1 TAWARIKH 24 - Allah Wene Fano Wene Hupla Inane

It imam inap a'nogo yabu hilingiti logouwageluk wogisasikhe wene

^1-3 Hun Harun he amlogomi inebe enggaminogo mene taginafikhe; Inenu re, Nadab inom, Abihu inom, Eliazer inom Itamar inom andem. It Nadab inom Abihu inom he ineisena eluk werek kwelek he inagainafuri ekhe taginafi legengge it tak wa'lagaukwa. Andiba re it inagaila'lak Itamar inom, Eleazar inom he imam agaukwa. At Daud en he it Harun ambisangma mene a'nogo re it ineabu hilingik aplerogo sumburinabik lagaikhe. A'nogo sumbuthigik fisugunem a'nogo re, at Eleazar ambisangma mene re hun Zadok, nen hun Itamar ambisangma mene re hun Ahimelekh, inomen Daud lebethasukwa.

⁴ At Itamar ambisangma mene re inebe siregen logalhukwa, nen at Eleazar ambisangma meneba nen he ap enek hokhorogo it ineisok erokwe lombok faget inunggulenu hakhogo welagaukwa ma re, at ambisangma mene nek he wenagisogo ambolkweat inebe henawi 16 nen agaukwa.

⁵ A'nogo tegelhi logolik andi re, at Itamar eisok erokweba nen ogo, at Eleazar eisok erokweba nen ogo ap fena Tuhan awi elonggoma yabu hilingitu mene faget inom, nen it ekhe wene fano wene faget hilingitu mene faget inom, welagaukwa. A'nogo welagaukwama re, ineabu sumburisikhi logolik he, inenggi walhaluk enek hilingiti lagaukwa.

⁶ At Itamar ambisangma mene inom, Eleazar ambisangma mene inomen he inebe higit-higit inenggi waleti lagaukwa. A'nogo waletunem it inenu re ap misik ekhe lisu palhi lagaikhe mene Semaya hun Netaneel amlogo Lewi agun a'nogo nen palhigik fikhi lagaikhe. Mondogat andoma re at hun raja a'nogo inom, agoromi at a'ma yabu hilingiti lagaukwa mene pegawai omanogo inom, ap imam Zadok a'nogo inom, hun Abyatar amlogo Ahimelekh a'nogo inom, it imam inap iluk salogo welagaukwa meneba omanogo ineisok erokwe lombok faget kepala welagaukwa mene omanogo inom, it Lewi inap salogo welagaukwa inap inogogwi kepala omanogo inom, ineilhanem en hilingiti lagaukwa.

^7-18 It ap inebe kabok 24 en a'nogo yabu hilingitu mene faget inenggi walhugu halok hobugalep wenago mene higithogo wanhukwa mene re yi: l. Yoyarib 13. Hupa 2. Yedaya 14. Yesebeab 3. Harim 15. Bilga 4. Seorim 16. Imer 5. Malkia 17. Hezir 6. Miyamin 18. Hapizes 7. Hakos 19. Petahnya 8. Abia 20. Yehezkiel 9. Yesua 21. Yakhin 10. Sekhanya 22. Gamul 11. Elyasib 23. Delaya 12. Yakim 24. Maazya

¹⁹ Ap inenu palek andi re, it afuni Israel mene ineisena Tuhan Allah nen wene melalek yi'nogo hilingi'no ti'nogo hilingi'no iluk it inomba Harun yagatikhemo Tuhan Awi elonggoma omanogo inebe hobugalep kwi laluk, Tuhan obaget hilingiti logogun mene iluk fesukwama hilingiti lagaukwa higithogo palek andi.

It Lewi inap inenu palek a'nogo

^20-26 It inenu palek welagaikhe mene andi nen fena it Lewi inap inambisangma meneba were'ma it ineisok erokwe mene faget kepala mendek welagaukwa mene re a'ma kwe yi: Yehdeya, hun Amran ambisangma mene hun Subael a'nogoba nen ta'lagaikhe mene; Yisia, hun Rehabya ambisangma mene a'nogo Yahat, hun Yizhar ambisangma mene, hun Selomot a'nogo meneba nen ta'lagaikhe mene, Yeria, Amarya, Yahaziel, Yekameam, hun Hebron againafuri it inebe ta'lagaukwa umur higithogo re yi; Samir, hun Uziel ambisangma mene, hun Mikha a'nogo meneba nen ta'lagaikhe mene; Zakharia, hun Uziel ambisangma mene, hun Mikha agailak Yisia a'nogo meneba nen ta'lagaikhe mene; Mahli, Musi, Yaazia, hun Merari ambisangma mene.

²⁷ Yaazia amlogomi inebe henagan welagaukwa mene inenu re, Syoham inom, Zakur inom, Hibri inom andem.

^28-29 Mahli re amlogomi inebe pire welagaukwa mene inenu re, Eleazar inom he Kish inom andem. Eleazar he at amlogo ekhe welagaikhe lek, oba nen he Kish nek he amlogo misik ekhe welagaikhe mene enu re, Yerahmeel andi.

³⁰ Hun Musi amlogomi re inebe henagan welagaukwa: Inenu re, Mahli inom, Eder inom, Yerimot inom andem. It inunggulenu Lewi meneba nen ap ineisok erokwe mene inom welagaukwa aplere andi.

³¹ It yabu inebe hobugalep wanhi lagaukwa mene faget he, it ap inenu werek mene inagot misik ekhe inom, it inagaila'lak ap Allah eilhanem hilingiti lagaukwa mene at Harun ambisangma mene nen hilingiti lagaukwa aple higithogo inenggi walhaluk wanhi lagaukwa. It a'nogo inenggi walhugunem he, at raja Daud inom, ap imam Zadok a'nogo inom, Ahimelekh inom, imam-imam it inunggulenu lombok ineisok erokwe faget inogogwi kepala welagaukwa mene a'nogo inom, it Lewi ineisok erokwe mene inom, omanogo ineilhanemen hilingiti lagaukwa.