2 KORINTUS 12 - Allah Wene Fano Wene Hupla Inane

Allah nen yi wene ti wene Paulus eilenggen hoageluk abikanggo yagatikhe wene

¹ An fogerakhilik waga lagi mene andi re, u lek meneat he, fogerakhagain aro. Ninoe Enupogoren an neilenggen hoageluk yaganetemo nabikanggo higik, nobabut oba higik, hasigi mene igin o.

² An 14 tahun attagat neilenggen hasigi mene it ekhe inoba lirogo igin o. Ap ekhe Kristus emberek hundik welagaikhe mene Allah nen pogot huli pire senggelek hebisaluk huli ekhe ponggwe andomaba liakfesikhe andi nelu o. At andi ebeat liakfesikhe he a? Areagun liakfesikhe he a. An nonggot. Neisena Allah at elu o.

^3-4 Ap andi Allah nen pogoroba fanoma andoma liakfesikhemo wene afuni nen agarek legat, nen ugun elo'legat mene esanggo holhikhe neluo. A'nogo meneat he, ebeat liakfesikhe he a? Areagun he a. An nonggot mene re, Allah at elu igi andi.

⁵ Ap andi faget enek fogerati logolik, an nonggwarek faget fogerakhigi'lek, we, nebe lebelek andi faget enek fogerakhagain aro.

⁶ An nonggwaregen nabikanggo oba hasigi meneat he, ap ekhe oba lirogo igi andi mene faget ekhe inom fogerakhigi halok he, nane eberogoat igin andi nen he, afuni kembu mene nen agarek hak igin lego. A'nogo meneat he, afuni ekhe nen an higirek andi mene faget fogetnabinogo iluk, nebe ineilenggen niigik, nane inesanggo holhik, agarek andiba futnobagauwageluk he, ekhe andi mene igi'lek kamo igin andi.

^7-8 An nen, ”Nabikanggo elalin mene neilenggen higi andi nailo e,” iluk nonggwaregen fogerakhanogo iluk he, afuni inebene alok kugunem heinet watarek hak, ou noba agunem heinet wati logouwageluk, nobagasikhemo, Iblis nen ayonggo fesikhe mene hangge noba were'ma, ninoe Enupogoren henegeisogo wulakfisoageluk nenggi henagan oba ayonggo figi meneat he,

⁹ aren he: ”Hat lebelek halok he, an nomame hokhoatma hebe nendawithafirek mene a'nogo nen, elok fanothafi logogin o,” iluk yaganetikhe. A'nogo yaganetikhe andi nen, at Kristus omame an nendawimo nobagasikhe mene andiat logouwageluk he, an nebe lebelegat logolik, nendawimo nagaiyekhogo fogerakhikhi logogin o.

¹⁰ Andi nen he, an Kristus faget, nebe lebelek agi halok inom, afuni nen nabok weak palhu halok inom, wiik-weakhogo hilingnafu halok inom, yi enggin ti enggin hilingnafu halok inom, weim yafi logolik inoasuogeluk hoberisagarek hak hilingnafu halok inom, an lebelegat were'ma, andiba nen nomame agirek iluk, nendawimo nagaiyek anggigirego.

Paulus nen Allah againafuri o Korintus mene faget endawinggen firik welagaikhe wene

¹¹ It ap Kristus nen inayonggo fuluk lakfisa wagarek mene hak hilingisogo we'luk, ”At Paulus enu lek,” iluk agarek andi, an eberogoat nenu lek. It esin inenuwerek higi! A'nogo lego. Hiren futnobagaluk agaukhogo yaganesu meneat he, a'nogo ikhi lagep lek andi nen he, eberogoat ap kembu mene nen agarek hak, yagahisigi andi.

¹² Hiren, ”Paulus he, Kristus nen ayonggo fuluk lakfei wagaikhemo,” iluk enegat futnobagauwageluk, an ninom logolik yi mene ti mene faget nafe morogo hilingitu were'ma, afuni nen futfouwageluk, Allah nen omamerogo yi mene ti mene elalinat hilingiti lagaikhe.

¹³ Hit faget hilingiterek andi, it Allah againafuri yi awi ti awi andogotarek mene faget hilingitirek mene andi emberek walhamo re, ki mene faget agaugwethinafi nogo? We, an yabu hilingiti lagi mene faget, ”Nenggi onggo ekhe wo'ne'ni,” iluk hinoba weageti'lek welagagi andi agaugwethinafi he a. Halok he, weagethinafi andi faget sagalogo legetfisaluk hinendawimo fano a'ni o!

¹⁴ An attak nenggi pireba hinoba wagagisik, hobuk ekhe wesigeluk tik-tukhogo figirik welagio. An hinoba wesigin andi re, yi mene ti mene inagainafuri nen inagaisa ineisenalak heragaisogo wogisagarek fuk. Lego. We, inagaisa ineisenalagen he, inagainafuri faget heragaisogo wogisagarek andi nen he, hit mene yi mene ti mene kino hinoba weagarogo yagahisa wesigin fuk. Lego. We, hinebeat herakhinabik wesigino.

¹⁵ Andi hagat he, hit hinendawinggen faget an nagarek yi mene ti mene hinobagagik, nebe inom hinobagagik, nendawinggen oba nen nendawimo nagaiyek anggikhi logolik iginat welagio iti. An hit hinebe nendawinggen tulem werek kwelegat he, hit enek he, an nebe hinabit logogun nogo?

¹⁶ An nen he, hit hinoba engginet feinogo iluk hit mene kino yagahisigi'lek andi enegat werek andi. Mene re, hit ekhe nen ikhi logolik he: ”At Paulus endawinggen kagalek andi nen he, yi mene ti mene saburageluk, ane lalogo yaganisikherek,” iluk ikhi lagep andi,

¹⁷ an nagoromi hit hinoba lakfisa wagagi mene omanogo nen, hit mene ekhe saburogo an wo'nesi wagaukwa nogo? Mondok lego.

¹⁸ At Titus hinoba wesuageluk endawimo kagalhigisik he, ninagailak Allah amlogo ekhe at emberek lakfisa wagagimo wagaukwa a'nogo, wagaukwasik he, at Titus nen hiren fesigip mene ekhe munenogo helasikhe nogo? Mondok legaro. An Titus nemberek he, ninobabut misigat hilingiti lagagu lek nogo? It ekhe attak ineisok fuluk lagaikhare'ma re, it ekhe hobuk oba loukhogo fuluk lagaikharek hak, at Titus an nemberek yabu higit hilingiti lagagu lek nogo?

¹⁹ Hit hinendawimo nen he, ”At Paulus wene onggwarek oba nonggologo ili'logo,” iluk fagearen ikhi lagep meneat he, an a'nogo anggikhi lagi lego. Nerugwi nagaila'lak. Hinebe nendawi. At Allah eilhanem, an Kristus nemberek hundik logoligat ikhi lagi andi. Ekhe mene ekhe mene hilingiti lagi andi re, hit hinendawinggen wurik asuagelugat hilingiti lagi o.

²⁰ An hobuk hinoba wesigin andi wesimbik he, an nen, ”It inobabut fano were'ma lagain,” iluk anggikhi lagi hak, lek. We, weak were'ma hisa wagik, nen, hiren he, ”At Paulus obabut fano,” iluk ikhi lagep hak, lek. We, weak logolik hisa wagik, inogo iluk, nendawinggen firi'logo. Hit-hit hinom weak welagik, wene palhik, hina'mage lagagik, hinonggwarek faget enek hilingitik, inabok weak weinam palhik, hinagaisogo palhik, hinonggwaregen fogerakhigik, hesangge-pesangge hilingitik, ugunem an wesigin andi, nailo.

²¹ A'nogo hilingitunem, an wagunem he, neisena Allah nen hit hinobabut hilingiti lagep andi faget hit hineilhanem nenggali warogo nebe horoget nobagagun andi nailo. It afuni hit mene ekhe hokhorogoaren hemi inaguni werek mene, ap inagagwi werek mene nen pailak fakfisigik, helime silerik ap souge nen pailak fakfisigik, inenggali lek weak mondok hilingitik, o attagaren hilingitarek mene herakfisaluk inobabut hebelagi'lek mondok welagaikharek andi faget, le asi wagi hanogoluk nendawinggen firik welagi o.