1 TESALONIKA 1 - Allah Wene Fano Wene Hupla Inane

Hai warinafikhe wene

¹ Hit Allah againafuri o Tesalonika andogoti logolik, nineisena Allah inom, ninoe Enupogot Yesus Kristus inom, hinom hundik welagep mene, nerugwi nagaila'lak. An Paulus, nagaila'lak Silas Timoteus ninomen wene yi lisu palogo hinoba lakfei wago andi. Nineisena Allah obabut fano a'nogo nen fano mene wokhisigik, hinendawinggen hambuget hinafik, ikhi logouwago.

Allah againafuri o Tesalonika mene inendawinggen eberogo nenat Allah oba himbiret fesukwasik inobabut hilingiti lagaukwa wene

² Niren samban hit mondogat faget hinenu ikhi logolik he, Allah hai watu mondogat welago.

³ Nineisena Allah eilhanem samban a'nogo ikhi logolik he, hit hinendawinggen Allahba himbirik logolik hinobabut hilingiti lagep mene inom, afuni ekhe hinendawirogo logolik hinomamerogo leberisikhi lagep mene inom, hinendawimo nen: ”Ninoe Enupogot Yesus Kristus nen fano hilingninabigin,” iluk hinafe morogo welagep mene inom, niren hit hilingiti lagep mene andi faget hinoba kamo igi'lek eberek mondogat welago.

⁴ Nerugwi nagaila'lak. Hit hinebe Allah nen endawirogo logolik At onggwarek faget wenakhinafikhemo welagep andi nineluo.

⁵ Nit fano wene waluk yagahisa wagagu a'nogo re, ninaneba nek yagahisikhi lagagu fuk. We, Allah Areagun a'nogo ninendawimo logolik, omamerogo lebetnisugu kwelek, ninendawimo nen: ”Wene yi eberogoat,” iluk ninendawinggenma futfesugusigenat yagahisikhi lagagu andi. Nit o andoma ninom logolik, hit fagerat hilingiti lagagu a'nogo hineluaro.

⁶ Hit yi enggin ti enggin hilinghinafu kwelegat he, hinagaiyek anggikhi logouwageluk Allah Areagun en hinendawimo kagalhikhemo, hinagaiyek anggikhi logolik fano wene wanhigipsik he, nit ninobabut wanhik, ninoe Enupogot obabut wanhik isigip andi o.

^7-8 Ninoe Enupogoren hilingitikhe wene a'nogo hit were'ma andoma nen wialarik wulifikhe andi re, o Makedonia nen o Akhaya lagaikhe andi. Menere, andi nek fuk. Hit hinendawinggen eberogo nen Allahba himbiret fesigip mene andi hinabok fano o yi awi ti awi mondogat lagaikhemo inelumo re, niren hobuk hinabok yagaisogoin legaga. Andi nen he, afuni o Makedonia mene inom, o Akhaya mene inom, fano wene eberogoat iluk wanhukwa mene halok, mondogaren he: ”It fano hilingiri'lagwi,” iluk, hinobabut waganogo hilingiri'lagwi andi.

^9-10 Iren wene mel ili'lagwiat: ”It afuni o Tesalonika mene nen, Paulus lak inebe woginafasik he, eberogoat he, Allah eluk mondok welagarek mene andi aro, iluk awe a'ma logolik, at faget hilingitik, at amlogo pogoroba nen pi wesigin andi ebe nenangorogo welagik uogeluk he, tugwi kembu herakfisaluk inelokhe hebelogo Allah wogetukwasik werego. Allah nen amlogo wa'lagaikhemo nen eluget fesikhe a'nogo ebe Yesus andi aro. Nen, Allah a'mage afuni inoba fagain sambul he, nit Yesus andi nenat telninabigino,” iluk, hinabok fano ili'lagwi aro.