1 TIMOTIUS 5 - Allah Wene Fano Wene Hupla Inane

Timotius nen Allah againafuri mene ekhe, oe agot inom higit yagaisikhi logouwageluk yagatikhe wene

¹ Haren, ap inaluendek mene halok he, hane uare'ma yagaisigi'lek, we, heisugwi yagaisageluk hakhogo hane liokhogoat komorinafi logoino. Nen, ap souge mene andi re, hagaila'lak higit hinom welagik,

² hemi inaluendek andi re, hagaisawi hak hinom welagik, hemi tugum silerik mene andi re, herugwi hanggeat, hendawimo weak mene ebeti'lek heil lomborogo hinom welagik, ikhi logolik, fanorogo komorinafi logoino.

Hemi sogwe mene leberisikhi logouwageluk yagatikhe wene

³ Nen, hemi sogwe afuni it mene nen leberisa mene ekhe le'ma inalegat werek halok he, agaugwerinafi logoino.

⁴ A'nogo meneat he, it sogwe mene andi ineagwi, inombalo lagen tagoma mene ekhe werek halok he, it andi nenat, ”Nit ninebe ero misigaren tago mene,” iluk, iren hilingisu mene yangguluak. Andi re, at Allah endawimo nen he, ”An nawe a'ma logolik, ineisenalagen kulinafi lagaukwa hak, onggo it tak fanorogo leberisikhi logoguno,” iluk endawimo amolo anggikherek andi nen he, a'nogoat leberisikhi logouwak.

⁵ Mene re, hemi sogwe eberogoat afuni ero it mene le'ma inalegat logolik he, ”Allah nenat lebe'nisagain,” iluk, inendawinggen at oba himbiret fuluk, linggene hubanggo ayonggo figik, kino yagatik, ugu mondok welagaikharek.

⁶ Mene re, it hemi sogwe mene ekhe it inamolo mene hesanggeat hilingiri'lagwi mene andi re inebe ineluk werek meneat he, warek hangge werego.

⁷ Hemi sogwe andi faget, it ekhe nen wene inoba figi'lek fano logouwageluk, wene andiat fanorogo komorinafi logoino.

⁸ It ap ekhe nen Allah ane eberogoat iluk wanhukwasik logoligat he, inonggwarek inagainafuri andiat esinet fuluk leberisigik, afuni ero it mene halok ekhe inomat leberisigik, igi'lek halok he, Allah ane herakfisaluk wulifasik hanggeat werego. It afuni endakwe mene nen wene wanhi'lek logolik, weak endebat hak hilingiri'lagwi meneat he, it andi mek he wene wanhukwasigen afuni it mene leberisigi'lek hilingiri'lagwi andi nen, weak hokho hak hilingiri'lagwio.

⁹ It hemi sogwe mene Allah againafuri nen leberisikhi logouwageluk inenu lisu palugun halok he, inebe ta'lagaukwasik oba nen umur 60 tahun oan hilinglagi'lek mene inenu palugun lego. We, umur 60 tahun hilinglaga mene halok inenu palugun. Mene re, inaguni misigat mondok waganek were'ma sogwe fisaga mene halok inenu palugun.

¹⁰ It afuni ekhe nen it hemi sogwe mene andi inabok ikhi logolik, ”It inobabut fano hilingiri'lagwi,” iluk agarek mene halok, inenu lisu palugun. Fano hilingitarek andi re, inonggwarek ineagwi fanorogo kulinafik, ap pok wagunem inebe fanorogo woginafik, Allah againafuri ekhe ineisok ebene sobalinafik, it ekhe weak were'ma leberisigik, inenggi ekhe kamo igi'lek yi mene ti mene faget leberisikho mondok welagik, agarek mene halok inenu lisu paluguno.

¹¹ It hemi sogwe tugum oan mene andi, Kristus inom hundik werek meneat he, herakfisaluk, agasabu nen inendawinggen sebelu lek hak agunem, ap ekhe wanigin andi nen he palu fugo.

¹² It andi sogwe fisugunem, iren he, ”Nit ninobabut Kristus faget enek nineil lomborogo hilingiti logoguno,” ilugen, hobuk a'nogo hilingiti'lek herakfisaga halok, inonggwaregen wene inoba fakhogoin andi.

¹³ A'nogo hilingiti logolik, inobabut he, inenggi wanhi'lek o kuluk ya kwigik nikherek. A'nogo nikhi logolik he, ekhe weak mondok yi'nogo hilingiri'lagwi. Inane yonggo waluk weak ikhi logolik it ekhe inawene meneat talombogengge igik, wene ekhe u lek mene hunogoat mene igik, ilik nikho andi.

^14-15 Halok he, it hemi sogwe ekhe Iblis ombo'ne kwanirogo hela lagaikha andi nen, it ekhe nit Allah againafuri ninom weim palek hangge mene nen ninabok weak palinogo iluk, it hemi sogwe tugum mene andi, inaguni lombok woginapluk he, ineagwi tagaisogo fanorogo tegelogo ferinarek logouwageluk igi andi.

¹⁶ Mene re, he ekhe endawinggen Allah oba himbirik welagarek mene agaisa ekhe sogwe mene werek halok, Allah againafuri mondogat inoba enggin asinogo iluk, arenat lebethikhi logogino. A'nogo lebethugu kwelek, it Allah againafuri mondogaren he, hemi sogwe mene ekhe afuni it mene nen leberisugu lek mene halok, leberisikhi logoguno.

Yi mene ti mene faget komotikhe wene

^17-18 Allah nen mel isikhemo lisu palogo fikhi logolik he: ”Afuni nen sapi wam eisogen gandum agap lilibuk warogo enggen ibiluageluk fuluk he, enggen ekhe nanogo iluk ambe hele homasugun lego. Ekhe noageluk herakfikhi logoino,” iluk isikhemo, lisu palogo fesukwa andi. Nen, ekhe re: ”Afuni yabu yi mene ti mene faget hilingitunem, inenggi onggo wogisikhi logogun o,” iluk isikhemo lisu palogo fesukwaat. Andi nen he, ap Allah againafuri fanorogo kwelaginarek welagaikharek mene andi, it Allah againafuri mondogaren, ”Enggi onggo arat leberisogo,” iluk anggigi'lek, ekhe inomat oba loukhogo lebethikhi logogun o. A'nogo hilingiti logolik, esin hangge re, it ekhe Allah ane inomamerogo yagaisigik, komorinafik, hilingiri'lagwi mene andi, agaukhogo leberisikhi logogun o.

¹⁹ Afuni ekhe nen he: ”At Allah againafuri kwelaginarek werek mene a'nogo weak hilingitemo,” iluk, wene oba fouwogeluk ugunem, inebe pire a, henagan a, ineilenggen furogo haga mene nen, ”Eberogoat,” iluk aga halogat, wene oba fogoin. Nen, a'nogo igi'lek halok, wene oba fogoin lego.

²⁰ It ekhe inailo asuageluk, it eberogoat weak hilingita mene halok, afuni ineilhanemat inenggali warogo fanorogo komorinafi logoino.

²¹ Wene yagaheti mene andi, haren he afuni ekhe helokhoma fisigik, ekhe hambotma fisigik, igi'lek higithogo yagaisikhi logoino, iluk Allah inom, Kristus Yesus inom, ineilhanemat, malaikat Allah nen wenaginafikhesik yonggo pelakfisa wagarek mene inom, ineilhanemat yagaheti andi.

²² Afuni ekhe Allah faget hilingiti logouwageluk, inunggul weak-weak sebelinafi logou fuk. Nen, it ekhe weak hilingitunem hinom hilingiti'lek heil lomborogo logoino.

²³ Ou en hundik-handigat homame lek agarek a'nogo nen halabut faget i nek ninggi logogin lek. We, anggur amusu fano mene ekhe endebat inom ninggi logoino.

²⁴ It ekhe weak hilingitarek mene andi wene inoba figik, kotik, agarek oba oan lagi'le'ma, weinam agarek andi. Nen, it ekhe weak hilingitarek mene sebelek logombigen hobuk weinam asigin mene werego.

²⁵ Andi hagat, it ekhe fano hilingitarek mene weak-weagat weinam agarek andi. It ekhe a'nogo fano hilingitunem hinago mondok logogin lek. We, weinam asigin aro.