1 TAWARIKH 28 - Allah Wene Fano Wene Hupla Inane

O Tuhan Awi a'nogo wusugun mene faget at Daud en yi'nogo wu'no iluk yagaisasihe wene

¹ Raja Daud nen wene ayo palogo wulafi logolik he, it afuni inogogwi kaindek o Yerusalem oba andoma mondogat kabogesi wesuageluk yagaisasikhe. A'nogo yagaisasikhemo re, it ap kepala suku inom, ap yabu pemerintah ba hilingitarek inap omanogo inom, it inunggulenu lombok omanogo faget kepala welagaukwa inap omanogo inom, it hun raja angge onggwarek mene inom, anggo inom, at againafuri inom, faget kagalek welagaukwa mene omanogo inom, katukhogo re at raja ebe were'ma ap hokho-hokho inap welagaukwa mene omanogo inom, it inasikhe werek inap tentara inogogwi perwira omanogo inom, ap inogogwi lego inap kaindek-kaindek omanogo inom, abirengge o Yerusalem kabogetukwa.

² A'nogo kabogetukwama re at Daud a'nogo nen inelokhoma menlagaikhesik yagaisikhi logolik he, ”Nagaila'lak ninunggulenu misik mene, hinesanggo fanorogo holini o! An nen o attak andoma nenat ebeti logolik he Peti Wene warogo wo'ninafikhe mene ari, nineisena Tuhan Allah eisok fuguba faget o mondok fano mene misik ekhe wusugun iluk nendawimo wenggelhigi. A'nogo wenggelhigisik he o At fogeratuba misik ekhe wusigin iluk he o ebenengge mondogat fougerati.

³ Oba nen he an nebe ap sikhe fisogo mene logolik, ap inamep hokho-pokhorogo pelaginafi lagagimo re, At Tuhan nen o andi faget he, haren wusigin lek, iluk elele wanhe andi.

⁴ Tuhan Allah nit afuni Israel mene nen fogerati lago mene a'nogo nen he an inom an nen tagomangge mene nen taginabugun mene inom, afuni Israel mene mondok-mondok melalinafu logouwageluk tegelogo ninobagasikhe. Nen, ap melalinafu mene andi fik-fouk esigiluk he Aren it inunggulenu Yehuda mene tegelogo fisasikhe, nen inunggulenu andiba nen he Aren an neisena eisok erokwe mene wenagaisogo fisasikhe. Nen an neisena eisok erokwe mondogat andi nen he At Tuhan nen endawimo anggikhesik an wenagaisogo nobagaikhesik, it afuni Israel meneba nen raja mendek logouwageluk anggikhe andi.

⁵ Aren he an nanlogomi hokhorogo wo'netesik, an nagainafuri mondogat andoma nen he at Salomo nek he o kerajaan Tuhan it afuni Israel mene omanogo inoe raja logolik melalinafi lagogin mene wenagaisogo fesikhe.

⁶ Tuhan nen an noba ikhi logolik he, yi'nogo yaganete, hat hamlogo Salomo andi nen o An nawi andi wu'nesigin o. Nen at ebere An namlogo asuageluk wenati, nen An he at eisena asigin.

⁷ Nen aren ambi, An nawene melalek inom, wene yi'nogo hilingi'no ti'nogo hilingi'no iluk inom werek mene a'nogo hundik-handik higithogo, yogondak hilingiri'lago andem hakhogo hilingiti logogin halok he, at raja logolik melalinafi logogin mene andi mondok-mondok faget An nen omamet fikhi logogin, iluk yaganete,” iluk yagaisasikhe.

⁸ A'nogo yagaisasikhesik ekhe wurep lisogo yagaisikhi logolik he, ”Arigini'mo re nagoromi yogondak he, At nineisena Allah eilhanem inom, nen it afuni Tuhan againafuri Israel mene abirengge kaboksek yi ineilhanem inom, At nineisena Tuhan Allah nen awene melalek yaganisikhe mene andi mondok fifurogo hilingiti logobagaigen kino yagahisikhi lagi o. A'nogo hilingiti logogun halok he, hiren o kweang mondok fanoma yi fetaluk logolik he, hiren tagomangge mene nen taginabugun meneba mondok-mondok andoma faget hinalolegengge hakhogo wokhisagain o,” iluk yagaisasikhe.

⁹ A'nogo yagaisasikhesik at Salomo ba Daud en ikhi logolik he yi'nogo yagatikhe, ”Namlogo e, Allah hat heisena nen fogerati lagi mene andi faget enek eberogo an neisena Allah iluk fageti logoino. At Allah re nit ninendawinggenma wenggelhi lago mene inom, ninamolo anggikhi lago mene inom mondogat elu hilingi'mo re, hat hendawinggen pikhithogo, hobabut sakhorek oba, At obaget enek hilingiti logoino. Nen, haren At ebe heratu halok he At ebe herakhagain, oba nen he haren At herakfuluk lagain halok he, Aren mondok-mondok faget hat nabit iluk oboget heagain.

¹⁰ Tuhan nen hat wenak hafi logolik, Haren o At aiba enogo amu wusuageluk wenak hafe mene andi furogo wenggel hano. Enggere yogondak hat hendawimo nen o andi wusigin iluk ninghogo wu'no,” iluk yagatikhe.

¹¹ A'nogo yagatikhesik at Daud en he, o Tuhan Awi a'nogo ebe wusugun mene faget inom, o yi mene ti mene fuguba faget inom, o senggelek elonggokwe omanogo mondogat faget inom, o senggelek ekhe obalik Mondok Hore'ma afuni inaweak legaphogo fuguba a'nogo faget inom, endawinggen wenggelogo iluk palhikhe mene a'nogo Salomo wogetikhe.

¹² At Daud en he o sili enggen tulem wusugun iluk wenggelhikhe mene inom, ambe maserogo andoma faget inom, o gudang Tuhan Awiba andi elonggoma kwalek logogin mene faget inom, gudang yi mene ti mene Tuhan obaget waluk fei wagu mene logogin oba wusugun iluk wenggelhikhesik palogo fesikhe mene a'nogo ogo wogetikheat.

¹³ Ekhe re it imam a'nogo inom, it Lewi inap inom, tegelogo fisagain mene faget wenggelhikhe mene a'nogo inom, iren yabu o Tuhan Awi wuri'mo hilingiti logogun mene faget wenggelhikhe mene a'nogo inom, Tuhan obaget wene kabogeti logolik hilingiti logogun mene faget wenggelhikhe mene a'nogo inom, wogetikheat.

¹⁴ Wogetikhesik he aren amlogoba re, emas elalhu aple inom, perak meneba yinik-hunik elalogo liafu mene inom,

¹⁵ esage pelita a'nogo halhu mene faget inom, esage a'nogo eisok wutu mene inom,

¹⁶ e talek meja perak meneba wutu mene faget inom, meja emas meneba wuri'mo roti enu warek a'nogo weragaisogo Allah faget fugu mene faget inom, faget yi'nogo hilingiti logogin iluk milil-melalhogo hilingfesikhe.

¹⁷ Andi nen emas mondok fano mene aling legengge aik suap hak engge garpu inom, mangkok i hinatungge inom, waruk endep-endebengge wutu aple inom, piring talengge wusuogeluk emas, perak inom wanhi logogun mene faget inom,

¹⁸ amben fanongge dupa a'nogo nolhuba obalik mezbah a'nogo wusuageluk inom, Peti Tuhan nen Wene warogo wo'ninafikhe mene a'nogo amboloba, pogoroba yonggoba nen inunggulenu kerub andi mene inebe ilirenggerogo inogolabi langhogo werek mene kereta hangge amboloba logouwageluk emas mondok fano meneba wanugun mene iluk a'nogo inom, ogo melalfisasikheat.

¹⁹ A'nogo mondogat melalfisasikhesik, at raja Daud a'nogo nen ikhi logolik he, ”Mondok abirengge andi re, Tuhan nen yi'nogo hilingi'no iluk wene melalogo an nen hilingisuageluk wo'netemo hilingisugun mene iluk palek meneba mondok kwelabek werek andi,” iluk yagaisasikhe.

²⁰ Andi nen at Daud en amlogo Salomo ba ekhe inom yagati logolik he, ”Hat he hendawinggen hambuk haluk hailo lekhogo hilingi'no. Amu meneba ekhe hailo asu fuk, yabu andi re erorano at. Tuhan Allah an nen fogerati lagi mene andi nen hat lebethiikhi logogin. Nen, Aren he hat herakhobagaluk lagain mondok lek, we hat hera'lu werek kwelek enek yabu andi mondogat eil homokhogo wusigin.

²¹ Yabu o Tuhan Awi wuri'mo hilingitu mene faget he, it Allah eilhanem hilingitu mene inom, it Lewi inap inom, en hilingiti logouwageluk mondok en higik werek andi. Yabu andoma hilingitunem it inelurek logogin mene omanogo hilingitu halok he, it hilingitarek higithogo inendawi fanoba lebethiikhi logogun, nen it afuni Israel mene melalinafu mene inom, it afuni holhu mene abirengge inomen he, haren yi'nogo hilingi'no ti'nogo hilingi'no iluk melalfisugu mene a'nogo hane hologo hilingiti logogun o,” iluk yagatikhe.