2 KORINTUS 11 - Allah Wene Fano Wene Hupla Inane

”It ekhe Kristus nen inayonggo fuluk lakfisikherek mene hangge weri'lagwi,” iluk yagaisasikhe wene

¹ An nen wene endebat afuni kembu mene nen agarek igin yi re, wena'nesu fuk, hinesanggo hologo logoni o.

² Helime yenggerugwi inobabut ap inom nogo igi'lek mene, inaguni inoba lombologo fisagarek hak, an nen he, hit Kristus oba lombologo hinobagagi meneat he, hiren ap hunogo mene ekhe lombolhep halok he, Allah a'mage lagagik, an na'mage lagagik u hagaro.

³ A'nogo meneat he, attagat at kisu a'nogo obabut lagokse'ma re, he Hawa lalhikhe hak, hit hinendawinggen misigat Kristus oba eberogoat himbiret fuluk at faget tegelek welagep mene it ekhe nen lalhinabugun andi nen he nailo ari'logo.

⁴ It ekhe hinoba we'luk he, niren fano wene Yesus hilingitikhe wene yagahisasugumo wanhigip hak, yagahisigi'lek. We, hunogo mene yagahisugunem he, Allah Areagun wanhigipsigat he, hobuk ekhe mene areagun wanhik, fano wene wanhigipsigat he, hobuk wene hunogoat mene wanhik, hinendawimo hinagaiyekhogo wanhi lagep hisikhi lagi o.

⁵ It ekhe andi, Yesus nen inayonggo fuluk lakfisa wagaikhe mene hak hilingisogo wagunem, hiren he, ”It andi esin hak,” iluk woginafu kwelegat he, an nendawimo nen he, ”It esin, nen, an elo'lek,” iluk anggikhi lagi mondok lego.

⁶ An wene ugunem inoba wesu lek meneat he, wene ebe nonggot fuk, nelu o. An nen hundik-handik yi wene ti wene faget ugunem he, hiren, ”At wene eluo,” iluk enegat futnobagakhi lagebaro.

⁷ An nen Allah ane fano wene andi yagahisikhi logolik he, ”Onggo ekhe wo'ne'ni,” iluk igi'lek. Hit esinethinabigeluk an nonggwarek nebe kembu hak a'luk, a'nogo hilingiti lagi andi, hit weak hilinghinafi lagi iluk ugun nogo? Mondok lego.

⁸ An nen hit lebethisikhi lagi andi faget, nenggi onggo hak he, it Allah againafuri o ekhema nen wo'netunem wanhi lagi o. A'nogo wanhi lagi andiba it afuni ekhe nen he, ”At Paulus nen it afuni o Korintus mene leberisageluk he, onggo it ekhe mene enggi abisak wili'logo,” iluk yaganesugun aro.

⁹ An hit ninom logolik uang legen, hiren ekhe wo'nesuageluk kino hinoba weageti lagi'lego. We, a'nogo were'ma, it ap nagaila'lak o Makedonia mene wagaikhasik elogat wo'nesi wagaikha andi nen, yi mene ti mene faget hit hinoba engginet feinogo iluk, anggasigimo re, kino yagahisigi'lek welagagisik hobuk a'nogoat mondok hilingiti logogin o.

¹⁰ A'nogo hilingiti logogin iluk, nendawinggen agaiyek anggikhi logolik fogerakhikhi lagi mene andi, afuni o Akhaya andoma mene ekhe nen nanema wanugun elo'lek, iluk Kristus ane ebe wene nendawimo logolik eberogoat igi o.

¹¹ Nenahalok an a'nogo igi anggegep. Hit hinebe nendawi legen igi anggegep? Lego. An hit hinebe nendawi welagi andi, Allah elu o.

¹² It ekhe Kristus nen inayonggo fuluk lakfisa wagaikhe mene hangge wagaikhasik hilingiri'lagwi mene andi nen he: ”Nit Paulus ninom higiro,” iluk ikhi logolik fogerakhili'lagwi mene andi, inane lek asuageluk an yogondak hilingiti lagi mene yi re, hilingito mondok logogino.

¹³ It andi re, Kristus nen inayonggo fuluk lakfisa wagaikhe mene fuk. We, aren lakfisa wagarek mene hak hilingisogo we'luk afuni lalinabi'lagwi mene aro.

¹⁴ It hilingiri'lagwi andi elalinat hilingiri'lagwi fuk. Ineisena Iblis onggwarek eranenat, malaikat selegerinaferek wene waluk we'luk hilingitarek hak hilingiri'lagwi o.

¹⁵ At Iblis amingmingengge logolik, at faget hilingitarek meneat he, at Allah amingmingengge logolik higithogo hilingitarek mene hak hilingisogo weri'lagwi andi inobabut inetok mene aro. A'nogo hilingitarek andi nen, o wurep oba, Allah nen onggo iren yi wene ti wene faget hilingitarek higithogoat hilinginabigin o.

At Paulus Allah ane yagaisilik nugunem yi enggin ti enggin oba aga lagaikhe wene

¹⁶ Afuni hit mene ekhe nen he, ”At Paulus ebe kembu hak,” iluk angganogo iluk, hobuk nane hebelogo yagahisigi andi. A'nogo meneat he, hiren a'nogoat anggikhi lagep halok he, an nebe kembu hak logolik endebat ekhe fogerakhagain yi re, hinesanggo holini o.

¹⁷ An nen fogerakhagain yi re, ninoe Enupogoren, ”Hat a'nogo in,” iluk yaganetemo fogerakhagain fuk. We, afuni kembu mene nen fogerakhikhi logolik agarek hak igin o.

¹⁸ It afuni inebe hokhorogo nenat yi mene ti mene kweangma mene faget fogerakhili'lagwi andi, an endebat ekhe fogerakhagain aro.

¹⁹ Hit hinendawimo wenggelek mene hangge yoma ri! It ekhe kembu mene inane ugunem, hit hinendawimo hinagaiyekhogo holhi lagep andi.

²⁰ A'nogo hilingiti lagep andiba, hit hinebe iren inawe a'ma hinobagaluk hinamburu mondok felelenghogo ninggik, hinagarek inenggi abisak heligik, ”Hit elo'lek mene re, nit enek he, esin iluk,” inonggwaregen fogerakhigik, hinelokhonggen lambukhogo hinoatik, ugu kwelek hinafe morogo welagep yoma ri!

²¹ Nit ogo re, a'nogo hilingisugun he, ninobabut ninailombaregen kamo isugu iluk ugun he, ninenggali hokho hogoin nogo? Lego. It afuni kembu mene nen agarek hak ekhe yagahisak. At ekhe enggali lek fogerakhikhe halok he, an ogo re, nenggali lek fogerakhagain o.

²² It andi inebe Yahudi mene halok, an ogo re, nebe Yahudi mene aro. It inebe Israel mene halok, an ogo re, nebe Israel mene aro. It inebe ineisena Abraham en tago mene halok, an ogo re, nebe neisena Abraham en tago mene aro.

²³ It andi Kristus amingmingengge logolik, at faget endebat hilingitarek meneat he, an enek he, hokhorogoat hilingitirego, iluk, afuni lugulugwi palik mene nen agarek hak ekhe yagahisigi andi. It he, seget endebat hak hilingitarek meneat he, an he, seget hokhorogo higirego. It he misik sambul hangge inenggi hele watik, yei inoatik, inebe wa'lasu hak mondok inoatik agarek meneat he, an enek he, hundik-handik nenggi hele watik, yei noatik, nebe wa'lasu hak mondok noatik, agarego.

²⁴ It afuni Yahudi mene nen yei lambisogengge yei misigam faget inenggi 39 nen noati lagaukwa mene nenggi wenagaisogo re, nenggi 5 ba noatukwa aro.

²⁵ Nen, afuni o Roma mene nen yei payuk oba inenggi henagan oba noatukwasigen, helep oba misigan tunghogo noatukwaro. Nen, i laut yenggele'ma andoma e so warogo wulifunem, nenggi henagan oba e so weak agaikhesik lobakhogo pisikheat. Nen nenggi misigam faget i laut yenggele'ma andoma i agum oba sarogo nogo isigisigat.

²⁶ Hundik-handigat youkwe laga logolik andi re, i fu nen sebelnabu hak hilingnafik, afuni inobabut weak inenggi abisak wanharek mene nen noasuogeluk ugunem youkhigik, afuni an nunggulenu misik mene nen noasuogeluk ugunem youkhigik, it endakwe mene nen noasuogeluk ugunem, youkhigik, o sili hokho wuri'mo nen noasuogeluk ugunem youkhigik, leget takwe nen noasuogeluk ugunem youkhigik, i laut yenggele'ma nen noasigeluk ugunem youkhigik, afuni hunogoat meneat he, Allah againafuri nagaila'lak mene hangge logolik noasuogeluk ugunem youkhigik, ikhi lagagisigaro.

²⁷ Yi mene ti mene faget set kwil-kwalhogo hilingitik, hundik-handigat nogo neluk nogo igik, sumburu inom, i inom, legen nele welagik, hundik-handigat sumburu ninggi'legat welagik, nasu legen sogoi noatik, o koma nogo u heat agik, ikhi lagagisigat.

²⁸ A'nogo hilingnafu kwelegat, Allah againafuri yi awi ti awi andogotarek mene mondogat faget he, hundik-handik mondogat noba enggin logolik menenei ebetirego.

²⁹ At ekhe omame legaga halok he, an nomame lek asu hak, nendawinggen weak agaregat. Nen, at ekhe weak mene nen endawimo kagalhunem weak hilingite halok he, an nendawimo heiselheregat.

³⁰ Mene re, fogerakhagain halok he, an nebe nomame lek iluk fogerakhagain o.

³¹ An wene igi andi re, nera nen igi lego. At ninoe Enupogot Yesus eisena Allah enu hombuk palogo fogeratu mondok logogun mene a'nogo elu.

³² An o Damsyik were'ma re, inoe enupogot Aretas awe a'ma mene gubernur andi nen agoromi kweba kagalek were'ma an faknobagauwageluk inayonggo fesikhe.

³³ A'nogo meneat he, inenggi habaregengge it ekhe nen an nebe mul ugu elonggoma kwalnobagasukwasik he, leget pa'leget anggwe folelekwe nen wulaknobagasukwasik hele kelogo pelaknobagasukwama re, heise lagagi.