1 YOHANES 2 - Allah Wene Fano Wene Hupla Inane

”Kristus ebe nit faget hulisanem welagarek,” iluk yagaisasikhe wene

¹ Nen, nagainafuri e. Hit weak hilingiti logoinogo iluk, wene yi lisu palogo hinoba lakfei wagi o. A'nogo meneat he, sa nen weak hilingite halok, nineisena Allah were'ma nit lebetnisikherek mene ap ekhe hulisanem werek. At andi ebe re Yesus Kristus obabut higithogo hilingiterek mene a'nogo aro.

² At ebe a'nogo logolik, nit yi weak ti weak hilingitorek mene sebelogo legetfisaluk, ho'ninaferek. A'nogo hilingiterek andi re, nit weak hilingitorek mene faget enek fuk. Athe, yi afuni ti afuni kweangma mene mondogat weak hilingitarek mene faget ninomat ho'ninaferego.

³ Wene Allah nen komotninaferek wene andi, hologo higithogo hilingiti lago halok he, at ebe nineluo, iluk andiba nen ninendawinggen wenggelogo futfikhi lago.

⁴ Mene re, sa nen, ”An he, Allah ebe nelu,” iluk ikhi logoligat he, aren wene komotninaferek wene andi hologo higithogo hilingiti'lek halok he, at eranenat ikherek andi. Halok he, ebe wene andi endawimo mondok lego.

⁵ A'nogo meneat he, ap sa nen Allah ane hologo higithogo hilingiterek halok he, at andi katokhogo nenat Allah mondok endawirogo welagarego. Nen, nit a'nogoat welago halok, nit Allah ninom hundik welago, iluk andibaat ninendawinggen wenggelogo futfikhi lago.

⁶ Nen, ap sa nen, ”An Allah nemberek hundik welagi,” iluk ikherek halok he, obabut at Kristus hilingiti lagaikhe andi hagat hilingiti logouwago.

Wene ket mene yagaisasikhe wene

⁷ Nerugwi nagaila'lak. Hinebe nendawi e. Wene ket wene komorogo lisu palogo hinoba lakfei wagi fuk. We, attagat Allah nen komorogo yagahisasikhemo eroba nenat fisogo welagep mene o. Wene andi re, at Allah nen attagat komothinafikhemo holhigip mene a'nogo aro.

⁸ A'nogo meneat he, o mum were'ma selek arik lagarek andi hak, selek ebe mene ya'nisa wagaikhemo yari'logo andi nen he, wene ket wene komorogo hinoba lakfei wagi andi. At Yesus nen wene andi higithogo hilingitunem ebe agaikhe andi hak, hiren ogo re, a'nogoat, wene andi higithogo hilingitunem ebe ari'logo andi.

⁹ Nen, ap sa nen, ”An nebe selek oba welagi,” iluk ikhi logoligat he, erugwi agaila'lak abit halok he, o fagearen pikhit yogondak ya, at ebe mum oba werego.

¹⁰ A'nogo meneat he, ap sa nen erugwi agaila'lak endawirogo welagarek halok he, at ebe selek oba mondok logolik, afuni nen it ekhe waroageluk ineranen kwe palharek andi hak, it ekhe weak hilingisuageluk lalinaferek lego.

¹¹ A'nogo meneat he, ap sa nen erugwi agaila'lak abit welagarek halok he, at ebe o mum oba werego. A'nogo were'ma, mum en eilenggen mumetfikhemo ebe o mum oba nikhi logolik, ”Koma laga lagi heat,” onggot obakhe palek werego.

¹² Nagainafuri e. Weak hilingiti lagagip mene ninoe Yesus nen hilingitikhe andiba sebelogo herakfisasikhe andi nen, an nen lisu palogo hinoba lakfei wagio.

¹³ Neisenalage. At ebe o attak eroba nen welagarek mene a'nogo hinelu agagipsik welagep andi nen he, lisu palogo hinoba lakfei wagi. Nen, hit ap alage nagoromi e. Hiren at obabut weak mene a'nogo arat mabenet fisasigipsik welagep andi nen, lisu palogo hinoba lakfei wagi o.

¹⁴ Yenggerugwi nagainafuri e. Nineisena Allah hinelu agagipsik welagep andi nen, lisu palogo hinoba lakfei wagik. Hit neisenalage, at ebe o attak eroba nen welagarek mene a'nogo ebe hinelu agagipsik welagep andi nen lisu palogo hinoba lakfei wagik, hit ap alage nagoromi, hit he Allah ane hinendawimo were'ma hinomamerogo logolik at obabut weak mene arat mabenetfesigip andi nen, lisu palogo hinoba lakfei wagik, igi andi o.

¹⁵ Mene re, afuni kweangma mene inobabut hilingitarek mene andi inom, yi mene ti mene kweangma welagarek mene andi inom, hinendawinggen tulemhogo logogun mondok lego. Ap sa nen it afuni kweangma mene inobabut hilingitarek mene andi, endawinggen tulem welagarek halok he, nineisena Allah endawinggen tulem welagarek mondok lego.

¹⁶ Nen, afuni kweangma mene inobabut hilingitarek he, inoba aigage lagagik, yi mene ti mene ineilenggen en haluk inamolo anggigik, kweangma mene faget fogerakhigik, agarek andi mondogat ero re, nineisena Allah fuk. Ero re, kweangma aro.

¹⁷ Afuni kweangma mene inobabut hilingitarek andi inom, yi mene ti mene inamolo iluk hilingitarek andi inom, lek arik weri'logo meneat he, afuni Allah endawimo amolo anggikherek mene hilingitarek mene andi nek he, ineluk mondok logoguno.

”It ekhe Kristus inom weim pale mene weinam agaikhasik werek,” iluk yagaisasikhe wene

¹⁸ Nagainafuri e. O yogondak he, wurep oba welago o. Afuni ekhe nen he, ”Hobuk ap ekhe Kristus inom weim palek mene wesigin,” iluk yagahisasukwama, hinesanggo holhigip andi hak, o yogondak he, Kristus inom selei mene inebe hokhorogo arat weinam agaikhasik werek andi nen he, niren, ”O yogondak eberogoat wurep oba welago,” iluk ninendawinggen wenggelfuluk futfikhi lago.

¹⁹ It afuni andi inebe re, nit mene palek meneat he, it inebe eberogoat nit werekwe mene lego. It inebe eberogoat nit werekwe mene logoilepma re, inebe nit ninom mondogat logoilo o. Mene re, Allah endawimo nen, ”It andi, inebe mondogat hit mene lek, hunogoat mene werek, iluk, enegat asuak,” iluk anggasikheba it a'nogo wulifukwa andi.

²⁰ A'nogo meneat he, hit enek he, Yesus Kristus Allah onggwaregen fakhasikhe mene a'nogo nen, Allah Areagun wokhisasikhemo ebe wene hinebe mondogat hinelu agagipsik welagebo.

²¹ An nen wene lisu palogo hinoba lakfei wagi andi re, ebe wene hinonggoren fuk. Hinelu welagep andi nenat lakfei wagi o. Nen, ineranen agarek andi ero re, Allah ebe nen fuk. Ero hunogoat, iluk ineluaro.

²² At eranen ikherek mene andi ebe sa anggegep? At andi nen, ”Yesus ebe re, Kristus lego,” iluk kobologo lakfisikherek mene andi lek nogo? Andi aro. At Kristus inom mondok weak mene ebe re, nineisena Allah amlogo Yesus emberek inebe kofolo lakfisikherek mene andi aro.

²³ Ap sa nen, ”Allah amlogo andi, ebe nabit,” iluk kobologo lakfisikhe halok, eisena Allah ebe wanhi'legaro. Nen, ap sa nen, ”Allah amlogo ebe andi aro,” iluk ane fakhogo ikhe halok, eisena Allah ebe wanhe aro.

²⁴ Nen, hit he, wene attagat hinesanggo holhigip mene andi, hinendawimo wanimbik he, eberek mondogat logoino. A'nogo logogun halok he, hinebe nineisena Allah amlogo Yesus emberek hinom hundik logoguno.

²⁵ Nen, at onggwaregen, ”Wokhisagain,” iluk abok yaganisasikhe a'nogo re, ninebe nabulal-habulal hilingninabigeluk isikhe o.

²⁶ Wene yi mondogat he, it afuni hit lalhinabuogeluk walhili'lagwi mene faget lisu palogo hinoba lakfei wagio.

²⁷ At Kristus nen Allah Areagun wokhisasikhemo hinendawimo logolik, yi mene ti mene faget, eranen yagahisigi'lek, eberogoat enek yagahisili'logo andi nen he, afuni ekhe nen wene hit yagahisogoin elo'lego. Wene at Allah nen yagahisili'logo mene andi higithogoat hilingiti logolik, Kristus hinom hundik mondogat logoino o.

²⁸ Nagainafuri e. Kristus wesigin andi sambul ebe wagunem he, nit ninenggali agi'lek, ninailo legat at elokhoma awe a'ma kuogen, hirat at hinom hundik mondok logoino o.

²⁹ At Kristus Allah amlogo obabut fano higithogo nek hilingiterek a'nogo hinelu halok he, hit hinendawimo nen he, ”It afuni ekhe inobabut fano higithogo hilingitarek mene inebe lombok Allah againafuri hobuk taginafemo werek,” iluk hinelu asuguno.