1 TAWARIKH 27 - Allah Wene Fano Wene Hupla Inane

Ap sikhe fisogo mene inogogwi kaindek inom it ap hokhondek fena welagaukwa mene inom a'nogo

^1-15 O kerajaan Israel oba andoma yi wene ti wene pemerintah inoba afe halhu mene faget he it ap ineisok erokwe higit-higit inogogwi welagaukwa mene omanogo inom, it inunggulenu lombok faget melalinafu mene omanogo inom, it sikhe fisogo mene inogogwi lego mene perwira omanogo inomen, halhi lagaukwa. Tahun hundik-hundik tugi misik inukhogo ap logalek misik ekhe inoe kepala melalinafu mene misik ekhe nen woginarek hobugalep yabu hilingiti lagaukwa. Esa logalek andoma hundomok he ap inebe 24.000 nen higik welagaukwa. It esa logalek andoma tugi hundik-hundik fololhunem yabu hilingitu mondok welagaukwa mene a'nogo inogogwi kepala inenu re yi: Tugi misik oba re: Yasobam hun Zabdiel amlogo (At ebere it inunggulenu Yehuda meneba re hun Pere unggulenu a'nogoba nen) melalinafi lagaikhe. Tugi pire meneba re: Dodai, hun Ahohi ambisangmangge a'nogo. Nen at a'ma owakil hakhogore Miklot welagaikhe. Tugi henaganek meneba re: Benaya amlogo a'nogo; at he it ’Esa 30’, ikhi lagaukwa mene andi melalinafu mene welagaikhe. Nen, at a'ma owakil he at amlogo Amizabad a'nogo welagaikhe. Tugi enggaminogonek meneba re: Asael hun Yoab agailak a'nogo. (Nen, at obali'mo re at amlogo Zebaja a'nogo welagaikhe.) Tugi fuabenggeba re: Samhut hun Yizrah ambisangma mene a'nogo welagaikhe. Tugi falfalik enggeba re: Ira hun Ikes amlogo o kota Tekoa mene a'nogo welagaikhe. Tugi sabit enggeba re: Heles, hun Efraim ambisangma mene o kota Penoli mene a'nogo welagaikhe. Tugi sirek meneba re: Sibkhai awi kota o Husa mene a'nogo, (at ebere it inunggulenu Yehuda meneba nen he unggulenu Zerah mene) welagaikhe. Tugi sogo meneba re: Abiezer, o kota Anatot wilayah it inunggulenu Benyamin meneba omanogo mene welagaikhe. Tugi nomolo meneba re: Maharai, hun Serah ambisangma mene o kota Netofa mene andi welagaikhe. Tugi nalonggop meneba re: Benaya, o kota Piraton it wilayah Efraim oba mene andi welagaikhe. Tugi nesanggo meneba re: Heldai, hun Otniel ambisangma Mene o kota Netofa mene andi welagaikhe.

It inunggulenu Israel meneba nen inogogwi kaindek welagaukwa mene a'nogo

^16-22 It inunggulenu Israel meneba nen kaindek welagaukwa mene a'nogo inenu re yi: Inunggulenu Ruben meneba re Eliezer hun Zikhri amlogo, Simeon meneba re Sefaca hun Maakha amlogo, Lewi meneba re Hasabya hun Kemuel amlogo Harun meneba re Zadok Yehuda meneba re Elihu hun Raja Daud agailak a'nogo Isakhar meneba re Omri hun Mikhael amlogo a'nogo Zebulon meneba re Yismaya hun Obaja amlogo a'nogo Naftali meneba re Yerimot hun Azriel amlogo a'nogo Efraim meneba re Hosea hun Azazya amlogo a'nogo Manasye i Yordan palogo fikhit mene a'nogoba re Yoel hun Penaya amlogo, Manasye i Yordan palogo mo lagai wagarek fikhit a'nogoba re Yido hun Zakharia amlogo, Benyamin meneba re Yaasiel Abner amlogo a'nogo, Dan meneba re Azareel hun Yeroham amlogo a'nogo.

²³ At Tuhan nen abok wene Daud yagati logolik, ”Afuni Israel mene inebe hesagalenggen pogoroba werek andoma hak hilingfagain o,” iluk yagatikhemo nogo nen he, at raja Daud en he ap inebe umur 20 tahun a'ma fikhit hilingik mene re inenu palogo wenaginafukwa lek.

²⁴ At Yoab hun Zeruya amlogo a'nogo nen he ap inenu palogo wenaginabigin iluk eroratikheba nen he, at inenu palogo wenatikhe andiba Allah nen it afuni Israel mene unggum wogisasikhemo re, aren hesanggema teisal fesikhe. Andiba re it inebe seberogo hilingik mene faget he at raja Daud ambukuba re palek welagaikhe lek andi.

Hun Raja angge onggwaregen mene halhi lagaukwa inap a'nogo

^25-31 Hun raja onggwarek angge mene halhi lagaukwa inap a'nogo inenu re yi: Gudang yi mene ti mene fuguba o at raja weregoba inom, o Yerusalem inom, faget he, Azmawet hun Adiel amlogo a'nogo nen halhi lagaikhe. Gudang o Yerusalem endakwe fikhit andoma faget he: Yonatan hun Uzia amlogo andi nen halhi lagikhe. At Eabukwe faget he: Ezri hun Kelub amlogo a'nogo nen halhi lagaikhe. Agayo anggur yago omanogo faget he: Simei o kota Rama mene andi nen halhi lagaikhe. Nen, anggur enggen palogo fei wagu mene faget he: Hun Zabdi awi kota Syifmi mene andi nen halhi lagaikhe. Nen e zaitun inom, e ara inom (tom erokwe mo ubuk ikherek fikhit andoma re): Hun Baal-Hanan awi kota Gederi mene andi nen halhi lagaikhe. Zaitun amusu keralogo fuguba halhi lagaikhe mene re: Yoas welagaikhe. Wam domba, sapi, inom o Saron Leimo andoma halhi lagaikhe mene re: Hun Sitrai awi kota Saron mene andi welagaikhe. Wam o tonggokwe andoma halhi lagaikhe mene re: Safat hun Adlai amlogo andi welagaikhe. Wam unta halhi lagaikhe mene re: Hun Obil Ismael ambisangma mene andi welagaikhe. Wam keledai halhi lagaikhe mene re: Hun Yehdeya awi kota Meronot mene andi welagaikhe. Wam domba, kambing inom halhi lagaikhe mene re: Hun Yazis Hagri agun andi welagaikhe.

Hun Daud onggwarek faget komo mene yagati lagaukwa inap a'nogo

³² At raja Daud eisena agot Yonatan andi re, ap komorinafu mene faget he mondok hibil-hebelsek logolik, elu mondok agun welagaikhe. At inom hun Hakhmoni amlogo Yehiel a'nogo inom he at raja againafuri faget sekolah yagaisikhi logouwageluk fisasikhe.

³³ Ahitofel he at raja ebe komotu mene welagaikhe, nen hun Husai awi Arki agun andi re at raja agailak endawi hundik mene logolik komotu mene welagaikhe.

³⁴ At Ahitofel a'nogo ebe wa'lagaikhemo obali'mo re, hun Benaya amlogomi Abyatar inom, Yoyada inom fisasukwa. Nen o kerajaan andiba weim yafu mene inoe kain panglima re hun Yoab welagaikhe.