1 TAWARIKH 20 - Allah Wene Fano Wene Hupla Inane

Daud en o Raba telhikhe wene

¹ Tahun ekhe wela'luk kobokhogo tahun ekhe kwi lagunem andoma re, it inetokhogo raja-raja weim yabi laga lagaukwangge a'nogo re, tahun ekhe ket kwi lagunem he, at Yoab a'nogo agoromi sikhe fisogo mene omanogo lirisasikhesik woginarek wulibi lagaikhesik, o it ap inunggulenu Amon mene were'ma andoma sebela kwisikhe. Andem oba re at raja Daud a'nogo re it inom lagi'lek o Yerusalem kamo isikhesik welagaikhe. At Yoab agoromi inom a'nogo re o kota Raba a'nogo pin kwikhi logolik inawi kota a'nogo halik-halokhogo hilingfesukwa.

² A'nogo hilingitukwama nek he at Daud a'nogo waga logolik he, o kota andi yi mene ti mene hokhorogo telhukwangge omanogo helasikhe. Sunggwe andoma anggele'ma re at raja Amon agun a'nogo kware-kware hangge makhota a'nogo ogo welagaikhe. Makhota andi enggin he 34 kilo nen hangge hilingi'mo re permata ekhe misik oba eiselek welagaikhe. A'nogo eiselek were'ma re at Daud en permata a'nogo wanhikhesik he aren mene kware-kware makhota ba kelfesikhe.

³ Andi nen at Daud en he afuni o kota Raba andi mene omanogo mondogat feleleng inarek lagaikhesik, ane omameba yabu gergaji ba inom, kiam oba inom, yagaba inom, hilingiti logouwageluk yagaisasikhe. Andi higithogo re obabut andi mene re o kota Amon oba nen amu mene omanogo ogore a'nogo nek hilingfisasikhe. A'nogo hilingfisasikhesik he at Daud inom it agoromi sikhe fisogo mene omanogo mondogat inom he inambotkwe inaiba o Yerusalem wagaukwa.

Ap Filistin inap inoakhuse uandek mene omanogo inom weim yafukwa wene

⁴ A'nogo hilingitukwasik oba nen welagaukwasigenat he hobuk weim a'nogo ap Filistin mene nen o Geser andoma nen erotukwa. Andi sambul he ap ekhe enu Sibkai awi Husa agun andi nen he ap hokho mene oakhuse mondok uan agun enu Sipai andi watikhe. A'nogo watikhemo re it Filistin mene inebikhit a'nogo maben agaukwa.

⁵ Weim amu mene ekhe it Filistin inap inom yafi logolik he, Elhanan hun Yair amlogo andi nen he hun Goliat agailak enu Lahmi awi Gat agun andi watikhe. Hun Lahmi arige kabelek andi re mondok wulim hilingi'mo re su itarek mene enu tenun andi obakhe hangge hilingik welagaikhe.

⁶ Weim amu mene ekhe meneba re ap o Gat agun ebe oakhuse mondok uan awan agun andi re, enggi segelet falfaligen, nen eisok segelet ogore falfaligenat wilibik agun welagaikhe. Hun andi re it ap inobakhe hokho inap, inoakhuse yatek-patek inap o endam oba andoma welagaukwa inap inambisangmangge mene welagaikhe.

⁷ Aren he ap Israel mene faget li'norogo hilinginafi lagaikhemo re, at ebe hun Yonatan Simea amlogo Daud oe a'nogo nen watikhe.

⁸ Ap inebe henagan at Daud inom it agoromi sikhe fisogo inap a'nogo inomen inoatukwa inap andem he it inoakhuse uan mene o Gat welagaukwa inap andoma mene nen tagomangge mene inoatukwa.