1 TAWARIKH 26 - Allah Wene Fano Wene Hupla Inane

Tuhan Awi wuri'mo a'nogo kagalek welagaukwa wene

¹ It ap Lewi inap o Tuhan Awi wuri'mo a'nogo kagalek logouwageluk yabu sumburogo wogisasukwa mene a'nogo re yi: It inunggulenu Korah mene oba nen he hun Meselemya Kore amlogo, hun Ebyasaf eisok erokwe mene a'nogo fesukwa.

² Hun andi re at amlogomi inebe sabiren welagaukwa mene re it inebe ta'lagaukwa aple higit-higit inenu re yi: Zakharia inom, Yediael inom, Zebaja inom, Yatniel inom,

³ Elam inom, Yohanan inom, Elyoenai inom, andem.

⁴ Ombo'ne re at Obet-Edom inenggi tum watfesukwa. At andi re Tuhan nen ebe fanoabet fikhi logolik he againafuri inebe siregen wogetikhe mene inenu re yi: Semaya, Yozabad, Yoah, Sakhar, Netaneel,

⁵ Amiel, Isakhar, Peuletai inom andem.

^6-7 Hun Obet-Edom amlogo manggusa mene Semaya a'nogo re amlogomi inebe falfaligen welagaukwa mene inenu re yi: Otni inom, Rafael inom, Obed inom, Elzabad inom, Elihu inom, Semakhya inom, andem. It ap andem it mene ineisok erokwe andoma nen he inogogwi ap lego inap welagaukwa, nen elokhoma hak he Elihu inom Semakhya inom andem welagaukwa.

⁸ Ap o kagalek werek mene andi faget he at Obed-Edom eisok erokwe mene ap inailo mondok lek mene nek inebe 62 nen wogisasukwa.

⁹ At Meselemya eisok erokweba nen he ap inailo mondok lek mene nek inebe 18 nen wogisasukwa.

¹⁰ It hun Merari eisok erokwe meneba nen he hun Hosa inenggi tum watfesukwa. At amlogomi inebe enggaminogo welagaukwa mene inenu re; Simri, (At andi re amlogo manggusa mene re lek oba nen he eisena nen kain logolik ferinarek mene logouwageluk menfesikhe mene) andi inom,

¹¹ Hilkia inom, Tebalya inom, Zakharia inom, andem. At Hosa andi eisok erokwe mene inebe lombulogo 13 nen welagaukwa mene re Tuhan Awi wuri'mo a'nogo kagalek logouwageluk fisasukwa.

¹² It Tuhan Awi wuri'mo a'nogo kagalek logouwageluk fisasukwa mene a'nogo ogore it inunggulenu hilingik higithogo kaboget higik sumburik welagaukwa. It andi re, ap Lewi inap fena hilingik welagaukwa hakhogo re yabu Tuhan Awi wuri'mo elonggoma omanogo hilingiti logouwageluk inom wogisasukwa.

¹³ It andi inebe ineisok erokwe hokhorogo werek mene inom, endephogo werek mene inom he, kwe ambe palek ki meneba kagalek logogun iluk ninelu asuageluk he inenggi halhikhi lagaukwa.

¹⁴ Nen at Salemya a'nogo re kwe ambe mo lagai wagarek higit a'nogo kagalek logogin mene helasikhe. Nen, at amlogo Zakharia awene komo mondok fanorek welagaikhe agun a'nogo re kwe ambe ambolkwe utara fikhit mene a'nogo helasikhe.

¹⁵ Obet-Edom he kwe ambe a'ma selatan fikhit mene agaikhe, nen at amlogomi omanogo re o Tuhan Awi wuri'mo yi mene ti mene fei kwikhi lagaukwaba omanogo kagalek logogun mene agaukwa.

¹⁶ It Supim inom, Hosa inom he, kwe ambe, o mo ubuk ikherek kwe barat fikhit omanogo inom, kwe ambe ekhe enu Syaklekhet kwe lagokhogo lagai wagunem welagaikhe mene andi fikhit andoma agaikhe. Ap yabu o Tuhan Awi kwe ambe palek oba a'nogo mondok foni-fanorogo halogo fugunem, hundik-hundik ap andoma kagalek welagaukwa.

¹⁷ Linggene hundik-hundik, abel timur fikhit he ap inebe falfaligen kagalek welagaukwa, nen utara fikhit he inebe enggaminogo mene kagalek welagaukwa, nen selatan fikhit he ap inebe enggaminogo meneat kagalek welagaukwa. Yi mene ti mene fuguba gudang omanogo ogo ap inebe enggaminogo meneat kagalek welagaukwa, nen, gudang misik faget he ap inebe pirendek higik kagalek welagaukwa.

¹⁸ O Tuhan Awi wurik mene andi esanggo barat fikhit he o ekhe endephogo wurik were'ma ebekhalem he ap inebe enggaminogo mene kagalek welagaukwa, nen o ebe endephogo wurik welagaikhe mene andem oba re ap inebe pire mene kagalek welagaukwa.

¹⁹ It inunggulenu Korah mene inom Merari mene inom, oba re yabu a'nogo sumburogo wogisasikhe andi.

Tuhan Awi wuri'mo andi yabu amu mene fena welagaikhe mene a'nogo

²⁰ It inunggulenu Lewi mene a'nogoba nen ap fenakwe omanogo re o Tuhan Awi wuri'mo yi mene ti mene werek mene omanogo inom, afuni Allah obaget waluk fei laga lagaukwa mene omanogo inom, halhi logouwageluk welagaukwa.

²¹ Ladan andi re hun Gerson a'nogo amlogo mene welagaikhe, nen aren he ap inunggulenu esa logalek mene ekhe taginafikhe, nen ekhe re at amlogo Yehiel andi unggulenu mene welagaikhe.

²² Hun Yehiel andi againafuri re: Zetam inom, Yoel inom, it he gudang yi mene ti mene fuguba omanogo inom, Tuhan Awi wuri'mo uang fugu mene omanogo inom halhi logouwageluk wogisasukwa.

²³ At Amran ambisangmangge mene re, Yizhar, Hebron, Uziel, inom ogore yabu hilingiti logouwageluk wogisasukwa.

²⁴ Hun Sebuel it Gersom ineisok erokwe mene Musa amlogo a'nogo re, Tuhan Awi wuri'mo yi mene ti mene elonggoma werek mene omanogo faget kagalek welagaikhe.

²⁵ At andi re hun Gerson Eliezer agailak Salomit a'nogo eisok erokwe mene inom hundik welagaukwa. Nen, at Eliezer oba nen Salomit huli ta'larik wagaukwa mene a'nogo re yi'nogo: Eliezer, Rehabya, Yesaya, Yoram, Zikhri, Selomit.

²⁶ At Selomit inom, it agaila'lak inom he hun raja Daud inom, it ineisok erokwe lombok faget kepala welagaukwa mene omanogo nen inom, it inunggulenu lombok faget melalinafu welagaukwa mene omanogo nen inom, it tentara inogogwi lego mene perwira omanogo inomen Tuhan obaget fei waga lagaukwa mene omanogo halhu mene re it andi welagaukwa.

²⁷ Nen, iren waluk wogosi waga lagaukwa mene andi fena re iren weim yabi laluk telhi lagaukwangge omanogo inom, nen iren Tuhan Awi wuri'mo andoma amu enogo hilingitungge iluk fei waga lagaukwangge omanogo inom, halhi lagaukwa.

²⁸ Lebekhogo re, at Salomit inom, at eisok erokwe mene inom he yi mene ti mene Tuhan Awi wuri'mo andoma nen amu enogo hilingitungge iluk fei waga lagaukwangge andoma inom, fena at Allah ane yagaisikhi lagaukwa mene nabi Samuel sebene nen at raja Saul en fei wagaikhe mene omanogo inom, Abner en inom, Ner en inom, hun Zeruya amlogo Yoab a'nogo nen fei loageluk wogeti lagaukwa mene fei waga lagaikhe mene inom omanogo halhi lagaukwa.

It ap Lewi mene andi ineabu ekhe re yi mene welagaikhe

²⁹ Hun Yizhar ambisangma mene, hun Kenanya inom at againafuri inom he, negara ba lisu palhik, inenu palhik, hilingiti logouwageluk inom, it afuni Israel mene were'ma andoma afuni weak hilingitunem wene ayo palogo palhik, ikhi logouwageluk inom fisasukwa.

³⁰ Nen it afuni Israel inap i Yordan palogo mo ubuk ikherek fikhit welagaukwa mene a'nogo inawene: Allah wene faget hilingitu mene inom, it pemerintah inawene faget hilingitu mene inom he, hun Hasabya at agaila'lak inebe 1.700 nen mene inom wogisasukwa. It inebe mondogat andi re hun Hebron ambisangmangge mene ap inogogwi hokho inap enek welagaukwa.

³¹ It Hebron ambisangma mene andi melalinafi lagaikhe menere hun Yeria andi welagaikhe. At raja Daud a'nogo nen ferinarek welagaikhe huli tahun 40 meneba re hun Hebron nen tagomangge mene a'nogo faget pilingitukwa. Andiba pilingitunemen he ap tentara inambong mondok sise inap enek he o Yazer wilayah Gilead oba andoma were'ma isasukwa.

³² Nen it afuni Israel inap i Yordan esanggo mo wulibi wagarek fikhit o wilayah it inunggulenu Ruben meneba andoma inom, Gad meneba andoma inom, Menasye meneba fena omanogo inom inawene re: Allah wene faget inom, pemerintah inawene faget inom palhu mene re, hun Yeria eisok erokwe mene inebe 2.700 nen omanogo inoba wogisasukwa. Ap inebe mondok he ap hokho inap enek at raja Daud en tegelinafikhe mene welagaukwa.