2 KORINTUS 13 - Allah Wene Fano Wene Hupla Inane

At Paulus nen wene wurep kobokhogo komorinafik, hai warinafik, isikhe wene

¹ An attak nenggi pireba hinoba wagagisik he, hobuk ekhe wesigin andi. Allah aneba lisu mel iluk palek werek: ”Afuni nen it ekhe yi wene ti wene inoba fouwogeluk halok he, afuni ekhe inebe pire a? Henagan a, weak hilingitunem ineilenggen haga mene nen, Eberogoat nineilenggen hogo, ugu halok he, eberogoat anggogoin o,” iluk isikhe andi nen he, an wesimbik a'nogoat hilingisi wesigin andi.

² An attak nenggi ekhe wagagisik oba nen hobuk wagagi andiba, it afuni hit mene ekhe attagat weak hilingitukwa mene inom, nen it fena o andoma mene inebe mondogat inom, komorinafigi mene yogondak an nebe yatma logolik inendawimo eberogo yagaisagain aro. An hobuk wesimbik he, it andi sebelogo inobagai wesigin lek. We, wene inoba fei wesigino o.

³ Hiren he: ”Paulus andi re, Kristus endawimo logolik ili'logo he a? Lek he a,” iluk nobabut paluogeluk egep andi re, nebe wagunem enegat futnobagagun aro. At Kristus hit hilingiti lagep andi faget ebe lebelegen obakhe nene kamo ikherek fuk. At hit hinom logolik omameat werego.

⁴ At Kristus ebe lebelek were'ma eba menfuluk watukwa meneat he, at Allah omameba eluget fesikhemo elugat welagarek. Andi hagat he, nit at ni nom hundik logolik lebelek welago meneat he, at Kristus ninom hundik nineluk logolik he, Allah omameba hit faget hilingisi wesugun o.

⁵ Hiren he, ”Nit ninendawinggen Kristus oba himbiret fesugu a'nogo himbirigat welago a? Lega,” iluk hinonggwaregen hinobabut furogo palano. A'nogo palikhi logolik, elo'lek hilinglagi'lek halok, ”Yesus Kristus ninendawimo werek,” iluk enegat hogoin o.

⁶ Nen, hiren, nit ninobabut palhi logolik, ”Paulus lak inobabut palho mene elo'lek agi'lek. Kristus nen eberogoat inayonggo fesikhemo,” iluk enegat nisikhi lagep anggigi.

⁷ Niren he, hit weak ekhe hilingisinogo iluk, Allah ayonggo fikhi lago. Andi re, hiren hineilenggen nisikhi logolik he, ”Paulus lak fano hilingiri'lagwi,” iluk ninobabut palogo nen ikhi logobagaigeluk ikhi lago lek. Nit ninobabut palhunem, hiren, ”It elo'lek hilinglagaikha,” anggegep halok he, hesanggeat. Hebisanio. Hirat fano hilingiti logobagaigeluk hit faget Allah ayonggo fikhi lago.

⁸ Andi re, niren ebe wene sebelugun he, elo'lek. We, legeisogo fogoin mene nek welago.

⁹ Nit lebelek werek kwelek he, hit hinomame werek logogun halok he, fano iluk, ninendawimo ninagaiyek anggikhi lago. Andi fagerat he, hit hinendawinggen katokhogo wurik asuageluk, Allah ayonggo fikhi lago.

¹⁰ Andi nenat he, nebe yatma logolik wene yi lisu palogo fikhi lagi. Nebe hobuk wagi halok ninom logolik he, nane puk weak wenakhisigi hanogo iluk, lisu a'nogo palogo fikhi lagi andi. Ninoe Enupogoren omame wo'netikhemo eisewerek welagi andi re, hit hinebe weagethinabuageluk fuk. We, hinendawinggen wuriget hinabuageluk eisewerek welagi o.

¹¹ Nerugwi, nagaila'lak. Wene wurep kobokhogo ekhe yi yagahisak. Hinendawinggen hinagaiyek anggigik, hinendawinggen katokhogo wurigetfakhigik ikhi logoino. Wene komothinabik wagi andi, hinesanggo fanorogo holino. Hinendawinggen misigat logolik, hinom lambukhogo logoin o. A'nogo hilingiti logogun halok, Allah afuni endawirinafik, inom lambukhogo fanot fisigik, ikherek mene a'nogo nen kwelakhinarek logogin o.

¹² Hit-hit he, Allah faget hai hinambe saluk wat-wat ilik lano. Allah againafuri yoma mene mondogaren he, hai wathinafa aro.

¹³ Ninoe Enupogot Yesus Kristus obabut fano a'nogo nen fanothinafik, nineisena Allah nen endawithinafik, Areagun nen lambukhogo hinobagagik, ikhi logouwago.