1 TAWARIKH 4 - Allah Wene Fano Wene Hupla Inane

At Yehuda ambisangma mene nen tagomangge a'nogo

¹ Ekhe ombo'ne yi re at Yehuda ambisangmangge nen ta'larik wagaukwa mene fenakwe a'nogo inenu re yi: Peres, Hezron, Karmi, Hur, Syobal inom andem.

² At Syobal andi re hun Reaya eisena, nen at Reaya andi re hun Hayat eisena. Hun Hayat andi re amlogomi inebe pire welagaukwa mene inenu re: Ahumai inom Lahad inom andem. It andem he afuni o kota Zora welagaukwa mene omanogo inombawi.

^3-4 Hun Kaleb agwe Efrata a'nogo inomen taginafukwa mene re amlogomi ap manggusa mene enu re Hur andi. At Hur ambisangmangge andoma re o kota Betlehem wutukwa inap, nen hun Hur amlogomi re Etam inom Pnuel inom, Ezer inom andem. At Etam andi re amlogomi ap inebe henagan welagaukwa mene inenu re, Yizreel, Isma, Idbas inom andem, nen a'logo misik ekhe enu Hazelelponi welagaikhe. At Pnuel nen he o kota Gedor wutikhe, nen at Ezer en he o kota Husa wutikhe.

⁵ Hun Asyur o kota Tekoa wutikhe agun a'nogo re agagwi inebe pire woginarek welagaikhe mene inebe re he Hela inom, Naara inom andem.

⁶ He Naara inomen he inamlogomi abengge taginafukwa mene inenu re, Ahuzam inom, Hefer inom, Temeni inom, Ahastari inom andem.

⁷ He Hela inomen he hun Asyur a'nogo amlogomi inebe henagan taginafukwa mene inenu re, abo Zeret inom, Yezohar inom, Etnan inom andem.

⁸ Hun Anub inom, Hazobeba inom, hun Kos amlogomi andem he it afuni Arharhel mene hun Harum omba andi ambisangma mene welagaukwa.

⁹ Ap misik ekhe enu re Yabes welagaikhe. At andi re afuni nen foget fikhi logolik at agaila'lak omanogo sebel fisikhi lagaukwa. At ebe agaisa nen takhikhi logolik ourogo takhasikhe andi nen he enu Yabes iluk salhikhe.

¹⁰ Oba nen he at Yafes nen Allah it afuni Israel mene nen fogerati lagaukwa mene a'nogo ba samban ikhi logolik he yi'nogo isikhe, ”Neisena Allah, an fanot nobagambik an nawi wilayah elonggo wogologo hokhot nobagain o. An ou-pou higi hanogoluk enggin mene andi an noba nen korogo lakfigik, an nebe kwe palogo fetnarek welagik, hilingiti logoin o, neisena,” iluk samban isikhe. A'nogo samban isikhemo re at Allah nen kino yagatikhe mene a'nogo higithogo hilingfesikhe.

It afuni inenu fenakwe palek mene a'nogo

¹¹ Hun Kelub hun Suha agailak andi re amlogo ekhe enu re, Mehir welagaikhe. Nen at Mehir andi amlogo re Eston.

¹² Nen, Eston he amlogomi ap inebe henagan welagaukwa mene inenu re, Bet-Rafa inom, Paseah inom, Tehina o Nahas kota wutikhe agun andi inom welagaukwa. It ap andem inambisangma mene re o Rekha andoma welagaukwa.

¹³ Hun Kenas andi re amlogomi inebe welagaukwa mene inenu re, Otniel inom he Seraya inom andem. At Otniel andi ogore amlogomi ap inebe pire welagaukwa, nen inenu re, Hatat inom, Meonotai inom, nen at Meonotai andi amlogo enu re Ofra welagaikhe.

¹⁴ Hun Seraya andi amlogo Yoab andi re o tonggoma andoma logolik, inenggi nen elalhigik hilingitarek mene erotikhe agun. Afuni o tonggo andiba welagaukwa mene andoma re inenggiba ekhe mene ekhe mene wutu aple inelu mene nek welagaukwa.

¹⁵ Hun Kaleb Yefune amlogo a'nogo re amlogomi ap inebe henagan mene welagaukwa, it inenu re, Iru inom, Ela inom, Naam inom andem, nen at Ela andi amlogo re Kenas.

¹⁶ Hun Yehaleleel andi amlogomi ap inebe enggaminogo mene welagaukwa, nen it andem inenu re, Zif inom, Zifa inom, Tireya inom, Asareel inom andem.

^17-18 Hun Ezra amlogomi re ap inebe enggaminogo welagaukwa mene inenu re, Yeter, Mered, Efer, Yalon inom andem. Hun Mered andi re hele Bica hun raja Firaun Mesir mene a'nogo a'logo inom helasikhesik he, it ina'logo hele mene misik ekhe tatukwa mene enure, Miryam, nen abomalik he inebe pire mene inenu re, Samai inom, Yisbah inom andem. At Yisbah andi re o kota Estemoa wutikhe agun. Nen Mered he agwe ap inunggulenu Yehuda mene ina'logo ekhe helasikhesik he, it inamlogomi inebe henagan taginafukwa, inenu re: Yered o kota Gedor wutikhe agun andi inom, nen Heber o kota Sokho wutikhe agun andi inom, Yekutiel o kota Zanoah wutikhe agun andi inom taginafikhe.

¹⁹ Hun Hodia re agwe hun Naham a'logo helasikhe. It inambisangma mene re ap Karmi inap, Maakha inap, andoma inombawi. It Karmi inap andoma re o kota Kehila omanogo welgaukwa, Nen it Maakha inap he o kota Estemoan andoma welagaukwa.

²⁰ Hun Simon he amlogomi inebe enggaminogo welagaukwa, mene inenu re, abo Amnon, Rina, Benhanan, Tilon inom andem. Hun Yisei re amlogomi inebe pire welagaukwa mene inenu re Zohet inom, Ben-Zohet inom.

Hun Sela ambisangmangge nen tago mene a'nogo

^21-22 At hun Yehuda a'nogo amlogo misik ekhe enu re Sela welagaikhe. At andi ambisangmangge ta'lagaukwa mene re yi'nogo: Er o kota Lekha wutikhe agun. Lada re o kota Maresa wutikhe agun. It su kain lenan eil sakhorek mene lalhi lagaukwa inap andoma re o kota Bet-Asybea welagaukwa. Yokim inom. It o kota Kozeba inap andoma inom Yoas inom. Sarap hemi Moab mene woginafikhesik o Betlehem wagaikhesik welagaikhe agun andi inom. Taginafikhe mene inenu palek andi re endamat palogo fesukwa meneba nen palogo fesukwa andi.

²³ It ap inebe mondogat andi re inoe raja faget iwak kweang meneba elalhigik wutik waruk elalhik hilingiti logolik, o kota Netaim inom Gedera inom andomaba welagaukwa inap.

Hun Simeon ambisangma nen tagongge mene a'nogo

²⁴ Hun Simion a'nogo re amlogomi ap inebe fuaben mene taginafikhe mene inenu re, Nemuel inom, Yamin inom, Yarib inom, Zerah inom, Saul inom andem.

^25-26 At Saul andi ambisangma mene re inebe re yi: Salum Mibsam Misma Hamuel Zakur Simei inom andem taginafikhe.

²⁷ At Simei andi againafuri inebe lambulogo re 22 nen taginarek welagaikhe. Inebe 16 nen andi re alage taginafikhe, nen 6 en andi re helime taginafikhe mene welagaukwa. Oba nen he at Simei agaila'lak erugwi inom inagainafuri inom inebe we endebengge welagaukwa. At Simeon ambisangma mene nen ta'lagaukwa mene re, at Yehuda ambisangma hilingik welagaukwa hakhogo welagaukwa lek.

²⁸ At Simeon ambisangma mene andi re at raja Daud menlagaikhe huli nen ogore o kota it welagaukwa kwe re yi: Bersyeba, Molada, Hazar-Sual,

²⁹ Bilha, Ezem, Tolad,

³⁰ Betuel, Horma, Ziklag,

³¹ Bet-Markabot, Hazar-Susim, Bet-Biri, Saaraim, inom andoma welagaukwa.

³² It ap andi ogore o sili fuaben ale'ma ekhe welagaukwa mene re yi: Etam, Ain, Rimon, Tokhen, Asan kwe andoma inom welagaukwa,

³³ o sili endep mene o it welagaukwaba andoma nen maserogo re o kota Baal huli ma'lima wurogo welagaukwa. Andoma re, at Simeon ambisangma meneba nen it inebe ta'larik wagaukwa mene inom, it inawi ero welagaukwa mene faget inom lisu palogo fisogo welagaukwa.

^34-38 Ambolkwe yi re at unggulenu Simeon meneba nen inogogwi kaindek welagaukwa mene a'nogo inenu re yi: Mesobab Yamlekh, Yosa hun Amazia amlogo a'nogo Yoel Yehu hun Yosibya amlogo (Yosibya andi re Seraya amlogo, nen at omba re Asiel), Elyoenai Yaakoba Yesohaya Asaya Adiel Yesimiel Benaya Ziza hun Sifei amlogo (at Sifei ta'lagaikhe huli nen ambolkwe ta'larik wagaukwa mene andi re: Alon, Yedaya, Simri, Semaya inom andem). It ineisok erokwe mene a'nogo hokhorogo hilinglaga lagaikhemo,

^39-40 it a'nogo pugulogo saga ilik laga logolik he o mo ubuk ikherek fikhit o kota Gedor tonggo ekhe meneba andoma horokhogo asi lagaukwa. O andoma nen esanggo fena mo liabi wagarek fikhit andoma re iren lei engga mondok muli-muli hilingi'mo it inanggo ogo engga fano na higiroba heratukwa. Attak o andoma re it afuni Ham inap logolik inailo legengge mondok fani-fanorogo welagaukwaba.

⁴¹ At Hizkia afuni Yehuda mene faget raja were'ma re at Simeon ambisangma mene nen o Gedor pin kwi lagaukwa. Kwi lagaukwasik he iren afuni andoma mene inawi tenda wurik mene inom, it afuni Meunim inaben inawi mondogat meisaklambukhogo hilingfesukwasik, inebe mugusogo wulaginafukwa. A'nogo wulaginafukwasik he o andoma lei engga hokhorogo inanggo faget weregen he, o andoma femhogo welagaukwa.

⁴² Nen, at Yisei againafuri omanogo nen woginarek menere, hun Pelaca, Nearya, Refaya, Uziel inom, nen it inunggulenu Simion mene fena inebe 500 mene inoma he o Edom mo liabi wagarek fikhit andoma pugulogo lagaukwa.

⁴³ Andem oba re it afuni inunggulenu Amalek mene fena welagaukwa mene omanogo inoatukwasik he yogondak huli nen o andoma welagaikharegat.