1 TESALONIKA 2 - Allah Wene Fano Wene Hupla Inane

Paulus nen afuni o Tesalonika mene inom logolik hilingiti lagaikhe wene

¹ Nerugwi nagaila'lak. Hit hinendawimo nen he: ”It Paulus lak ninoba wagaikha andi re, we tulemat wagaikha lek,” iluk andi re hinonggwarek hinelu aro.

² Hit hinoba oan wagi'lek o Filipi andoma were'ma, afuni andoma mene nen inendawinggen weaget fisigik, yi enggin ti enggin hilingninafik, ikhi lagaukwa. A'nogo meneat he, nineisena Allah nen awene fano wene a'nogo ninailo legengge yagahisa wesuageluk hilingninafikhemo wagagusik yagahisikho were'ma afuni hokhorogoaren: ”Wene andi ninabit,” iluk, ugu kwelegat ninomamerogo yagahisikhi lagagu a'nogo hineluaro.

³ Wene yagahisikhi logolik komothinafi lagagu andi re, hit nong asuageluk wene kwanirogo yagahisigik, ninendawinggen pire logolik yagahisigik, ninane lalogo yagahisigik, ikhi lagagu lego.

⁴ Athe, we, at Allah nenat ninobabut palogo nen he: ”Fano wene andi, hirat waluk nikhi logobagaik,” iluk, ninayonggo fesikhe higithogo yagahisikhi logolik, afuni inendawimo fanorogo yagaisogorek fuk. Lego. We, Allah ninobabut pali'logo mene a'nogo endawimo fanorogo yagaisogorego.

⁵ Nit he, ninendawimo nen, yi mene ti mene ninalegat ninoba logoilep, iluk anggikhi logolik, ninaneba nen agaukhogo yagaisikhi lago lek mene andi re, hirogo hineluaro. Nen, Allah eluatma re, arenat: ”Andi eberogoat,” iluk igin andi.

⁶ Hiren nit fogetninafik, it ekhe nen fogetninafik, afuni mene nen a'nogo fogetninabuageluk ikhi lago lego. We, at Kristus nen nayonggo fesikhesik laknobagai wagaikhemo wene wule logolik nane ninghogo yagahisagain higit meneat he.

⁷ Inagaisawi nen ineagwi alelogo woginafarek hak, hit ninom fanorogo logolik alelogo wokhinafi lagagi andi.

⁸ Niren hit hinebe ninendawirogo welago andi nen, Allah ane andi nek sumbuthisasugu fuk. Lego. We, hinebe ninendawi mondogen, ninendawimo ninagaiyek anggikhi logolik, ninebe inomat wokhisasugu.

⁹ Nerugwi nagaila'lak. Nit Allah ane fano wene andi yagahisugunem, yi mene ti mene faget hit ekhe hinoba seget asinogo iluk, nit ninonggwaregen linggene hubanggo ninomamerogo hilingitik, set kwil-kwalhogo hilingitik, ikhi lagagu a'nogo hineluaro.

¹⁰ Nit hit wene eberogoat iluk wanhigip mene halok ninom logolik afuni nen, ”It weak hilingita,” iluk wene ninoba figi'legat, tegelek logolik higithogo nek hilingiti lagagu a'nogo, hit Allah hinomat hinelumo re, ”Andi eberogoat,” iluk ugun andi.

^11-12 Hit Allah awe a'ma kuluk fogeratarek oba andoma logobagaigeluk hinayonggo fesikhe mene andi, at endawimo anggikherek mene higithogoat hilingiti logobagaigen iluk he, niren ineisena lagen inagainafuri komorinafarek hak, hinebe lombok komothinafik, hinendawinggen sebelhik, hinendawinggen kagalhik, ikhi lagagu a'nogo hit hineluaro.

Allah againafuri faget Paulus endawimo agaiyek anggasikhe wene

¹³ Niren wene Allah ane a'nogo yagahisasugumo, hiren he, ”Wene andi afuni inane mene lego. We, Allah ane aro,” iluk wanhigip andi re, eberogoat Allah aneat wanhigibo. Andi nen nit kamo igi'lek Allah hai wato mondok welago. At Allah nen hit hinendawinggen Kristus oba himbiret fesigip mene halok hinendawimo kagalhu mondok welagarego.

¹⁴ Nerugwi nagaila'lak. It Allah againafuri ekhe Kristus Yesus inom hundik logolik, o Yudea andoma andogori'lagwi mene, inonggwarek inagaila'lak Yahudi mene nenat yi enggin ti enggin hilinginafi lagaukwa hagat, hit hinagaila'lak mene nenat yi enggin ti enggin hilinghinabi'lagwi o.

¹⁵ It ap Yahuri mene nenat, it ap fageat Allah ane yagaisikhi lagaukwa mene inebe inoatik, ninoe Enupogot Yesus ebe watik isukwa hagat, nit yi enggin ti enggin hilingninabi'lagwi andi, Allah nen fano iluk anggikherek lek. It andi afuni inom weak enek logolik,

¹⁶ Allah nen it afuni enda'ma mene telinabuageluk niren fano wene yagaisilik lagunem, afuni inanggwe palharek hak, it afuni Yahudi mene andi nen he, ”Wene fano wene andi yagaisogoin lek,” iluk wene pali'lagwi andi. A'nogo hilingiti logolik, hundik-handik weak hilingitarek meneat he ekhe inom hilingiri'lagwi andi nen, Allah a'mage lagaikhesik, wene hokho mene inoba fikhe andi.

Paulus afuni o Tesalonika mene hobuk isa lageluk isikhe wene

¹⁷ Nerugwi nagaila'lak. Niren he, hit hinale'ma hinobagaluk wagagusik, yogondak ya elama faget ninebe yatma welago meneat he, ninendawinggen hit ninom misi'mo seberogo welago andi. A'nogo logolik he, ”Hinebe nineilenggen hisa lelo e,” iluk, attagaren ninagaiyek hokhorogo hikhi logolik hinoba wesuogeluk walhikhi lago.

¹⁸ Walhikhi logolik he, an Paulus nonggwarek nenggi attak ekhe wesigeluk walhigik, hobuk ekhe wesigeluk walhigik, igi meneat he, Iblis nen nanggwe palhemo nen kamo igi andi.

¹⁹ Niren he, ”Fano asigin,” iluk ninendawimo ninagaiyek hikhi lago andi re, sani faget nogo? Ninoe Enupogot Yesus ebe wesimbik he: ”Fano hilingitep” iluk, at eilhanem enegat ninobagaumo ninalong asigin andi, ero kiba nen nogo? Ero hunogo mene faget fuk. Hit hinebe fagerat ninalong asigino.

²⁰ Ninendawimo ninagaiyek anggigik, ninalong agik, ikhi lago andi hit hinebe fageraro.