1 TESALONIKA 4 - Allah Wene Fano Wene Hupla Inane

Allah endawimo fanorogo hilingiti logogun wene

^1-2 Nerugwi nagaila'lak. Wene wurep oba ekhe yi yagahisak. Nit ninoe Enupogot Yesus nen: ”Hinobabut Allah endawimo fanorogo, yi'nogo hilingiti logoino, ti'nogo hilingiti logoino,” iluk, isikhemo yagahisa wagagu a'nogo hinelu. A'nogo yagahisasugumo, hiren a'nogo hilingiti lagep meneat he, hobuk ekhe inomat hokhorogo hilingiti logobagaigeluk ninoe Enupogot Yesus ninom hundik logolik komorogo yagahisigi andi.

³ Allah endawimo nen he mel anggikherek andi: ”Hit hinebe an faget nobagaluk horek mondok logolik, pailak fakfisagarek andi mene fakfisigi'lek mondogat logoino.

⁴ A'nogo logolik, hinagagwi hinaguni lombok woginabik he, hinom fano logolik, hinebe an faget nobagaluk horek logolik, hinobabut higithogo hilingitarek mene hilingiti logoino o.

⁵ It afuni endakwe mene an nebe inonggot logolik inoba agasabu lagagunem hesangge hilingiri'lagwi andi hak, nit a'nogo hilingiti logogun lek.

⁶ Andi mene faget higithogo hilingiti logolik he, hinerugwi hinagaila'lak ineil salogo inagagwi inaguni mene pailak fakfisogoin lego,” iluk Allah endawimo nen a'nogo anggaluk yaganisikherek andi. A'nogo ikherek andi nen, attagat niren ikhi logolik he: ”It afuni pailak a'nogo fakfisagarek mene halok, ninoe Enupogoren wene inoba fagain werego,” iluk, ninghogo komothinafugu andi.

⁷ Allah nen, nit weak hilingiti logouwageluk ninayonggo fesikhe lego. We, ninebe at onggwarek faget fisaluk, horek logolik, higithogo hilingiti logouwageluk ninayonggo fesikhe andi.

⁸ Wene andi hit ekhe nen herakfisikhi lagep halok he, nit afuni ninane mene herakfisikhi lagep fuk. Lego. We, Allah nen Areagun hit wokhisikherek mene a'nogo ane meneat herakfisikhi lagebo.

⁹ Nen, hit-hit hinerugwi hinagaila'lak hinom nendawi hendawirogo logobagaigen iluk, Allah nen elogat yagahisili'logo andi nenat he, hobuk an ninggi'nogo nen: ”Hit hinerugwi hinagaila'lak hinom hinendawirogo hilingiti logoino o,” iluk, lisu palogo hinoba lakfei wesigin nogo. Legaro.

¹⁰ Hit hinerugwi hinagaila'lak o Makedonia tongge mene mondogat a'nogo hinendawirinafi lagep meneat he, nerugwi nagaila'lage. Hobuk hokhorogoat hinendawirinafi logobagaigeluk, hit komorogo yagahisasugu andi.

¹¹ Niren attak yagahisasugu hagat, hinafe morogo logolik hinonggwarek hinenggi nen helikhi lagep mene andiat esinet fikhi logoino.

¹² Andiat esinet fuluk he, it ekhe nen waganekwe nilik nikharek andi hak hilingiti'lek logolik, afuni endakwe mene nen: ”It Kristus agoromi fano hilingiri'lagwi,” iluk uageluk ineilhanem hinobabut higithogo hilingiti logoino.

Ninoe Enupogot wesigin wene

¹³ Nerugwi nagaila'lak. It afuni ekhe nen: ”Fano hilinglasigin,” iluk inendawinggen futfigi'lek logolik he, afuni wa'lagunem inendawinggen weak ari'logo andi hak, hit a'nogo hinendawinggen weak aga logoinogo iluk, wene afuni wa'lari'lagwi mene andi faget hinonggot logogun he, nabit. Hinelu asubagaigen iluk furogo yagahisak.

¹⁴ At Yesus ebe wa'lagaikhesigen eluk agaikhe andi eberogoat iluk futfikhi lago. Andi nen, afuni at inom hundik logolik wa'lari'lagwi mene hobuk Allah nen inelugerinabimbik, Yesus inom mondok logouwageluk eberogoat woginabigin iluk futfikhi logouwagaro.

¹⁵ Wene ninoe Enupogoren isikhe mene yi yagahisak. At ebe wagunem, it wa'lari'lagwi mene herakfisaluk nit nineluk welago mene tak at oba lagagun lego.

¹⁶ Ninoe Enupogot pogoroba nen pi wagunem he, it malaikat inoe kain mene ane hokhorogo igik, Allah ambinggong ane, futhugunem ane pak igik, ugunem, afuni Kristus inom hundik logolik wa'lari'lagwi mene tak inelugerinabigin.

¹⁷ Hobuk nit nineluk logogun mene ninomat ohena anggele'ma hambokhogo wo'ninarek lagagunem he, ninoe Enupogot ninom tulem po ya ambi asi lagambik he, At ninom mondogat logoguno.

¹⁸ Andi nenat, wene andiba hit-hit hinendawinggen fanorogo, hinendawimo ago wat-wat ikhi logoino o.