1 TAWARIKH 22 - Allah Wene Fano Wene Hupla Inane

¹ A'nogo logolik, at Daud en ikhi logolik he, ”O Tuhan Allah Awi andi re, obalik arem at wusugun o. Nen, mezbah yiba re afuni Israel mene nen ineisena Tuhan obaget wam warogo noleti logogun o,” iluk yagaisasikhe.

Tuhan Awi a'nogo wusugun iluk fik fougetukwa wene

² At raja Daud a'nogo nen miminginafi logolik he, ap pok mene o it afuni Israel mene werek kwe yoma werek mene mondogat andogerinabuageluk yagaisasikhemo wagaukwama re aren it yabu hilingiti logouwageluk kwelaginafikhe. It afuni andi fenakwe re o Tuhan Awi a'nogo wutu mene faget iluk helep serelhi lagaukwa.

³ O andi faget posiemanggen inom, nen kwe enggi senengge engsel inom, Tuhan Awi andi kwe sou hokho mene aremnogo faget hilingisuageluk he, at Daud en posiemanggen mene hokhorogo kabogetikhe. Aren nekherogoat no perunggu inom hokho-pokhorogo kabogetikhemo re enggin faget ilirengge walesu elo'lek welagaikhe.

⁴ It afuni Sidon mene inom Tirus mene inom, inoba re e laik o Libanon mene omanogo hokhorogo waluk wesuageluk yonggo fesikhe.

⁵ At Daud en mondogat andoma a'nogo hilingiti lagaikhe andi re aren yi'nogo wenggel hikhi logolik: ”At Salomo nen Tuhan Awi wusigin mene andi re o ebe mondok hokho mene wusiginmo re, o kweangma yoma nen o andi faget raja logogun oba nen, an namlogo Salomo re ebe ap souge logolik yi aple ti aple hilingitu mene faget ogore mondok endawinggen kagalek, enggere o Tuhan Awi andi wusigin mene faget he an nenat elokhoma lek asigin mene andi mondogat fik-foukhogo hilingfagain,” iluk a'nogo wenggelhikhesik hilingitikhe andi. Nen at Daud ebe oan wa'lagi'lek logolik, aren o wutu mene faget o ebenengge mondok hokhorogo miningisogo fesikhe.

⁶ A'nogo hilingitukwasik he at, Daud en amlogo Salomo a'nogo wolhasikhesik, wagaikhemo re aren o Tuhan Allah afuni Israel mene nen apne wanharek mene a'nogo awi andi re yi'nogo wu'no, iluk wene melalfesikhe.

⁷ At Daud en amlogo Salomo ba ikhi logolik he, ”Namlogo, an o endamen engge At Tuhan Allah a'nogo along anggaluk legeisogo fikhi logolik he, o misik ekhe At Aiba wusigin iluk nendawimo anggikhi lagagi.

⁸ Oba nen he, Tuhan nen an yaganeti logolik he, Hat he hundik weim yabi laga logolik he, ap hokhorogo inoati lagenma re o An nawi andi re haren wusigin lek, iluk yaganete.

⁹ A'nogo yaganeteba nen he, Aren abok wene yaganeti logolik he, yi'nogo yaganete yi: Hat he hamlogo abengge misik ekhe ta'lasumo re, ap inaselei mene faget inailo legengge logolik melalinafi logogin. Nen, An nen he at lebethugunem ap aselei mene nen ogo ekhe at inom weim yabi waga logogun mondok lek. Nen, aren afuni melalinafi logogin oba andoma re An nen o afuni Israel mene werekwe mondok inailo legengge fano lioksek logouwageluk hilingfisagain andi nen he, at andi enu re Salomo salino.

¹⁰ Hat hamlogo andi nenat o An nawi andi wusigin. At ebere An namlogo asigin, An at eisena asigin, At ebe raja hurek logolik melalinafi logogin mene kerajaan andi re at ambisangma nen tagomangge meneba mondok-mondogat logogin, iluk yaganete,” iluk yagatikhe.

¹¹ A'nogo yagatikhesik, at Daud en ekhe inom yagati logolik he, ”Yogondak he, namlogo, we hat heisena Tuhan Allah andi nen enek lebethafi logouwak. Nen, o Tuhan Awi andi re, Aren wene abok ikhe hakhogo haren eberogo wusigin logouwak.

¹² Tuhan Awene melalek yi'nogo hilingi'no ti'nogo hilingi'no iluk isikhe mene a'nogo higithogo haren it afuni Israel mene melalinafi logoinogen, At heisena Tuhan Allah andi nen hat enggaret hobagagik, heluet hobagagik, hilingiti logouwak.

¹³ Allah Awene melalek yi'nogo hilingi'no ti'nogo hilingi'no iluk Tuhan nen it afuni Israel mene faget Musa wogetikhe mene andi mondogat hologo hilingiti logogin halok he, haren hilingiti logogin mene andoma ambisangma fano nek aga logogin. Hat hebe re hendawinggen hambuksek logolik hambok serogo hilingiti logoino. Ekhe mene ekhe mene andoma helokhoma agu halok he, hailorogo hilingiti logou fuk.

¹⁴ O Tuhan Awi andi faget he, an mondok namurururogo emas re 3.400. ton fougeti, nen perak he 34.000 ton nen taganhogo ambol kweat fougeti. Andi nen fena amu mene perunggu inom, posiemanggen mene inom he mondok wenasu elo'lekhogo omanogo andogotiat. Helep inom, e inom, ogore an nen mondogat miningisogo figi, oba nen he haren ogo fena miningisigin fanoat.

¹⁵ Hat heabu wanhu mene re inebe hokhorogo werek andi. Fena helep watu mene a'nogoba watu mene werek, fena eba wutu mene inom, helep oba wutu mene inom, andi nen it ap emas, perak, perunggu inom,

¹⁶ andi elalhu inelu mene re hokhorogo werek. Enggere weak-weagat erora'no! We At Tuhan nen enek hat lebethiikhi logouwak,” iluk yagatikhe.

¹⁷ A'nogo yagatikhesik at Daud en he it afuni Israel mene inogogwi melalinafi lagaukwa mene omanogo inoba, at Salomo lebethikhi logouwageluk yagaisasikhe.

¹⁸ Aren it a'nogo yagaisikhi logolik he, ”At hineisena Tuhan Allah a'nogo nen he hit hinaiba welagep oba yoma hinailo legengge fano lioksek logobagaigeluk hilinghinobagagik, hinebe seberogo logobagaigeluk hilinghinobagagik, hilingite andi. Aren he an nen it afuni inunggulenu amu mene o kweang yiba welagaikha mene a'nogo inomame leget fisoageluk hilingnobagakhi laga. A'nogo hilingiti lagama re yogondak he it a'nogo hit hina'ma sebe igik, Tuhan a'ma sebe igik, ili'lagwi andi.

¹⁹ Enggere, hiren hineisena Tuhan Allah ba nek, hinendawinggen inom, hinebe inom mondok abirengge At oba nek eberek logolik hilingiti logoino. Peti Tuhan nen Wene warogo wo'ninafikhe mene a'nogo inom, samban uogeluk kabogeti logolik, hilingitu mene yi mene ti mene omanogo inom, o wuri'mo andoma fikhi logogun nen he, Tuhan Awi andi wusugun mene erora'ni,” iluk yagaisasikhe.