2 KORINTUS 10 - Allah Wene Fano Wene Hupla Inane

Paulus nen he, ”An Allah yabu yi'nogo hilingiti lagi,” iluk yagaisasikhe wene

^1-2 An Paulus Kristus obabut fano enago a'nogo obabut waganogo, nonggwaregen wene ekhe komothinabik. It ekhe nen he, ”At ebe horokhogo ninom logolik he, obabut liokhogo wene yaganisikherek. Meneat he, ebe yatma logolik he, obabut ailo lek ninghogo yaganisikherek,” iluk agarek mene a'nogo hobuk hinoba wesimbik nailo legat nane ninghogo yagahisigi hanogo iluk, futfobagaigen nane liokhogo yagahisigi. It andi nen he: ”Paulus lak andi re, afuni inobabut inetogat logolik hilingitarek mene andi inobabut waganogo hilingiri'lagwi,” iluk ninabok weak pali'lagwi mene andi, nobabut nailo lek nane ninghogo wenagisa wesigin iluk menenei ebeti lagi.

³ Nit ninebe kweangma logolik afuni sikhe sigeba weim yafarek hak yafi lago lego.

^4-5 Nit weim yafi lago andi ebe re, afuni inasikhe inarigeba yafi lago fuk. We, Allah omame hokho welagarek mene a'nogo asikhe arigeba, o weim kat oba ninghogo wurik mene andi, elok meisalugun andiba yafi lago. It afuni ekhe inendawimo nen he, ”Allah andi ebe ninabit. It afuni ekhe at ebe inelu asugun legaro,” iluk inonggwaregen fogerakhagarek mene andi, niren sikhe sige andiba re, elok mabenetfisogoin aro. Nen, afuni inendawinggen we mene oba eberi'lagwi mene andi, niren sikhe sige andiba Kristus ane hologo hilingisuageluk awe a'ma elok fisa wesugun aro.

⁶ Niren he, hit Allah ane katokhogo hologo mondok hilingiti lagep halok he, tegelogo hinobagakhi logolik it ekhe at ane inesanggo holharek lek mene halok wene inoba fouwogeluk welago.

⁷ An nen wene weinam mene igin yi re, futfenio. At ekhe endawimo nen he: ”An nebe re, Kristus mene welagi,” iluk futfikhe halok he, onggwaregen obabut palikhi logolik, ”An nebe re Kristus amlogo welagi hak he, it Paulus lak andi ogo a'nogoat werek,” iluk futfouwago.

⁸ Ninoe Enupogoren he, an nen weagethinabuageluk eisewerek nobagaikhe fuk. We, hinendawinggen wurigethinabuageluk, eisewerek nobagaikhemo welagi andi faget hokhorogo fogerakhikhi lagi halok he, nenggali asigin lego.

^9-10 Afuni hit mene ekhe nen he: ”Paulus andi ebe yatma logolik lisu palogo lakfei wagunem he, ane sebelu lek hak. Ninghogo yaganisili'logo. Meneat he, ebe wesimbik ninom logolik ebe kembu mene hangge. Nen, ane ugunem he, inesanggo holu inabit hak,” iluk ili'lagwi andi nen he, wene lisu palogo hinoba lakfei waga lagi andi re, hit hinendawimo nen, ”Ninailo mondok asuageluk lakfei weri'logo,” iluk anggegep hanogoluk yagahisigi andi.

¹¹ Nit hobuk wesimbik he, it a'nogo ili'lagwi mene andi, ninebe yatma logolik wene lisu palogo lakfei wago mene higithogoat hilingisi wesugun andi nen he, futfuluk logouwago.

¹² Niren he, it ekhe inonggwaregen, ”An fano,” iluk inendawinggen legetfakhili'lagwi mene andi, ninom wena'ninabugun he, nailo. An nonggwarek nobabut palogo nen nebe it ninom higit u nailo aro. Andi re, iren he, ”Inobabut fano wanugun he, nirat,” iluk igik, afuni esin hak he nit mene iluk it-it inobabut paligik, ili'lagwi andi re, inebe kembu nen ili'lagwi o.

¹³ Nit ninobabut he, andi hangge re, lego. Nit ninobabut nineabu Allah nen huli warogo wo'nisasikhe andiba hilingiti logolik, endakwe mene faget fogerakhigi'lek, huli warogo wo'nisasikhe mene fagerat fogerakhikhi lago. Hit hinebe ogo re, nineabu huli warogo wo'nisasikhe andi meneat welagebo.

¹⁴ Hit hinebe Allah nen yabu huli warogo wo'nisasikheba welagep andi nen he, fano wene Kristus nen hilingitikhe wene a'nogo waluk he, yagaisilik huli hit hinoba wagagu andi, huli warek mene sebelogo wagagu lego.

¹⁵ Allah nen a'nogo nineabu huli warogo wo'nisasikhe mene sebelogo fuluk afane laluk he, it ekhe hilingita mene, an hilingiti halok fogerakhikhi lago lego. Hit hinendawinggen Allah oba eberogoat himbiret fikhi lagep mene andi ekhe inomat wurik agunem he, o hit werekwe Allah nen huli warogo nit wo'nisasikheba, yabu hokhorogo hilingiti logogun anggikhi lago.

¹⁶ A'nogo hilingiti logombik, Allah nen it ekhe ineabu huli warogo wogisasikhemo hilingita meneat he, nit hilingitu halok fogerakhanogo iluk, hit hinaiba abel elikwe, andoma wene fano wene yagaisilik nikhi logogun anggikhi lago.

¹⁷ Allah ane lisu mel iluk palek werek: ”Afuni nen yi mene ti mene faget fogerakhouwogeluk halok he, ninoe Enupogot hilingitikhe mene andi faget fogerasuguno,” iluk isikhe.

¹⁸ Afuni inonggwaregen fogerakhagarek mene andi Allah nen fano iluk woginaferek fuk. We, at ninoe Enupogoren fogerinaferek mene halok fano iluk woginaferego.