1 TESALONIKA 3 - Allah Wene Fano Wene Hupla Inane

Timotius nen: ”Tesalonika mene fano werego,” iluk Paulus yagasi wagaikhe wene

¹ Nit hit fagerat ninendawinggen sebelugun elo'lek agama re, mel ogo. Nit o Atena yoma re ninalegenek logoguno.

^2-3 Werek kwelek he, at ninagot Timotius, fano wene Kristus hilingitikhe wene a'nogo ninomat, Allah faget yagaisilik nikhi lago mene a'nogo, afuni nen yi enggin ti enggin hilinghinabi'lagwi andi nen, hit hinendawinggen Kristus oba himbiret fesigip mene abolok inogo iluk, hinendawinggen ago wathinafik, komothinafik ikhi logouwageluk hinoba lakfei wago andi o. Yi enggin ti enggin hilinghinabi'lagwi andi, Allah nen wena'ninafi logoligat: ”A'nogo hilinghinafi logogun,” iluk isikhe hagat hilingninabi'lagwi andi hineluaro.

⁴ Nit attak hit ninom logolik: ”Hobuk yi enggin ti enggin hilingninafi logogun aro,” iluk, yagahisasugu a'nogo higithogo hilingninabi'lagwi andi hinelu o.

⁵ Andi nenat he, at Iblis ninendawimo kagalherek mene a'nogo nen hinendawimo kagali wesumo, niren hit faget set kwalogo hilingiti lagagu a'nogo tulemat alomat lasigin andi nabire, iluk nendawinggen firogo logolik, nendawimo sebeligin elo'lek agama re: ”Inendawinggen Kristus oba himbirigat werega? Lega,” iluk at Timotius nen hinobabut palimbik he yaganesi wesuageluk, hinoba lakfei wagi andi.

⁶ Nen, at Timotius hinoba lakfei wagimo wagasik a'naga, yogondak ambotkwe ninoba wagasik he, hit hinendawinggen Kristus oba himbirik logolik, afuni ekhe hinendawirogo hilingiti lagep mene andi yaganisigik, niren: ”It hinelokhonggen nineilenggen iselo e,” iluk ninamolo anggikhi lago hak, hiren a'nogoat ninoba eberek mondok logolik: ”It inobabut fano a'nogo nineilenggen iselo e,” iluk, anggikhi lagep mene andi, yaganisa wagama re, ninendawimo ninagaiyek anggikhi lago o.

⁷ Nerugwi nagaila'lak. Nit yi enggin ti enggin wiik-weakhogo hilingninafu kwelegat he, hit hinendawinggen Kristus oba himbirigat welagep andi nen, hit faget ninendawimo fano agama welago.

⁸ A'nogo logolik, hit ninoe Enupogot hinom hundik logolik, ninghogo mendek welagep andi nen, nit ogo yogondak ninendawinggen yamuk ikhemo welago.

⁹ Nit nineisena Allah eilhanemat logolik, hit faget ninagaiyek anggugu mondok welago andi faget, Allah hai mondok hokhorogo wati lagosi'mo re, hobuk hai ninggi'nogo wasuheat, hilinglari'logo.

¹⁰ Hit hinendawinggen Kristus oba himbiret fesigip meneat he, oan hangge andi nen, nit ninebe hinoba wesimbigen hinendawinggen hobuk ago wathinobagai wesuogeluk samban hit faget linggene hubanggo ugu mondok welago.

¹¹ Nit hobuk hinoba wesugun en he, nineisena Allah onggwarek inom, ninoe Enupogot Yesus inom, emberegenat kwe higithogo ya'nisoak.

¹² Niren hit hinebe ninendawirogo welago hak, hiren a'nogoat hit-hit hinendawirogo hilingitik, afuni mondogat hinendawirinafik, hokhorogoat hinendawirinafi logobagaigen, ninoe Enupogoren hinobabut inendawirinafarek andi mene oba loukhogo ekhe inomat wokhisikhi logouwak.

¹³ A'nogo hilinghinafi logombik he, ninoe Enupogot Yesus onggwarek agoromi inom at wagunem he, hinebe nineisena Allah onggwarek faget fisaluk, at eilhanem wene hinoba lek fano tegelek were'ma hisa wesuagen, hinendawinggen wurigethinafi logouwago.