1 TAWARIKH 5 - Allah Wene Fano Wene Hupla Inane

Hun Ruben ambisangma mene a'nogo

^1-2 Hun Yakub amlogo manggusa mene re Ruben a'nogo. Oba nen he at Ruben eisena nen agagwi amingmingengge mene agweap erasikhe mene omanogo ekhe inom nogosukwama re o elonggoma andoma weagerogo fesikhemo re, at amlogo manggusa mene hilingi'mo yi mene ti mene eisena alolegengge at hela mene a'nogo re waganogo Yusuf wogetikhe. A'nogo hilingitikheba nen he, at Yakub en tagoma mene andoma omame mene re, at Yusuf he fuk, at he at Yehuda welagaikhe. Nen fem attak-attak it afuni Israel mene mondogat inobaget inoe raja menlagaikhe mene ogore, it inunggulenu Yehuda mene andiat.

³ At Yakub amlogo manggusa mene Ruben andi re, amlogomi inebe enggaminogo nen welagaukwa, inenu re: Henokh, Palu, Hezron, Karmi inom andem.

^4-6 At Yoel ambisangma nen ta'larik wagaukwa mene eroma nen pilingisogo re yi: Semaya, Gog, Simei, Mikha, Reaya, Baal, Beera inom. At Beera andi re, hun raja Asyur agun Tilgat-Pilneser a'nogo nen woginapluk huginabi lagaikharek oba omanogo lagaukwa sambul he, at andi nen it inunggulenu Ruben mene faget inoe melalinafu mene welagaikhe.

⁷ It ta'larik wagaukwa mene a'nogoba re it inogogowi kaindek it inunggulenu Ruben meneba andoma palogo welagaikhe mene re yi: Yeiel, Zakharia,

⁸ Bela, hun Azas amlogo, hun Sema omba, it Yoel inap ineisok erokwe mene welagaikhe. It inunggulenu Ruben mene re, o Aroer inom, o wilayah Aroer huli nen he o Nebo abel ambol kwe utara fikhit omanogo nen o Baal-Meon huli andoma welagaukwa.

⁹ It afuni andi re inaiba yi mene ti mene tati lagaukwa mene re o Gilead andoma hokhorogo welagaikhe. Andiba re, it inebe o wilayah mo lagai wagarek higit omanogo nen he, o i Efrat lagarek huli omanogo irenek sagarek welagaukwa.

¹⁰ At raja Saul a'nogo mendek were'ma re, it inunggulenu Ruben mene andi nen he, afuni Hagri inap o Gilead en mo lagai wagarek higit timur fikhit welagaukwa mene andoma pin talogo sebeli kwisukwasik o andoma femhogo welagaukwa.

Hun Gad ambisangma mene a'nogo

¹¹ It inunggulenu Ruben mene were'ma nen abel ambolkwe utara fikhit he inunggulenu Gad mene a'nogo o Basan kweang oba andoma nen he, o Salkha nen mo liabi wagarek kwe timur fikhit andoma huli welagaukwa.

¹² It inunggulenu Gad mene andiba nen he hun Yoel andi re it afuni elokhoma inap andoma inomba attak mene welagaikhe. Nen Safam he it afuni hobuk mene oba nen he it inambotma mene inomba welagaikhe. Nen, at hun Yaenai inom, Safat inom he, it ap inenu fena amu mene inomba welagaikhe.

¹³ It afuni inunggulenu Gad mene inoba nen amu mene it ap inenu sabiren yiba seberogo kwelabek welagaikhe mene re a'makwe yi: Mikhael, Mesulam, Syeba, Yorai, Yakan, Ziya, Eber inom andem.

¹⁴ It andi re hun Huri amlogo Abihail a'nogo nen tagoma mene. It ta'larik wagaukwa aple a'ma fikhiren liabek he yi'nogo wenago welagaikhe: Huri, Yaroah, Gilead, Mikhael, Yesisai, Yahdo, Bus inom andem.

¹⁵ It ap inenu lombok andi inoe kain menere hun Ahi, Abdiel amlogo hun Guni omba a'nogo welagaikhe.

¹⁶ It andi re o wilayah Basan oba andoma inom, Gilead oba andoma inom, nen kota-kota o wilayah andiba werek mene omanogoba inom, o Saron nen lei engga werekwe andoma inom welagaukwa.

¹⁷ It ta'lagaukwa mene wenatukwa mene andi re at Yotam it afuni Yehuda mene inobaget inoe raja werek kwelek, nen at Yerobeam he it afuni Israel mene inobaget inoe raja werek kwelek, wenatukwa.

It afuni weim yafarek mene I Yordan fena mo liabi wagarek higit welagaukwa mene omanogo.

¹⁸ It i Yordan fena mo liabi wagarek fikhit welagaukwa mene andoma re inunggulenu Ruben mene inom, Gad mene inom, Manasye mene inom welagaukwa. It andoma re ap weim sikhe inenggi puk inap, mondok inelu-pinelurogo melalek inap, sikhe inom, tok kwepalengge inom, karok inom, wanharek inelu inap inebe re 44.760 nen welagaukwa.

¹⁹ It inebe a'nogo logolik he, iren ap inunggulenu Hagri meneba nen it inunggulenu ekhe Yetur inom, Nafis inom, Nodab inom andoma inom weim yafi lagaukwa.

²⁰ It ap weim yafu aple inelu mondok welagaikhe inap andoma nen he, ”Allah nineisena, Haren lebetnisan o,” iluk kino yagatukwama, Allah nen he iren yagatukwa mene a'nogo higithogo esanggo holhikhesik he, it ap Hagri inap inom, it fena inebe misik sebe iluk inebikhit weim yabi kwi waga lagaukwa mene omanogo inom, inoba inomame leget fisasikhesik he, inalonget fisasikhe.

^21-22 Weim yafukwa mene andi re At Allah endawimo anggasikhe mene higithogo hilingi'mo re ap inaselei mene hokhorogo inoatukwa. A'nogo inoati logolik iren ap fena inebe 100.000 nen hele warinarek waga logolik he, inanggo unta ebe 50.000 nen inom, inanggo domba 250.000 nen inom, wam keledai 2.000 nen inom telasukwa. A'nogo hilingitukwa andi huli nen, it inebe o omanogo werek kwelek enek he it afuni Israel mene hele warogo huginabi logoin huli omanogo re o andoma welagaukwa.

It afuni inunggulenu Manasye mene i Yordan fena mo liabi wagarek higit welagaukwa mene a'nogo

²³ It inunggulenu Manasye mene a'nogo re fenakwe minggilogo o wilayah Basan nen he lagaikhesik abel ambolkwe utara fikhit o Baal-Hermon inom, Senir inom, Tom Hermon inom, mondok yat-pathogo andoma huli welagaukwa. It inebe a'nogo welagaukwa mene a'nogo logolik-logolik he mondok sik-pik isukwa.

²⁴ It andi nen inogogwi kaindek mendek welagaukwa mene re yi: Hefer, Yisei, Eliel, Azriel, Yeremia, Hodawya, Yahdiel inom andem. It inebe mondogat he ap sikhe fisogo mene inafe hibilik-hebelek mene nek welagaukwa.

It inunggulenu inap I Yordan fena mo lagai wagarek fikhit welagaukwa mene a'nogo afuni huginabi lagaikharek oba fisa lagaukwa mene a'nogo

²⁵ It afuni Israel mene re inombawi nen Allah fogerati lagaukwa hakhogo hilingiti'lek, At oba tiphogo hilingiti legengge hilingiti lagaukwa. Iren he Allah ebe herakfuluk tugwi kembu o Kanaan oba Allah nen mugusogo wulakfisasikhe mene omanogo obaget hilingiti logolik fogerati lagaukwa.

²⁶ A'nogo hilingiti lagaukwama re At Allah nen hun Pul raja Asyur mene a'nogo endawimo hilingitikhemo re, at a'nogo lagaikhesik o it Israel mene were'ma omanogo pin kwi lagaikhe. Hun Pul andi enu ekhe re Tiglat-Pileser iluk inelu welagaikhe. A'nogo kwi lagaukwasik he it inunggulenu, Ruben, Gad, Manasye, i Yordan fena mo liabi wagarek fikhit welagaukwa mene a'nogo mondogat feleleng inarek he, o Halah inom Habor inom, Hara inom, obalik ekhe ale'ma i Gozan horokhogo andoma inom, huginabi lagaukwa. Andoma huginabi lagaukwama re yogondak huli nen inom o andoma femhogo welagaikharek.