1 TESALONIKA 5 - Allah Wene Fano Wene Hupla Inane

”Ninoe Enupogot wagunem elokhoma tegelogo fembik logoun,” iluk yagaisasikhe wene

^1-2 Nerugwi nagaila'lak. Afuni ekhe yogot wanuogeluk hubanggo ninonggorat were'ma wagaikharek hak, ninoe Enupogot wesigin andi sambul a'nogoat wesigin iluk, hit furogo hineluat welagep andi. Halok he, an nen: ”Yi sambul hilinglasigin, ti sambul hilinglasigin,” iluk, lisu palogo hinoba lakfei wesigin he elo'lego.

³ Afuni nen he: ”Nit fano lioksek welago,” iluk, ugu kwelegat, hemi ineagwi ina'ma mene inonggorat were'ma inebe taginabuogeluk horokse'ma inambot heinet weak watarek hak, a'nogoat it inonggot were'ma ferekhogoat weagerinafunem heise wulibu elo'legat asigin o.

⁴ Menere, nerugwi nagaila'lak. Hit o mum oba logoilepma re, afuni inonggorat were'ma yogot wanuogeluk wagunem ina'manggen lagarek hak, andi sambul hit hinonggorat were'ma hina'manggen lelep andi. Menere, hit o mum oba welagep lek andi nen, hina'manggen logoin lek.

⁵ Afuni o linggene selek oba welagaikharek hak, hit mondogat selek andi eisewerek meneat welagebo. Nit he, o hubanggo mum oba welagaikharek hak, andi mene eisewerek welago fuk. Lego.

⁶ Halok he, it ekhe nogo hangge ili'lagwi andi, nit a'nogo ikhi logogun elok lego. We, ninobabut hebelogo logolik, ninendawinggen wenggelogoat logouwogo.

⁷ Afuni nogo agarek andi re, hubanggoat nogo agarego. Nen, anggur enggen amusu naluk lugulugwi palharek andi, hubanggoat naluk palharego.

⁸ Menere, nit selek oba welagorek mene yi, ninobabut hebelogo logolik he, afuni ekhe nen inoasinogo iluk sing inobakheba itarek hak, ninendawinggen Allahba himbirik logolik, afuni inebe ninendawirogo welagorek andi meneat ikhigik, inungguloa'ma inoasinogo iluk inunggulasu haro mene salharek hak, Allah nen telogo fanotninabigin iluk ninendawinggen fano welago andi meneat saligik ikhi logouwogo.

⁹ Allah a'mage, nit ninoba fuluk weagetninabigeluk wena'ninafikhe lek. We, ninoe Enupogot Yesus Kristus nen telogo fanotninabuageluk wena'ninafikhe o.

¹⁰ At Yesus ebe nit faget ninom nineluk mondok logouwogeluk wa'lagaikhesik he, hobuk wesigin andi, ninebe wa'lasumo wesigin he a? Nineluk were'ma wesigin he a. Fano nek. At ebe wesimbik, ninom nineluk mondok logogun andi.

¹¹ Andi nen, hit yogondak ya hilingiti lagep hagat, hit-hit komo-komo igik, hinendawinggen ago wat-wat igik, ikhi logoino o.

Wene wurep kobokhogo komorinafik, hai warinafik, isikhe wene

¹² Nerugwi nagaila'lak. Hinogogwi fethinarek werek mene andi re, ninoe Enupogoren menfisikhemo logolik, hit faget inomamerogo hilingitik, komothinafik, ili'lagwi andi nen he, irat inawe a'ma logolik, hinane agaukhogo yagaisikhi logoino o.

¹³ It a'nogo hilingitarek andi nen, hinendawimo nen he, ”Irat ninogogwi inenu werek logouwago,” iluk, anggikhi logolik, inebe hinendawirogo logoino. A'nogo logolik he, hit-hit hinobabut liokhogo hilingiti logoino.

¹⁴ Nerugwi nagaila'lak. Hiren he, it ekhe yabu wanhi'lek inaberali weak mene andi komorinafik, inailo mene andi komorinafik, inomame lek mene andi leberisigik, ikhi logolik he, afuni mondogat faget hinendawinggen uanhogo ebeti logoino o.

¹⁵ Afuni nen hit ekhe weaget hinafunem, onggo-onggo weagerinafi'lek logolik, hit-hit faget inom, afuni mondogat faget inom, inobabut fanorogo hilingitarek andi meneat esinet fikhi logoino o.

¹⁶ Hinendawimo hinagaiyek agu mondok logoino o.

¹⁷ Hit samban hundik mondok ikhi logoino.

¹⁸ Allah endawimo nen he: ”Hit Kristus Yesus hinom hundik logolik yi mene ti mene mondogat faget an hai wa'nafi logoguno,” iluk anggikherek andi nen he, a'nogoat hilingiti logoino.

¹⁹ Allah Areagun ane sebelogo figik,

²⁰ Allah ane at Areagun nen inendawimo kagalogo yagaisikherek mene andi, hinendawimo sebelfisigik, ikhi logogubo.

²¹ Yi mene ti mene wanuogeluk, ”Yi fano, yi weak,” iluk hinendawimo nen walhaluk, fano mene halogat, hinenggi ninghogo fisogo logolik.

²² Weak mene halok, mondogat hilingiti'lek logoino.

²³ A'nogo were'ma, at Allah nen ninendawinggen hambuget ninobagaikherek mene a'nogo nen, hinebe abirengge onggwarek faget fakhaluk logouwago. Were'ma, ninoe Enupogot ebe wagunem, hinendawinggen inom, hinebe inom, hinobabut inom, wene hinoba figi'lek tegelek mondok were'ma wesuagen he, arenat fethinarek logouwago.

²⁴ At nineisena Enupogot Allah ninayonggo fesikhe mene a'nogo nen: ”Yi'nogo hilinghinabigin,” iluk abok yaganisikherek higithogo hilingiterek a'nogo nen fethinarek logombik, eberogoat hilinghinabigin aro.

²⁵ Nerugwi nagaila'lak. Nit faget samban ikhi logoino o.

²⁶ Hiren he: ”Paulus lagen hai a'nogo wathinafao,” iluk, Allah againafuri logolik inobabut hilingitarek hagat, hinerugwi hinagaila'lak Allah againafuri mene ekhe mondogat hai fanorogo warinabik lano o.

²⁷ Wene lisu palogo lakfei wago mene yi, hinerugwi hinagaila'lak Allah againafuri mene ekhe mondogat ineilhanem enu salubagaigeluk ninoe Enupogot enu hombuk palogo yagahisigi andi.

²⁸ Ninoe Enupogot Yesus Kristus obabut fano a'nogo nen fanorogo fethinarek logouwago.