2 KORINTUS 1 - Allah Wene Fano Wene Hupla Inane

Hai warinafikhe wene

¹ Nerugwi nagaila'lak. An Paulus Allah endawimo anggasikheba, Yesus Kristus nen nayonggo fesikhesik laknobagai wagaikhe mene a'nogo, ninagailak Timotius a'nogo nemberegen hit Allah againafuri o Korintus andogoti lagep mene inom, o propinsi Akhaya yi awi ti awi andoma welagep mene mondogat inom, wene yi lisu palogo hinoba lakfei wago andi.

² Nineisena Allah ninoe Enupogot Yesus Kristus emberek inobabut fano a'nogo nen fano mene wokhisigik, hinendawinggen hambugethinafik, ikhi logouwago.

”An nen Allah hai wati lagi,” iluk yagaisasikhe wene

³ Ninoe Enupogot Yesus Kristus eisena Allah andiat fogerati logouwogo. At nineisena Allah obabut fano nen afuni yi mene ti mene faget inendawimo weak were'ma, endawirinapluk inendawimo fanorinaferego.

⁴ Afuni ekhe yi enggin ti enggin hikhi logolik inendawimo weak were'ma, niren it inendawimo fano asuageluk inendawinggen sebeluageluk he, at Allah nen nit a'nogo yi enggin ti enggin hikhi logolik ninendawimo weak agunem, ninendawinggen sebeli'logo.

⁵ At Kristus yi enggin ti enggin hasikhesik hobuk ekhe inom hokhorogoat hasikhe andi hak, nit a'nogoat hikhi lago aro. A'nogo hugunem at Kristus nen nit ninendawimo fano asuageluk hobugalep ninendawinggen sebelhu mondok welagarego.

⁶ Nit yi enggin ti enggin hikhi lago andiba, Allah nen hit hinendawimo fano asuageluk hinendawinggen sebelhik, hinebe telhinafik, igin aro. Nen, nit yi enggin ti enggin hugunem Allah nen ninendawinggen sebelherek andiba, hit a'nogoat yi enggin ti enggin hikhi logolik hinafe morogo logogun halok, Allah nen hinendawimo fano asuageluk hinendawinggen sebeligin aro.

⁷ Yi enggin ti enggin ninom higirat hogorek andi hak, ninendawimo fano asuageluk Allah nen ninom higirat ninendawinggen sebeligino, iluk nelu andi nen, hit fano asugun iluk ninendawinggen hombunhogo welago.

⁸ Nerugwi nagaila'lak. Nit o propinsi Asia a'lima nen yi enggin ti enggin hilingninafi lagaukwa mene andi hinonggot logoinogoluk yagahisak. A'nogo hilingninafi logolik, enggin mondok hokho niren hilingisu elo'lek mene ninoba fesukwama, ”Nit nineluk logogun lek higi,” iluk ninendawinggen na lagaikhe.

⁹ Inebe mondok inoasuogeluk inabok palhunem, ”Nit arat wa'lasugun higi,” iluk anggagarek hak hilinglagaikhe andi. A'nogo hilinglagunem, ninendawinggen ninonggwarek ninoba himbiret fuluk welagi'lek, we, at Allah afuni wa'lagunem en inelugerinaferek mene a'nogo oba himbiret fuluk logouwageluk a'nogo hilinglagaikhe andi.

^10-11 Nit ninebe mondogat ninoasugun iluk anggasugusi'mo nen, at Allah nenat telninafikhesik he hobuk telninabigin aro. Nit faget hit ninomat samban ikhi lago a'nogoba, hobuk telninafo logogin aro, iluk he ninendawinggen at oba himbiret fuluk welago. Hiren, nit faget samban ugu mondok logogun andiba, at Allah obabut fano nen nit telninafunem he, it afuni ekhe hokhorogoaren ineilenggen nisambik Allah hai wasugun aro.

Paulus nen, ”Attagat hinoba wesigeluk isigi menere, kamo isigi,” iluk yagaisasikhe wene

¹² Nit fogerakhikhi lago andi ebe yi'nogo nen. Nit it afuni kweangma mene ekhe inanggelekwe logolik, it faget hilingiti lago re endebat hak. Mene re, hit faget enek he, esin mene hilingiti lago. Andi re, afuni kweangma mene inendawimo kagalek mene hilingitarek hak hilingiti'lek. We, at Allah obabut fano a'nogo nen, ninendawinggen fano misigat logolik hilingiti logouwageluk ninobabut wo'nisasikhemo hilingitorek mene andi ninendawimo ebeti logolik, ”Nit fano hilingiti lagoma,” iluk fogerakhikhi lago andi.

^13-14 An nen he, wene hiren enu elok salhik, futfigik, ugun mene nek lisu palogo hinoba lakfei wagirego. Attak he, an nen lakfei wagagi mene andi endebat enek futfesigip. Mene re, hobuk enek he, mondogat futfogoin anggikhi lagi. A'nogo futfuluk he, ninoe Enupogot Yesus wesigin andi sambul, niren he, hit faget ninalong asigin andi hak, hiren he, nit faget hinalong asigin aro.

^15-16 A'nogo futfogoin iluk anggigi andi nen, hit hinendawimo hinenggi pireba hinagaiyek asubagaigen iluk, an attagen o Makedonia yoma waga logolik hit hinoba fa'larik wagirik he, hobuk nambotkwe laga logolik hinoba fa'larigat, o Yudea lageluk lagunem, hiren lebe'neobagaigen iluk anggasigi.

¹⁷ A'nogo wesigeluk anggasigi meneat he hobuk kamo isigi andi re, nendawinggen pire nen anggegep? An nendawimo nen, ”Yi'nogo hilingisigin,” iluk menenei ebeti logolik, nonggwarek nendawimo namolo nen, ”Io,” iluk ninghogo ilugen, hobuk ”Lego,” iluk igirek anggegep?

¹⁸ Lego. At Allah ane eberogoat enek yaganisikherek andi hak, niren he, ”Io,” ilugen, ”Lek,” igik, yagahisogorek lek.

¹⁹ At Allah amlogo Yesus Kristus, an nebe nen yagahisigik, Silas nen yagahisigik, Timotius nen yagahisigik, isugu mene a'nogo obabut he, ”Io,” ilugen, ”Lego,” iluk ikherek lek. Allah nen, ”Io. Wokhisagain,” iluk abok yaganisa hak, Yesus ebe wo'nisasikhemo werek andi.

²⁰ At Allah nen yi mene ti mene abok yaganisasikhe andi mondogat he, ”Io, wokhisagain,” iluk u hak, Yesus ebe wo'nisasikhemo werek andi nen, nit at ninom hundik logolik Allah fogerati logolik he: ”Ebe asuak,” iluk u hak, ”Amin,” iluk ikhi lago andi.

^21-22 At Allah nenat, hit inom, nit inom, Kristus oba himbirogo ninobagaikhemo welago. Ninebe at onggwarek faget hilingiti logouwageluk ninayonggo figik, silo hak ninobagagik, ikhi logolik, yi mene ti mene hobuk hokhorogo nouwogeluk attak nenggarek hak, Allah nen nit faget mondogat ninobagasikhe mene hobuk wo'nisageluk, attak Areagun tak ninendawinggenma ninobagaikhemo welago.

²³ An o Korintus hinoba wagi'lek kamo isigi andi re, hit hinendawimo weak asinogo iluk kamo isigi mene andi, at Allah nendawimo eilenggen niikherek mene nen elu o.

²⁴ Hit hinendawinggen Allah oba himbiret fesigip mene andi, eberogoat iluk hinendawinggen hambukhogo welagep andi nen he, niren, ”Hinendawinggen yi meneba himbiret fouwak,” iluk ninane ninghogo yagahisogoin lego. We, hit hinendawimo agaiyek anggobagaigen iluk lebethisikhi lago andi.