1 TAWARIKH 17 - Allah Wene Fano Wene Hupla Inane

Natan nen Daud oba Tuhan nen yi'nogo ikhe iluk yagasi lagaikhe wene.

¹ At raja Daud a'nogo awi istana omanogo femhogo logolik he, linggene misik sambul he aren ap Allah wene yagaisikhi lagaikhe mene nabi Natan a'nogo woletikhesik yagati logolik he, ”An nebe re nawi istana e laik o Libanon meneba wuri'mo werek kwelek he, e peti Tuhan nen Wene warogo wo'ninafikhe mene a'nogo re we o tenda wuri'mo a'nogo nek werek andi han!” iluk yagatikhe.

² A'nogo yagatikhemo re, at Natan nen onggo ikhi logolik he, ”Noe hat hendawimo hilingisigin iluk wenggelhen mene andi mondogat he heisena Allah hinom hundik welagepma re lebetheagain o,” iluk yagatikhe.

³ A'nogo yagatikheba nen hup a'nogo sambul he Allah nen Natan oba yagati logolik he,

⁴ ”Lan o! Lambik he, An namingmingengge Daud andiba re, Tuhan nen wene yi'nogo ikhe ino, O An nawi andi wusigin mene re hat he lek.

⁵ It inunggulenu Israel inap o Mesir en fikhalogo wulaginabi wagagiba nen yogondak huli nen he An o wuri'mo ekhe welagi lek. An he leil warik nikhi logolik o sabu salek kwe nek nogolik nikhi lagi.

⁶ Nen, An nebe leil warik it afuni inunggulenu Israel mene ninom nikhi logolik andoma re, it ap inogogwi melalinafi logouwageluk An nen wenagaisogo fisasigi mene andoma inoba ogo ekhe, o An nobaget e laik o Libanon meneba ekhe nenahalok wurogo nobagakhi lagep lek nogo? iluk ogo heinok ekhe wogisikhi lagi legat.

⁷ Ariginik enggere Natan ahwi, An namingmingengge Daud andiba re, Tuhan Omame Hokho mene a'nogo nen yi'nogo ikhe ino, hat he heabu wam domba o leimo halhunemen wokhafirik An nagainafuri Israel mene inobaget inoe raja logouwageluk menhobagagi o

⁸ Hat yi kwe ti kwe lagunem he An nen lebethiikhi lagagi, nen hat weim yabik nugunem he it haselei mene An nen mondogat inoati lagagi. Nen, hat he it ap o kweangma yoma melalinafu mene welagaikharek andi hakhogo, An nen mondok legeisogo hobagagin o.

^9-10 It nagainafuri Israel mene faget he, kweang obuluk misik ekhe it inanggweang a'luk aben ogo ekhe inane ying inafi legengge wonghogo logogun oba foukhogo fisasigi. It o attak kweang yiba kwi wagaukwa huli nen, it inoe raja oan werek kwelek he, ap mondok weak aple nek inendawi mene nen inoasi kwi waga lagaukwa. Oba nen he ero andi mene re ekhe inom asigin lek. An nen he hat haselei mene inalong legaphogo fisigik, nen hat heisok erokwe mene hagainafuri wokhetik, ikhi logogin iluk abok yagaheti lagi o.

^11-12 Hobugen ambi hat wa'laguba asi wesigin, nen hat hebe hit inombawi salinafi lagaukwaba andoma salhobagaumo re, An nen hat hagainafuri mene ap misik ekhe raja logouwageluk menfagain. A'nogo menfoumo at andi nen enek he o An nobaget wut nobagagin o. Nen, at ebe raja logolik melalinafi logogin oba kerajaan andi re An nen omamet fikhi logogin, nen mondok-mondok andoma re at ambisangma mene nen melalinafu mondok logogun.

¹³ An nen at eisena asiginmo re, at he, An namlogo asigin. An nen at oba fano aple nek hilingfikhi logogin. An nen at oba abok wene wareti mene andi re fisogo mondok logogin, nen hat raja menlasuageluk An nen at Saul a'nogo at hurek logolik halinaferek oba a'nogo nen higilogo pelafigi andi hakhogo hilingisigin mondok lek.

¹⁴ Hat hamlogo an nen wenasigin mene andi re it An namlogomi inobaget raja menfoumo, at raja logolik melalinafi logogin mene andi re mondok-mondok logogin, nen at againafuri ombawi mene nen ogore raja logolik melalinafi logogun, ikhe iluk yagasi lan,” iluk yagatikhe.

¹⁵ A'nogo yagatikhe mo re at Natan a'nogo Allah nen yagatikhe mene omanogo mondogat tindelogo at Daud yagasi lagaikhe.

Daud en samban oba Allah hai watikhe wene

¹⁶ A'nogo yagasi lagaikhemo re, at raja Daud a'nogo Tuhan Awi tenda sale'ma omanogo kwi lagaikhesik ebe hurek logolik he, samban yi'nogo isikhe, ”Tuhan Allah neisena, an inom, an neisok erokwe mene inom, haren fano mene nit ninoba hilingninobagakhi lagen mene andoma re hela elo'lek kwelek oba nen hilingninobagakhi lagen o, neisena.

¹⁷ We andi huli nek lek oba nen he mondok alonghogo Haren an nen tagomangge mene hobuk logogun aple faget abok yaganeten. Nen, Haren he an ap hokho mene inunggulenu werek inap oba hilingfisagarek higit hilingnobagakhi lagen.

¹⁸ Neisena Tuhan Allah an nen he nena aple ekhe Hat hoba igin nogo? Haren he an hamingmingengge yi faget he modok helu-pelurek logoligat legeisogo nobagakhi lagenma o.

¹⁹ We Hat honggwarek amu nen wenggel fuluk an nebe faget wene hokho aple andoma weinamet nobagakhi lagen o.

²⁰ We Hat hamu nek Allah welagen, Hat hinom higit mene ekhe werek lek. A'nogo werek iluk nit ninelurek andi re, o attagenat nit yaganisasukwama o.

²¹ O kweangma yoma mondogat he afuni inunggulenu it Israel mene hak he ekhe werek lek. It Israel inap andi re, Hat hamu hagainafuri asuageluk aben sebelinarek were'ma nen fikhalogo wulak fisasigin. Haren it faget hokho aple hilingiten mene inom, alonghogo hilingiten mene inom, andomaba re Hat henu o kweangma yoma mondogat he lego werek. Haren he it hagainafuri o Mesir en fikhalogo wulaginabi wagagindik, it Hat againafuri weim yabi louwogeluk lagunem he afuni inunggulenu amu mene omanogo filikhogo ale'ma fisikhi lagagin.

²² It inunggulenu Israel mene andi re Haren an nagainafuri logouwageluk he mondok-mondok hilingfisasigin. Tuhan neisena, Harenek he it ineisena Allah agagin, neisena.

²³ Neisena Tuhan Allah, yogondak he haren an nebe faget inom, an neisok erokwe faget inom abok egen mene a'nogo mondok-mondok faget omamet ninobagain. A'nogo hilingninobagambik he Haren a'nogo hilinghinobagagin iluk, abok yaganisegen mene andi hilingninobagakhi logoin o, neisena.

²⁴ Yi kwe ti kwe nen he Hat henu nek legeisogo hobagakhi logolik, iren ikhi logolik he, Tuhan Omame Hokho mene andi re, Tuhan it afuni Israel mene faget werek mene o, ikhi logogun. Mondok-mondok faget he ap an nen tagomangge mene misik ekhe nen raja logolik melalinafi logogin.

²⁵ Neisena Allah, an nen nambong serogo samban yi hoba ikhi lagi yi re, Hat hamu nen yaganeti logolik, an nagainafuri nombawi mene inom he, it afuni inunggulenu yi faget raja menlaga logogun, iluk yaganeten a'nogoba o, neisena.

²⁶ Neisena Hat Tuhan andi re, hebe Allah aro, nen wene mondok fano mene andi re, Haren an noba abok wene wa'neten o.

²⁷ A'nogo nobagegenma re, an nen tagomangge mene andoma Hat hendawi hundik hilinginafi logogin mene andi inoba agunem hugu mondok logouwakhogo re, an neisok erokwe mene ogo fanoet ninobagain o. Neisena Tuhan Haren it hagainafuri mondogat fanoet fisegen andi nen he, hobuk ogo mondok-mondok fanoet fisugu mondok logoino aro, neisena,” iluk samban isikhe.