ninane liokhogo yagahisikhi lago.

²¹ Nit Kristus ninom huneto halok, at Allah nen onggwarek ninom ninambotkwe hunogo ninobagauwageluk nit fagerat nit ninobabut weak hilingitorek mene andi, at Kristus weak hilingiti'lek mene oba fesikhe andi.