1 TAWARIKH 18 - Allah Wene Fano Wene Hupla Inane

Daud weim yabi lagunem at ebikhit omame aga lagaikhe wene

¹ A'nogo isukwasik oba nen inenggi ekhe welagaukwasigen he at raja Daud a'nogo it Filistin mene inom weim yabi lagaikhesik he it inalong lek hilingisogo fisaluk o kota Gad inom, o sili haningisogo andoma welagaukwa mene inom telasikhe.

² A'nogo telasikhesik he, ekhe it ap Moab mene inalong lek hilingisogo fisasikhemo re it at a'ma sebeluk logolik he o kweang, yi mene ti mene onggo pajak at oba fei waga lagaukwa.

³ Andi nen he at Daud en raja o Zoba mendek welagaikhe agun hun Hadadezer a'nogo o Siria wilayah Hamat oba andoma nen along lek hilingisogo fesikhe. Andi sambul he hun Hadadezer andi re o wilayah I Efrat elesi fikhit omanogo sebeli lagain iluk ebekhalem lagunemen a'nogo hilingitikhe andi.

⁴ At Daud en he kereta ap amboloba lagagunem wam kuda nen li'luk laga logolik weim yabik laga lagaukwa mene omanogo 1.000 nen mene telasikhe, nen it ap inasikhe werek inap kuda amboloba lagaluk weim yabi laga lagaukwa mene inebe 7.000 nen senfisasikhe, nen it inasikhe werek inap kweang kwe ineisok oba laga lagaukwa mene re inebe 20.000 nen senfisasikhe. Aren he anggo kuda omanogo mene ebe 100 nen kereta weim yafu mene faget fakhasikhesik he ekhe fena hokhorogo omanogo re omanggen tegerik lagaikhe.

⁵ A'nogo hilingitunem he it afuni Siria mene o Damsyik welagaukwa mene nen he at raja Hadadezer a'nogo lebethoageluk ap sikhe fisogo mene lakfisa wagaikhe, oba nen he at Daud en it inebe inomame leget fisasikhesik ap inebe 22.000 nen inoatikhe.

⁶ A'nogo hilingitikhesik he aren it agoromi sikhe fisogo mene it ap inoatukwa mene omanogo inawi wilayah ba omanogo tenda wurogo fisasikhemo re, it ap omanogo re Daud agoromi ina'ma sebeluk logolik, onggo o kweang yi mene ti mene Daud oba fei waga lagaukwa. pajak at Daud en yi kwe ti kwe weim yabi lagunem he Tuhan nen at oba omamet fugu nek welagaikhe.

⁷ At Hadadezer agoromi sikhe fisogo mene nen tok kwepalengge emas meneba hilingik mene omanogo re at Daud en telhikhesik he waluk o Yerusalem wagaikhe.

⁸ Andi wanhi logolik, at Daud en he o Tibhat inom, Kun inom, attak kota hun Hadadezer en sebelek welagaikheba andoma nen perunggu hokhorogo helasikhe. (Aren helasikhe mene omanogoba re, At Salomo hobugen he o Tuhan Awi wuri'mo a'nogo faget waruk inom, e liabek mene inom, Tuhan Awi Wuri'mo wene kabogeti logolik hilingitu mene inom wutikhe.)

⁹ Nen at raja o Mahat mene hun Tou a'nogo esanggo holhunemen he at Daud en Hadadezer agoromi sikhe fisogo mene omanogo mondogat inomame legaphogo fikhe, iluk ugunem holhikhe.

¹⁰ A'nogo holhikhesik he, attak andoma at raja Hadadezer nen raja Tou inom weim yabi laga lagaukwasi'mo re, aren amlogo Yoram a'nogo at Daud omame agaikhe mene a'nogo faget, Aren hai wathafe o, iluk yagasuageluk emas inom, perak inom, perunggu inom hokho-pokhorogo waluk wogosi lagaikhe.

¹¹ Waluk wagaikhemo re at raja Daud a'nogo nen he abirengge omanogo wene kabogetuba omanogo hilingitu mene iluk Tuhan obaget fesikhe. Andi nen yi mene ti mene emas, perak inom, hun Hadadezer inom it inunggulenu amu mene inom mabenet fisasikhe mene, inunggulenu Edom inap, Moab inap, Amon inap, Filistin inap, Amalek inap, omanogo mene telhikhe mene omanogo re a'nogo nek Tuhan obaget fesikhe.

¹² Hun Abisai andi agaisa enu re Seruya andi nen he it Edom inap o Asin tonggokwe welagaukwa inap omanogo inebe 18.000 nen inomame legaphogo fisasikhesik inoatikhe.

¹³ A'nogo inoatikhesik he it sikhe fisogo mene inawi tenda wuthigik o Edom oba omanogo fisilik lagaikhe. A'nogo hilingitikhemo re afuni omanogo at Daud a'ma sebe isukwa. At Daud en ekhe kwe ekhe kwe weim yabi lagunem Tuhan nen omamet fugu nek welagaikhe.

¹⁴ A'nogo at Daud en it afuni Israel inap werek mene a'nogo mondogat melalinafi logolik, it afuni holhu mene inoba fanorogo hilingfisigik, fanorogo hilingfisigik, hilingiti logogin iluk kagalek mondok welagaikhe.

^15-17 It ap inunggulenu lego mene at Daud en menfisasikhe inap omanogo inebe re yi: It sikhe fisogo mene inoe panglima re: Hun Yoab Abisai oe a'nogo. Raja werek oba omanogo faget sekretaris he: Hun Yosafat Ahilut amlogo a'nogo. Imam welagaukwa inap he: Zadok hun Ahidub amlogo a'nogo inom he, Ahimelekh hun Abyatar amlogo a'nogo inom welagaukwa. Negara faget sekretaris welagaukwa mene re: Sausa. At raja along palogo era'lu kagalek welagaikhe mene a'nogo inoe kepala hakhogo re: Benaya hun Yoyada amlogo a'nogo. At Daud amlogomi re it pemerintah ba omanogo yabu lego mene nek senek welagaukwa.